ବ୍ରହ୍ମଗିରି: ଏସିଆ ମହାଦେଶର ସବୁଠୁ ବଡ଼ ଖାର ପାଣି ହ୍ରଦ ‘ଚିଲିକା’ରେ ଆସନ୍ତାକାଲି ଶନିବାର ଇରାୱାଡି ଡଲଫିନ୍ଙ୍କ ଗଣନା କରାଯିବ। ପୁରୀ ଜିଲ୍ଲା ସାତପଡ଼ାରେ ଇରାୱାଡି ଡ଼ଲଫିନ୍ଙ୍କ ଗଣନା ପାଇଁ ମୋଟ ୧୮ଟି ଟିମ୍ ନିୟୋଜିତ ହେବେ। ଏହି ଟିମ୍ରେ ଥିବା ସଦସ୍ୟମାନେ ଚିଲିକାର ୪ଟି ଅଞ୍ଚଳକୁ ଯାଇ ଡ଼ଲଫିନ ଗଣତି କରିବେ ବୋଲି ବନ ବିଭାଗ ପକ୍ଷରୁ ଗଣମାଧ୍ୟମକୁ ସୂଚନା ଦିଆଯାଇଛି।
ପ୍ରତିବର୍ଷ ଭଳି ଚଳିତ ବର୍ଷ ସମଗ୍ର ଚିଲିକା ବନ୍ୟପ୍ରାଣୀ ବନଖଣ୍ଡ ଡିଭିଜନ ( ବାଲୁଗାଁ ) ଅଧିନରେ ଥିବା ୫ ଟି ରେଞ୍ଜ୍ ଇଲାକାରେ ଏହି ଡଲଫିନ୍ ଗଣନା କରାଯିବ। ଚିଲିକା ଉନ୍ନୟନ କର୍ତ୍ତୃପକ୍ଷ (ସିଡିଏ) ସହଯୋଗରେ ଖୋର୍ଦ୍ଧା ଜିଲ୍ଲା ବାଲୁଗାଁ ବନ୍ୟପ୍ରାଣୀ ବନଖଣ୍ଡ ପକ୍ଷରୁ ଆଜି ସାତପଡ଼ାସ୍ଥିତ ସିଡିଏ କାର୍ଯ୍ୟାଳୟରେ ପ୍ରଶିକ୍ଷଣ ଦିଆଯାଇଛି। ସେଣ୍ଟ୍ରାଲ ସେକ୍ଟରରେ ୬ଟି ଟିମ୍, ସାଉଥର୍ନ ସେକ୍ଟରରେ ୪ଟି ଟିମ୍, ନର୍ଦନ ସେକ୍ଟରେ ଗୋଟିଏ ଟିମ୍ ଓ ଆଉଟର ଚ୍ୟାନେଲରେ ୭ଟି ଟିମ୍ ଡଲ୍ଫିନ୍ ଗଣିବେ। ପ୍ରତ୍ୟକ ଟିମ୍ରେ ୮-୧୦ ଜଣ ସଦସ୍ୟ ରହିବେ। ଭୋର ୬ଟାରୁ ଆରମ୍ଭ ହୋଇ ଦିନ ୧୨ଟା ପର୍ଯ୍ୟନ୍ତ ଏହି ଗଣତି ଚାଲିବ। ଗଣତି ସମୟରେ ଚିଲିକାରେ ଭସାପୋଲ, ଘାଟଡ଼ଙ୍ଗା ଓ ପର୍ଯ୍ୟଟକଙ୍କ ଡ଼ଙ୍ଗା ଚଳାଚଳ ବନ୍ଦ ରହିବ।