ନୂଆଦିଲ୍ଲୀ: ଦୀପାବଳି ପୂର୍ବରୁ ଚାଷୀଙ୍କ ପାଇଁ ଆସିଲା ଖୁସି ଖବର । ରବି ଫସଲର ଏମଏସ୍ପି ବୃଦ୍ଧି କଲେ କେନ୍ଦ୍ର ସରକାର । ୨୦୨୩-୨୪ରେ ଏହି ବର୍ଦ୍ଧିତ ଏମଏସ୍ପି ଦାମରେ ସରକାର ଚାଷୀଙ୍କଠାରୁ ସାମଗ୍ରୀ କିଣିବେ । ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟ ବୈଠକରେ ଏମଏସ୍ପି ବୃଦ୍ଧି ଉପରେ ନିଷ୍ପତ୍ତି ନିଆଯାଇଛି । ଏ ନେଇ କେନ୍ଦ୍ରମନ୍ତ୍ରୀ ଅନୁରାଗ ଠାକୁର ସୂଚନା ଦେଇଛନ୍ତି । ତେବେ ସରକାର ଗହମର ଏମଏସ୍ପି କ୍ୱିଣ୍ଟାଲ ପିଛା ୧୧୦ ଟଙ୍କା ବଢ଼ାଇଛନ୍ତି। ଯାହା ୨୦୨୨-୨୩ରେ ଗହମର କ୍ୱିଣ୍ଟାଲ ପିଛା ଏମଏସ୍ପି ୨୦୧୫ ଟଙ୍କା ଥିଲା । ଏବେ ଏହା ୨୧୧୫ ଟଙ୍କା ହୋଇଛି ।
ସେହିପରି ଗହମ ବ୍ୟତୀତ ବିଭିନ୍ନ ଖାଦ୍ୟଶତ୍ସ୍ୟର ଏମଏସ୍ପି ବୃଦ୍ଧି କରାଯାଇଛି । ସୋରିଷର ଏମଏସ୍ପି କ୍ୱିଣ୍ଟାଲ ପିଛା ୪୦୦ ଟଙ୍କା ବୃଦ୍ଧି ହୋଇଛି । ୨୦୨୨-୨୩ରେ ଗୋଟିଏ କ୍ୱିଣ୍ଟାଲ ସୋରିଷର ଦାମ ୫୦୫୦ ଟଙ୍କା ଥିଲା । ଏବେ ତାହା ବୃଦ୍ଧି ପାଇ ୫,୪୫୦ ଟଙ୍କା ହୋଇଛି । ଅନ୍ୟପଟେ ମସୁର ଡାଲିର ଏମଏସ୍ପି ୫୦୦ ଟଙ୍କା ବଢ଼ିଛି । ମସୁଲ ଡାଲିର ଦାମ କ୍ୱିଣ୍ଟାଲ ପିଛା ଦାମ ୫,୫୦୦ ଟଙ୍କା ଥିଲା ଏବେ ୬୦୦୦ ଟଙ୍କାରେ ପହଞ୍ଚିଛି । ସେହିପରି ବାର୍ଲିର ଏମଏସପି ୧୦୦ ଟଙ୍କା, ସୂର୍ଯ୍ୟମୁଖୀର ଏମଏସ୍ପି ୨୦୯ ଟଙ୍କା ଓ ବିରିର ଏମଏସ୍ପି ୧୦୫ ଟଙ୍କା ବୃଦ୍ଧି ପାଇଛି । ଗହମ ଉପରେ ଏମଏସ୍ପି ୫.୬୪%, ବଢ଼ିଥିବା ବେଳେ ସୋରିଷର ଦାମ ୯% ବୃଦ୍ଧି କରାଯାଇଛି । ବର୍ଦ୍ଧିତ ଦର ପରେ ଚାଷୀମାନେ ବାର୍ଲି ପାଇଁ କ୍ୱିଣ୍ଟାଲ ପିଛା ୧୭୩୫ ଟଙ୍କା, ବିରି ପାଇଁ କ୍ୱିଣ୍ଟାଲ ପିଛା ୧୭୩୫ ଟଙ୍କା ଓ ସୂର୍ଯ୍ୟମୁଖୀ ପାଇଁ କ୍ୱିଣ୍ଟାଲ ପିଛା ୫,୬୫୦ ଟଙ୍କା ପାଇବେ। ତେବେ ଏହି ଏମଏସ୍ପି ବୃଦ୍ଧି ଚାଷୀଙ୍କ ପାଇଁ ଖୁସି ଆଣିବା ନେଇ ଚର୍ଚ୍ଚା ହେଉଛି ।