ସଇତାନ ସାଜିଲା ଭାଇ । ଜମିଜମା ବିବାଦରୁ ଚାଲିଗଲା ଜୀବନ । ବଡ଼ ଭାଇର ପୁରା ପରିବାରକୁ ମାରି ସଫା କରିଦେଲା ସାନ ଭାଇ । ବଡ଼ ଭାଇର ପରିବାରର ୫ ଜଣଙ୍କୁ ହତ୍ୟା କରି ଥାନାରେ ଆତ୍ମସମର୍ପଣ କରିଛି ସାନ ଭାଇ । କଟକ ମାହାଙ୍ଗାରେ ଏଭଳି ଗଣହତ୍ୟା ଘଟିଛି । ଏହି ହତ୍ୟାକାଣ୍ଡ ପରେ କଟକ ବାଲିଚନ୍ଦ୍ରପୁର ଥାନା ଅନ୍ତର୍ଗତ କେଶପୁର ଗାଁରେ ପୁରା ଚାଞ୍ଚଲ୍ୟ ଖେଳିଯାଇଛି । ମୃତକ ହେଲେ ଅଲେଖ ସାହୁ, ସ୍ତ୍ରୀ ରଶ୍ମି ସାହୁ, ଝିଅ ପାଏଲ, ପୁଅ ଗୁଡୁ ଓ ଟୁବୁ ।
ଖବର ଅନୁଯାୟୀ କିଛି ଦିନ ପୂର୍ବେ ଦୁଇ ଭାଇଙ୍କ ମଧ୍ୟରେ ଜମିବାଡି ବିବାଦକୁ ନେଇ ପାଟିତୁଣ୍ଡ ହୋଇଥିଲା । ସେପଟେ ହତ୍ୟା କରିବା ପରେ ସାନ ଭାଇ ବାଲିଚନ୍ଦ୍ରପୁର ଥାନାରେ ଆତ୍ମସମର୍ପଣ କରିଛି । ସେ ହତ୍ୟା କରିଥିବା ଭିଡିଓରେ ସ୍ୱୀକାର କରିଛି । ହତ୍ୟା କରିବା ପରେ ଭିଡିଓରେ ସାନ ଭାଇ କହୁଛି, ମୁଁ ଶିବ ପ୍ରସାଦ କହୁଛି । ପାରିବାରିକ କଳହ ସକାଶେ ମୋର ଭାଇଙ୍କ ସହ ତିକ୍ତତା ଲାଗି ରହିଥିଲ।। ସେମାନେ ମୋତେ କାଲି ରାତିରେ ସମସ୍ତେ ମିଶି ବାଡେଇଲେ । ମୁଁ ମାନସିକ ସ୍ଥିତି ହରାଇ ବସିଲି । ମୁଁ ବି ରାଗିକି ସେମାନଙ୍କୁ ଜୀବନରେ ମାରିଦେଲି’ । ଏହି ଭିଡିଓରୁ ସ୍ପଷ୍ଟ ହୋଇଯାଇଛି ଶିବ ପ୍ରସାଦ ତା ବଡ଼ଭାଇ ପରିବାରକୁ ମାରି ସଫା କରିଦେଇଛି ।