ଭୁବନେଶ୍ୱର ଝାରପଡା ଗଣେଶ ମଣ୍ଡପ ହାଟ ଉଚ୍ଛେଦ ପରେ କ୍ଷତିଗ୍ରସ୍ତ ବ୍ୟବସାୟୀଙ୍କୁ ଭେଟିଛନ୍ତି ସାଂସଦ ଅପରାଜିତା ଷଡଙ୍ଗୀ । କ୍ଷତିଗ୍ରସ୍ତ ବ୍ୟବସାୟୀଙ୍କୁ ଭେଟିବା ପରେ ସେ ବିଏମସିକୁ ଟାର୍ଗେଟ କରିଛନ୍ତି । କହିଛନ୍ତି ବିକାଶ ନୁହେଁ ବିନାଶରୁ ନୁଆ ଇନିଂସ ଆରମ୍ଭ କରୁଛି ବିଏମସିର ମହାନଗର ନିଗମ । ସକରାତ୍ମକ ମନୋବୃତ୍ତି ଛାଡି ନକରାତ୍ମକ ଚିନ୍ତାଧାରା ଆପଣାଉଛି ।
ଅପରାଜିତା ଗଣମାଧ୍ୟମ ଆଗରେ କହିଛନ୍ତି, ଯେ ପ୍ରଥମେ ଥଇଥାନ ଓ ପରେ ଉଚ୍ଛେଦ କରିବା କଥା । କିନ୍ତୁ ବ୍ୟବସାୟୀଙ୍କୁ ଥଇଥାନ ନକରି ଉଚ୍ଛେଦ କରାଯାଇଛି । କିନ୍ତୁ ରାତାରାତି ୪୩୦ ଲୋକଙ୍କୁ ବାସଚ୍ୟୁତ କରାଗଲା । ସେମାନେ ଜୀବିକା ହରାଇଲେ । ସେ ଏନେଇ ବିଏମସିକୁ ଚିଠି ଲେଖିବେ । ବ୍ୟବସାୟ କରିବା ପାଇଁ କ୍ଷତିଗ୍ରସ୍ତଙ୍କୁ ଜାଗା ଦେବାକୁ ସେ ଦାବି କରିବେ ବୋଲି କହିଛନ୍ତି ।
ସେ କହିଛନ୍ତି, ଭୁବନେଶ୍ୱର ବିକାଶ ହେଉ, ସୁନ୍ଦର ଦେଖାଯାଉ ଏହା ସମସ୍ତଙ୍କ ଦାୟିତ୍ୱ । କିନ୍ତୁ ବିକାଶ ,ସୌନ୍ଦର୍ଯ୍ୟକରଣ କଥା ଉଠିଲେ ଲୋକଙ୍କ ସୁବିଧାକୁ ସର୍ବୋଚ୍ଚ ପ୍ରାଥମିକତା ଦେବା କଥା । ହେଲେ ଏହି ହାଟ ଉଚ୍ଚେଦ ହେବା ପରେ ବହୁ ଲୋକ ସେମାନଙ୍କର ଜୀବିକା ହରାଇଛନ୍ତି । ଝାରପଡା ହାଟ ମାର୍କେଟ ବିଲ୍ଡିଂ ହେଲେ ସେମାନଙ୍କୁ ପ୍ରଥମେ ଥଇଥାନ କରିବା ଆବଶ୍ୟକ । ଆସନ୍ତା ୭ ଦିନ ଭିତରୁ ବ୍ୟବସାୟୀଙ୍କୁ ବିକଳ୍ପ ଜାଗା ଦିଆଯାଉ ବୋଲି ଅପରାଜିତା ଦାବି କରିଛନ୍ତି ।