ଅଷ୍ଟ୍ରେଲିଆ; ଆରମ୍ଭ ହୋଇଛି ଟି-୨୦ ମହାକୁମ୍ଭ । ଆଇସିସି ବିଶ୍ୱକପର ଏହା ୮ମ ସଂସ୍କରଣ ହୋଇଥିବା ବେଳେ ଆସନ୍ତା ନଭେମ୍ବର ୧୩ ତାରିଖ ଯାଏଁ ଏହି ଟି-ଟ୍ୱେଣ୍ଟି କ୍ରିକେଟ୍ ଚାଲିବ। ଅଷ୍ଟ୍ରେଲିଆର ୭ଟି ଷ୍ଟାଡିୟମରେ ଖେଳାଯିବାକୁ ଥିବା ଏହି ଟୁର୍ଣ୍ଣାମେଣ୍ଟରେ ମୋଟ ୧୬ଟି ଦେଶ ଭାଗ ନେବେ । ଆଜି ଶ୍ରୀଲଙ୍କା ଏବଂ ନାମ୍ବିଆ ମଧ୍ୟରେ ସକାଳ ସାଢେ ୯ଟାରେ ମ୍ୟାଚ ଆରମ୍ଭ ହୋଇଥିବା ବେଳେ ଶ୍ରୀଲଙ୍କାକୁ ମାତ୍ ଦେଇଛି ନାମ୍ବିଆ ।
ସେପଟେ ଆଇସିସି ପକ୍ଷରୁ ଟି-୨୦ ବିଶ୍ୱକପ ପାଇଁ ଘୋଷଣା କରାଯାଇଛି ଭାଷ୍ୟକାର ପ୍ୟାନେଲ । ଏହି ଟି-୨୦ ବିଶ୍ୱକପ ପାଇଁ ୨୯ ଜଣିଆ ଭାଷ୍ୟକାର ତାଲିକା ଘୋଷଣା ହୋଇଥିବା ବେଳେ ଭାରତରୁ ୩ ଜଣଙ୍କୁ ସ୍ଥାନ ମିଳିଛି । ଭାରତର ହର୍ଷ ଭୋଗଲେ, ସୁନୀଲ ଗାଭାସ୍କର ଓ ରବି ଶାସ୍ତ୍ରୀଙ୍କୁ ଟି-୨୦ ବିଶ୍ୱକପରେ ଭାଷ୍ୟକାର ଭୂମିକାରେ ଅବତୀର୍ଣ୍ଣ ହେବେ । ସେହିଭଳି ଏହି ତାଲିକାରେ ସଦ୍ୟ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିବା ଇଆନ ମୋର୍ଗାନ, ଡେଲ ଷ୍ଟେନ, ନିଲ ଓ ବ୍ରାଏନଙ୍କୁ ଦେଖିବାକୁ ମିଳିବ ।
ଅନ୍ୟ ଖେଳାଳୀଙ୍କ ମଧ୍ୟରେ ଇଆନ ବିଶପ, ଆଡାମ ଗିଲକ୍ରିଷ୍ଟ, ଇସା ଗୁହା, ରସେଲ ଆର୍ନୋଲଡ, ବାର୍ଥୱେଟ୍, ସାମୁଏଲ ବଦ୍ରି, ମାଇକେଲ କ୍ଲାର୍କ, ସନ ପୋଲକ, ସେନ ୱାଟସନ, ଡାର୍କ ନାନିଜ, ନାସିର ହୁସେନ ରହିଛନ୍ତି । ତେବେ ଏହି ବିଶ୍ୱକପରେ ସବୁଠୁ ଅଧିକ ରୋମାଞ୍ଚ ଭରିବ ଭାରତ-ପାକିସ୍ତାନ ଟକ୍କର । ଆସନ୍ତା ଅକ୍ଟୋବର ୨୩ରେ ମେଲ୍ବର୍ଣ୍ଣରେ ଖେଳାଯିବ ଏହି ହାଇଭୋଲଟେଜ ମୁକାବିଲା ।