ମୁମ୍ବାଇ: କିଛି ଦିନ ଏବେ ବଲିଉଡ ଦବଙ୍ଗ ହିରୋ ସଲମାନଙ୍କ ଖାନଙ୍କୁ ହତ୍ୟା ଧମକ ମିଳିଥିବା ବେଳେ ଏବେ ବଲିଉଡ୍ କିଙ୍ଗ ଶାହାରୁଖ ଖାନଙ୍କୁ ମିଳିଛି ହତ୍ୟା ଧମକ। ଶାହରୁଖ ଖାନଙ୍କୁ ଜଣେ ଦୁର୍ବୃତ୍ତ ଫୋନ କଲରେ ହତ୍ୟା ଧମକ ଦେଇଥିବା ମହାରାଷ୍ଟ୍ରର ବାନ୍ଦ୍ରା ଥାନାରେ ଲିଖିତ ଅଭିଯୋଗ ହୋଇଛି। ତେବେ କହିରଖୁଛୁ, ଏହି କଲ୍ ସିଧାସଳଖ ଶାହରୁଖଙ୍କୁ ଆସିନାହିଁ। ଦୁର୍ବୃତ୍ତ ଜଣଙ୍କ ବାନ୍ଦ୍ରା ପୋଲିସକୁ ଗତ ୫ ତାରିଖରେ କଲ କରି କହିଥିଲା, ଶାହରୁଖ ଖାନ୍ ମନ୍ନତରେ ରୁହେ ନା… ଯଦି ସିଏ ୫୦ ଲକ୍ଷ ଟଙ୍କା ନଦିଏ, ତେବେ ତାକୁ ମାରିଦେବି। ଯେତେବେଳେ ପୋଲିସ୍ ତାକୁ ତାର ନାଁ ପଚାରିଥିଲା, ସେତେବେଳେ ସେ ଜବାବ ଦେଇଥିଲା ମୋର ନାଁ କ’ଣ ତାହା ମୂଲ୍ୟ ରଖେ ନାହିଁ, ଯଦି ମୋ ନାଁ ଲେଖିବାକୁ ଚାହୁଁଛ, ତାହା ହେଲେ ହିନ୍ଦୁସ୍ଥାନୀ ଲେଖ ବୋଲି ସେ କହିଥିଲା। ଯାହାକୁ ନେଇ ଏବେ ପୂରା ବଲିଉଡ ଜଗତ ଏବଂ ଶାହରୁଖଙ୍କ ଫ୍ୟାନ୍ସ ଆଚମ୍ବିତ ହୋଇଯାଇଛନ୍ତି।
ସେପଟେ ବାନ୍ଦ୍ରା ପୋଲିସ୍ ନିଜ ଆଡୁ ଏକ ମାମଲା ରୁଜ୍ଜୁ କରି ଏନେଇ ତତ୍ପରତା ଦେଖାଇଛି। ବାନ୍ଦ୍ରା ପୁଲିସ ଷ୍ଟେସନରେ ଧାରା ୩୦୮(୪), ୩୫୧(୩)(୪) ବିଏନଏସ ଆଧାରରେ ମାମଲା ରୁଜୁ କରାଯାଇଛି। ଯେଉଁ ନମ୍ବରରୁ କଲ୍ ଆସିଥିଲା ତାହା ରାୟପୁରର ବୋଲି ଯାଞ୍ଚ ପରେ ଜଣାପଡିଥିଲା। ଏହାପରେ ଅଧିକ ତଦନ୍ତ ପାଇଁ ରାୟପୁରରେ ପହଞ୍ଚିଥିଲା ପୋଲିସ୍। ତେବେ ପ୍ରାଥମିକ ତଦନ୍ତରୁ ରାୟପୁରର ଫୈଜାନ ନାମକ ଜଣେ ଯୁବକ ଏହି ଧମକ ଦେଇଥିବା ପୋଲିସ୍ ଜାଣିବାକୁ ପାଇଥିଲା। କିନ୍ତୁ ଯେତେବେଳେ ପୋଲିସ୍ ସବୁ ତଥ୍ୟ ଅନୁଯାୟୀ, ଫୈଜାନ ନାମକ ବ୍ୟକ୍ତି ପାଖରା ପହଞ୍ଚିଥିଲା, ସେତେବେଳେ ଫୈଜାନର ବୟାନ ଏବେ ମାମଲାକୁ ନୂଆ ମୋଡ ଦେଇଛି। ତା’ର ଫୋନ୍ ନଭେମ୍ବର ୨ ତାରିଖରୁ ଚୋରି ହୋଇଯାଇଥିବା କଥା ସେ କହିଛି। ସେ କହିଛି, ଗତ ୫ ଦିନ ହେଲାଣି ତା’ର ଫୋନ୍ ଚୋରି ହୋଇଯାଇଛି।