ଭୁବନେଶ୍ବର; ଆଜି କାଳବୈଶାଖୀ ବର୍ଷା ପାଇଁ ୧୭ଟି ଜିଲ୍ଲାକୁ ସତର୍କତା ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ସେହିପରି ପୂରା ଓଡ଼ିଶାକୁ ୟେଲୋ ଆଲର୍ଟ ଜାରି କରାଯାଇଛି । କେନ୍ଦୁଝର, ମୟୁରଭଞ୍ଜ, ବାଲେଶ୍ବର, ଭଦ୍ରକ, ଯାଜପୁର, ଅନୁଗୁଳ, ଢେଙ୍କାନାଳ, କଟକ, ଜଗତସିଂହପୁର, ଖୋର୍ଦ୍ଧା, ନୟାଗଡ ଏବଂ କେନ୍ଦ୍ରାପଡାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ବର୍ଷା ସମୟରେ ଘଣ୍ଟାପ୍ରତି ୪୦ ରୁ ୫୦ କିଲୋମିଟର ବେଗରେ ପବନ ବହିବ । ଆସନ୍ତାକାଲି ବର୍ଷାର ପରିମାଣ କମିଲେ ମଧ୍ୟ ଉତ୍ତର ଓଡ଼ିଶାରେ ପ୍ରଭାବ ରହିବ । ଏଥିପାଇଁ ୬ଟି ଜିଲ୍ଲାକୁ ସତର୍କତା ଜାରି କରାଯାଇଛି । ୨୧ ଏବଂ ୨୨ ତାରିଖ ବେଳକୁ ପଶ୍ଚିମା ଝଡର ପ୍ରଭାବ କମିବା ସହ ତାପମାତ୍ରା ବୃଦ୍ଧି ହେବ । ୩ ରୁ ୪ ଡିଗ୍ରୀ ତାପମାତ୍ରା ବଢିବ ବୋଲି ଆକଳନ କରାଯାଇଛି ।
ସୂଚନାଯୋଗ୍ୟ, ଗତକାଲି ପଶ୍ଚିମାଝଡ଼ ବର୍ଷାରେ ମାଲକାନଗିରିର ଏମପିଭି ୪୧ ଗାଁରେ ବ୍ୟାପକ କ୍ଷୟକ୍ଷତି ହୋଇଛି। ପ୍ରବଳ ଝଡ଼ ବର୍ଷା ପାଇଁ ଗାଁର ୧୦ରୁ ଅଧିକ ଘର ଭାଙ୍ଗିଯାଇଥିବା ସୂଚନା ରହିଛି । ଅନେକ ଲୋକଙ୍କ ଘରେ ବର୍ଷା ପାଣି ପଶିବା ଫଳରେ ଧାନ ଚାଉଳ ସହ ବହୁ ଜିନିଷ ପତ୍ର ନଷ୍ଟ ହୋଇଛି । ବହୁ ସ୍ଥାନରେ ବର୍ଷା ହେବା ଫଳରେ ଖୁସି ହୋଇଥିବାବେଳେ ବହୁ ସ୍ଥାନରେ ବର୍ଷା ଭାଙ୍ଗି ଦେଇଛି ଲୋକଙ୍କ ମେରୁଦଣ୍ଡ । ଘର ଭାଙ୍ଗିବା ସହ ଘରେ ପାଣି ପଶିବାରୁ ଲୋକେ ବହୁ ହଇରାଣ ହୋଇଛନ୍ତି । ଏବେ ବି ଜାରି ରହିଛି ପ୍ରବଳ ବର୍ଷା ।
ସେହିପରି ପ୍ରବଳ ବର୍ଷାରେ କୋରାପୁଟ ପଟ୍ଟାଙ୍ଗି ଚନ୍ଦକା ଗ୍ରାମପଞ୍ଚାୟତର ତଳକରାଢାବା ଗାଁରେ ୫ଟି ଘର ସଂପୂର୍ଣ୍ଣ ଭାଙ୍ଗିଯାଇଛି । ଏପଟେ ବାଲେଶ୍ୱରରେ ବି ପଶ୍ଚିମା ଝଡ ପ୍ରଭାବରେ ଘଡଘଡି ସହ ପ୍ରବଳ ବର୍ଷା ଓ କୁଆପଥର ମାଡ ହୋଇଛି । ପ୍ରବଳ ବର୍ଷା ଓ ପବନରେ ବସ ଉପରେ ଗଡ ପଡିଛି ଗଛ । ନୀଳଗିରି ଅଯୋଧ୍ୟା ପଞ୍ଚାୟତର ରେ ବଜ୍ରପାତରେ ଯାଇଛି ୧୬ରୁ ଅଧିକ ଗୋରୁଙ୍କ ଜୀବନ । ହଠାତ ବର୍ଷା ହେବାରୁ ୩୦ଟି ଗାଇ ଏକ ଅର୍ଧନିର୍ମିତ ଦୋକାନ ଘରେ ପଶିଯାଇଥିଲେ । ଆଉ ହଠାତ ବଜ୍ରପାତ ହୋଇଥିଲା । ପଶ୍ଚିମାଝଡ ପ୍ରଭାବରେ ଭୁବନେଶ୍ୱରରେ ବି ପବନ ସହ ବର୍ଷା ହୋଇଛି । ଗତକାଲି ସନ୍ଧ୍ୟାରେ ପାଗ ଅନୁକୂଳ ଥିବାବେଳେ ହଠାତ ପବନ ହୋଇଥିଲା । ବର୍ଷା ବି ସାମାନ୍ୟ ହୋଇଛି । ପବନ ସହ ବର୍ଷା ଯୋଗୁଁ ତାତିରୁ ସାମୟିକ ଆଶ୍ୱସ୍ତି ମିଳିଛି ।