ୟୁକ୍ରେନ ଉପରେ ଋଷ ଲଗାତର ଆକ୍ରମଣ ଜାରି ରଖିଛି । ଏହାରି ଭିତରେ ୟୁକ୍ରେନ ରାଷ୍ଟ୍ରପତି ଭୋଲଦିମିର ଜେଲେନସ୍କି ଏକ ବଡ଼ ବୟାନ ଦେଇଛନ୍ତି । ଜେଲେନସ୍କି କହିଛନ୍ତି, ସେ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଆଲୋଚନା କରିବାକୁ ପ୍ରସ୍ତୁତ । କିନ୍ତୁ ଯଦି ଆଲୋଚନା ବିଫଳ ହୁଏ,ତେବେ ଏହାର ଅର୍ଥ ତୃତୀୟ ବିଶ୍ୱଯୁଦ୍ଧ ହେବ । ୟୁକ୍ରେନ ରାଷ୍ଟ୍ରପତିଙ୍କ ଏହି ବୟାନ ଏଭଳି ସମୟରେ ଆସିଛି ଯେତେବେଳେ ଋଷ , ୟୁକ୍ରେନ ଉପରେ ଲଗାତର ପ୍ରଚଣ୍ଡ ଆକ୍ରମଣ କରିଛିା ଏହା ପୂର୍ବରୁ ଜେଲେନସ୍କି ଋଷ ରାଷ୍ଟ୍ରପତି ପୁଟିନଙ୍କୁ ଯୁଦ୍ଧ ରୋକିବା ପାଇଁ ସିଧାସଳଖ ଆଲୋଚନା କରିବାକୁ ଅପିଲ କରିଥିଲେ । ଏହା ପୂର୍ବରୁ ଋଷ ମାରିୟୁପୋଲ ସହରରେ ଏକ ସ୍କୁଲ ବିଲ୍ଡିଂ ଉପରେ ଜୋରଦାର ଆକ୍ରମଣ କରିଛି ।
ୟୁକ୍ରେନ ଅଭିଯୋଗ କରିଛି ଯେ, ଏହି ସ୍କୁଲରେ ୪୦୦ ଯୁଦ୍ଧ ପୀଡିତ ଶରଣ ନେଇଥିଲେ । ଋଷର ମିଜାଇଲ ମାଡ଼ ରେ ସ୍କୁଲ ବିଲ୍ଡିଂଟି ଭୁଶୁଡି ପଡିଥିଲା ।ଏବଂ ଏଠାରେ ଆଶ୍ରୟ ନେଇଥିବା ଲୋକ ମାଟି ତଳେ ଦବି ହୋଇରହିଥିବା ଆଶଙ୍କା କରାଯାଉଛି । ଋଷ ସେନା ମାରିୟୁପୋଲଠୁ ନେଇକି କିବ୍, ଖାରକିଭ୍, ଏବଂ ଡୋନେସ୍ତକଠୁ ନେଇକି ଲୁହାନସ୍କ ଯାଏଁ ବୋମାମାଡ଼ କରିଛନ୍ତି । ୟୁକ୍ରେନର ସ୍ଥାନୀୟ ମିଡିଆ ଓ ପ୍ରଶାସନିକ ଅଧିକାରୀଙ୍କ ଦ୍ୱାରା ଯେଉଁ ଫଟୋ ଜାରି କରାଯାଇଛି । ଫଟୋରେ ଲୋକଙ୍କ ଅବସ୍ଥା ଅତ୍ୟନ୍ତ ଦୟନୀୟ ଥିବା ନଜର ଆସୁଛି ।