ଚିକିତ୍ସା ପାଇଁ ଆସିଥିବା ରୋଗୀଙ୍କୁ ଗୋଡାଇ ଗୋଡାଇ ପିଟିଲେ ଡାକ୍ତର । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲ୍ଲାରେ । କଳାହାଣ୍ଡି ଧର୍ମଗଡ ଉପଖଣ୍ଡ ଡାକ୍ତରଖାନାରେ ଏଭଳି ଉନ୍ମ୍ତ କାଣ୍ଡ ଦେଖିବାକୁ ମିଳିଥିବା ବେଳେ ଏହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ଗତକାଲି ଡାକ୍ତରଖାନାରେ ରାତି ଡ୍ୟୁଟିରେ ଥିଲେ ଡାକ୍ତର ଶୈଳେଶ କୁମାର ଦୋରା । ଧର୍ମଗଡ଼ ବସ୍ତିପଡ଼ାର ଜଣେ ରୋଗୀ ପେଟର ଯନ୍ତ୍ରଣା ହେଉଥିବା ନେଇ ଡାକ୍ତରଖାନାକୁ ଆସିଥିଲେ । ହେଲେ ଡାକ୍ତର ନଥିବାରୁ ସେ ଡାକ୍ତର କୁଆଡେ ବୋଲି ପଚରାଉଚରା କରିଥିଲେ । ଏତିକିବେଳେ ଡାକ୍ତର ଆସି ତାଙ୍କୁ କାହିଁ ପାଟି କରୁଛ ବୋଲି କହି ପାଟିତୁଣ୍ଡ କରିଥିଲେ । ଯାହାକୁ ନେଇ ଭଭୟଙ୍କ ମଧ୍ୟରେ କଥା କଟାକଟି ହୋଇଥିଲା । ଉଭୟଙ୍କ ମଧ୍ୟରେ ବଚସା ଏତେ ବଢିଯାଇଥିଲେ ଯେ ଉଭୟ ହାତାହାତି ହୋଇଯାଇଥିଲେ । ଏହା ପରେ ଡାକ୍ତର ଜଣକ ଉତ୍ତ୍ୟକ୍ତ ହୋଇ ରୋଗୀଙ୍କୁ ବାଡେଇଥିବା ଅଭିଯୋଗ ହୋଇଛି । ଡାକ୍ତର ଜଣକ ବାଡି ସାହାଯ୍ୟରେ ରୋଗୀଙ୍କୁ ପିଟିବା ପରେ ରୋଗୀ ମଧ୍ୟ ପ୍ରତି ଆକ୍ରମଣ କରିଥିଲେ । ଫଳରେ ଡାକ୍ତରଖାନା ପରିସରରେ ଉତ୍ତେଜନା ଦେଖାଦେଇଥିଲା । ଶେଷରେ ପୁଲିସ ଘଟଣା ସ୍ଥଳରେ ପହଞ୍ଚି ଡାକ୍ତରଙ୍କୁ ଥାନାକୁ ନେଇଥିଲା । ରୋଗୀ ଓ ଡାକ୍ତର ଉଭୟ ପକ୍ଷରୁ ଥାନାରେ ଅଭିଯୋଗ କରାଯାଇଛି । ରୋଗୀ ଓ ଡାକ୍ତଙ୍କ ମଧ୍ୟରେ ଏହି ହାତାହାତି ହେବାର ଭିଡିଓ ଏବେ ସୋସିଆଲ ମିଡିଆରେ ଘୁରି ବୁଲୁଛି ।