ଭୁବନେଶ୍ବର: ପୂର୍ବାନୁମାନ ଅନୁଯାୟୀ ଆଜି ଦକ୍ଷିଣ – ପୂର୍ବ ବଙ୍ଗୋପସାଗର ନିକଟସ୍ଥ ଅଞ୍ଚଳ ରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇଛି। ଆସନ୍ତା ୪୮ ଘଣ୍ଟା ମଧ୍ୟରେ ଏହା ଲଘୁଚାପ ଓ ପରେ ଆହୁରି ଘନିଭୂତ ହୋଇ ୯ ରେ ଡିପ୍ରେସନ୍ ର ରୂପ ନେଇ ଉତ୍ତର ଦିଗ ରେ ଅଗ୍ରସର ହୋଇ କେନ୍ଦ୍ରୀୟ ବଙ୍ଗୋପସାଗର ଆଡ଼କୁ ଗତି କରିବ ଓ ପରବର୍ତ୍ତୀ ସମୟ ରେ ବାତ୍ୟା ରୂପ ନେବାର ସମ୍ଭାବନା ରହିଛି। ବର୍ତ୍ତମାନ ଉପଗ୍ରହ ଚିତ୍ର ରୁ ମିଳିଥିବା ସୂଚନା ଅନୁଯାୟୀ ଦକ୍ଷିଣ ବଙ୍ଗୋପସାଗର ଅଞ୍ଚଳ ରେ ବାଦଲ ଗୁଡ଼ିକ ସୃଷ୍ଟି ହୋଇ ସଂଗଠିତ ହେଉଛନ୍ତି।
ତେବେ ଏହି କ୍ଷେତ୍ର ର ତୀବ୍ରତା ଓ ଗତିପଥ କୁ ବିଭିନ୍ନ ମଡେଲ ମାନଙ୍କ ଆକଳନ ଭିନ୍ନ ଭିନ୍ନ ରହିଛି। କିଛି ମଡେଲ ଙ୍କ ଆକଳନ ଅନୁଯାୟୀ ଏହି କ୍ଷେତ୍ର ବାତ୍ୟା / ଭୀଷଣ ବାତ୍ୟା ରୂପରେ ୧୨-୧୩ ବେଳକୁ ମିଆଁମାର ରେ ସ୍ଥଳଭାଗ ଅତକ୍ରମ କରିପାରେ। ତେବେ ସିଷ୍ଟମ୍ ଟି ଲଘୁଚାପ/ ଡିପ୍ରେଶନ ରେ ପରିଣତ ହୋଇ କେନ୍ଦ୍ରୀୟ ବଙ୍ଗୋପସାଗର ରେ ପହଞ୍ଚିବା ପରେ ଏ ସମ୍ପର୍କ ରେ ସ୍ପଷ୍ଟ ସୂଚନା ମିଳିପାରିବ।
ତେବେ ଓଡ଼ିଶା ରେ ଆସନ୍ତା ୪-୫ ଦିନ ଯାଏଁ ଦିନ ତାପମାତ୍ରା କ୍ରମଶଃ ବୃଦ୍ଧି ହେବାର ସମ୍ଭାବନା ରହିଛି। ଅଳ୍ପ କିଛି ଅଞ୍ଚଳ ରେ ବର୍ଷା ର ପ୍ରଭାବ ରହିପାରେ।
ପୂର୍ବାନୁମାନ – ସାର୍ଥକ ମିଶ୍ର