ଆମେରିକା; ଜାଣିଛନ୍ତି କି ଦୁନିଆର ସବୁଠୁ ଦାମୀ ଔଷଧ ବିଷୟରେ । ଏହି ଔଷଧର ଦାମ୍ ଶୁଣିଲେ ପ୍ରାୟ ସମସ୍ତଙ୍କ ହୋସ୍ ଉଡିଯିବ । ଆମେରିକାର ଫେଡେରାଲ ଡ୍ରଗ୍ ଆଡମିନିଷ୍ଟ୍ରେସନ ଏକ ଔଷଧକୁ ଦୁନିଆର ସବୁଠୁ ଦାମି ଔଷଧର ମାନ୍ୟତା ଦେଇଛନ୍ତି । ସେହି ଔଷଧର ନାଁ ହେଉଛି ‘ହେମଜେନିକ୍ସ’ । ଯାହାର ଗୋଟିଏ ଡୋଜ ପିଛା ୩.୫ ମିଲିୟନ୍ ଡଲାର ଅର୍ଥାତ୍ ଭାରତୀୟ ମୂଲ୍ୟ ଅନୁଯାୟୀ ଏହା ପ୍ରାୟ ୨୮ କୋଟି ଟଙ୍କା ହେବ । ଏହି ଔଷଧ ହିମୋଫେଲିଆ-ବି ରୋଗରେ ପୀଡିତ ଥିବା ରୋଗୀଙ୍କୁ ଦିଆଯାଏ । ହେମୋଫିଲିଆ ହେଉଛି ରକ୍ତସ୍ରାବ ଜନିତ ରୋଗ । ଏହା ଏକ ଜେନେଟିକ୍ ରୋଗ ଏବଂ ବହୁତ କମ୍ ଲୋକଙ୍କଠାରେ ଦେଖାଯାଏ । ଏହି ରୋଗ ହେତୁ ଶରୀରରେ ରକ୍ତ ଜମାଟ ବାନ୍ଧିବା ପ୍ରକ୍ରିୟା ମନ୍ଥର ହୋଇଯାଏ ଏବଂ ଥରେ ରକ୍ତ ପ୍ରବାହ ଆରମ୍ଭ ହେଲେ ଏହା ଶୀଘ୍ର ବନ୍ଦ ହୋଇନଥାଏ । ଏପରି ପରିସ୍ଥିତିରେ, ଯଦି ବ୍ୟକ୍ତିକୁ ଠିକ୍ ସମୟରେ ଚିକିତ୍ସା କରା ନ ଯାଏ, ତେବେ ସେ ମୃତ୍ୟୁମୁଖକୁ ମଧ୍ୟ ଚାଲିଯାଇଥାନ୍ତି ।
ରିପୋର୍ଟ ଅନୁଯାୟୀ ଏହି ରୋଗ ମହିଳାଙ୍କ ଅପେକ୍ଷା ପୁରୁଷମାନଙ୍କଠାରେ ଅଧିକ ଦେଖାଯାଏ । ଭାରତରେ ଜନ୍ମିତ ପ୍ରତି ୫୦୦୦ ପୁରୁଷଙ୍କ ମଧ୍ୟରୁ ଜଣେ ହେମୋଫିଲିଆ ଦ୍ୱାରା ପ୍ରଭାବିତ ହୋଇଥାନ୍ତି । ଅର୍ଥାତ୍ ପ୍ରତିବର୍ଷ ଆମ ଦେଶରେ ପ୍ରାୟ ୧୩୦୦ ପିଲା ହେମୋଫିଲିଆ ସହିତ ଜନ୍ମ ହୁଅନ୍ତି । ଗ୍ଲୋବାଲ୍ ନ୍ୟୁଜ୍ ରିପୋର୍ଟ ଅନୁଯାୟୀ, ଦେଶରେ ହେମୋଫିଲିଆ-ବି ପାଇଁ ଏହା ହେଉଛି ପ୍ରଥମ ଜିନ୍ ଥେରାପି । ବୈଜ୍ଞାନିକଙ୍କ କହିବା କଥା ହେଲା ଏହି ଔଷଧ ରୋଗକୁ ଠିକ୍ କରିଥାଏ । ରୋଗକୁ ଆଖି ଆଗରେ ରଖି ଏହି ମେଡିସିନ ତିଆରି କରାଯାଇଛି।