୩୧ ଦିନରେ ଧ୍ୱଂସବିଧ୍ୱସ୍ତ ହୋଇଗଲା ଖାରକିଭ୍, ଖାଦ୍ୟ,ପାଣି ପାଇଁ ଡହଳବିକଳ ଲୋକ
ଋଷ-ୟୁକ୍ରେନ ମଧ୍ୟରେ ଯୁଦ୍ଧ ଗତ ୩୧ ଦିନରୁ ଜାରି ରହିଛି । ଋଷ ପକ୍ଷରୁ ୟୁକ୍ରେନ ଉପରେ ପ୍ରଚଣ୍ଡ ଆକ୍ରମଣ କରାଯାଇଛି । ୟୁକ୍ରେନର ବହୁ ସହର ଧ୍ୱଂସବିଧ୍ୱସ୍ତ ହୋଇଯାଇଛି। ୟୁକ୍ରେନର ଅଧିକାରୀଙ୍କ ତରଫର ଦାବି କରାଯାଇଛି ଯେ, ଋଷ ସେନା ନିକଟରେ ମାରିୟୁପୋଲ ଥିଏଟର ଉପରେ ଏୟାର ଷ୍ଟ୍ରାଇକ କରିଛନ୍ତି। ଥିଏଟର ଉପରେ ହୋଇଥିବା ଏହି ଆକ୍ରମଣରେ ପାଖାପାଖି ୩୦୦ ଲୋକଙ୍କ ମୃତ୍ୟୁ ହୋଇଛି । ଥିଏଟରରେ ୮୦୦ରୁ ୧୩୦୦ ଲୋକ ଆଶ୍ରୟ ନେଇଥିଲେ । ଏହି ଥିଏଟରକୁ ଲୋକେ ଆଶ୍ରୟ ସ୍ଥଳ ଭାବେ ବ୍ୟବହାର କରୁଥିଲେ ।
ଏତିକି ହିଁ ନୁହେଁ ଏବେ ୟୁକ୍ରେନରେ ଖାଦ୍ୟ ସଙ୍କଟ ବି ଦେଖାଦେଲାଣି । ୟୁକ୍ରେନ ରାଷ୍ଟ୍ରପତି ବୋଲଡିମିର ଜେଲେନସ୍କି କହିଛନ୍ତି, ମାରିୟୁପୋଲରେ ଏବେ ପ୍ରାୟ ୧ ଲକ୍ଷ ଲୋକ ଏବେ ଖାଦ୍ୟ ଓ ପାଣି ବିନା ପଡିରହିଛନ୍ତି । ଭୋକରେ ଆଉଟପାଉଟ ହେଉଛନ୍ତି । କିନ୍ତୁ ଋଷ ସେମାନଙ୍କ ନିକଟରେ ମାନବୀୟ ସହାୟତା ପହଞ୍ଚାଇବାକୁ ଦେଉନାହିଁ ।
ଏଜେନ୍ସିର ରିପୋର୍ଟ ଅନୁସାରେ, ଋଷ ପକ୍ଷରୁ ସବୁଠୁ ଅଧିକ ଆକ୍ରମଣ କିଭ୍ ଓ ଖାରକିଭ୍ ଉପରେ କରାଯାଇଛି । ଖାରକିଭ୍ର ସ୍ଥିତି ବହୁତ ଦୟନୀୟ ହୋଇପଡିଛି । ଏଠାରେ ଏବେ ଖାଦ୍ୟ ଅଭାବ ଦେଖାଦେଇଛି । ଖାଇବା ପାଇଁ ଲୋକ ଲମ୍ବା ଧାଡିରେ ଛିଡା ହେଉଛନ୍ତି । ଖାରକିଭରେ ଲଗାତର ଆକ୍ରମଣ ଯୋଗୁଁ ଲୋକ ମେଟ୍ରୋରେ ଶରଣ ନେଇଛନ୍ତି ।