କଳାହାଣ୍ଡି: ଓଲଟିଲା ବରଯାତ୍ରୀ ଗାଡି। ଏଥିରେ ଜଣଙ୍କ ମୃତ୍ୟୁ ହୋଇଥିବାବେଳେ ୬ ଜଣ ଆହତ ହୋଇଛନ୍ତି। ଆଜି ଭୋରରୁ କଳାହାଣ୍ଡି ଜିଲ୍ଲାର ୨୬ ନଂ ଜାତୀୟ ରାଜପଥ କୋକସରା ଥାନା ଅନ୍ତର୍ଗତ ଚିଲିଗୁଡା ଗାଁ ନିକଟରେ ଏହି ଦୁର୍ଘଟଣା ଘଟିଛି।
ଆଜି ଭୋରରେ ଏକ ବରଯାତ୍ରୀ ଗାଡି ଭାରସାମ୍ୟ ହରାଇ ୨୬ ନମ୍ୱର୍ ଜାତୀୟ ରାଜପଥର ଚିଲିଗୁଡା ଗାଁ ନିକଟରେ ଓଲଟି ପଡ଼ିଛି। ଘଟଣାସ୍ଥଳରେ ଗାଡି ଚାଳକ ଭଜନ କରଙ୍କ ମୃତ୍ୟୁ ହୋଇଥିବାବେଳେ ୬ ଜଣ ଗୁରୁତର ଆହତ ହୋଇଛନ୍ତି। ସ୍ଥାନୀୟ ଲୋକ ଓ ଅଗ୍ନିଶମ ବିଭାଗ କର୍ମଚାରୀଙ୍କ ସହାୟତାରେ ଗୁରୁତରଙ୍କୁ ଉଦ୍ଧାର କରି ପ୍ରଥମେ କୋକସରା ଡାକ୍ତରଖାନାରେ ଭର୍ତ୍ତି କରାଯାଇଥିଲା। ମୃତକ ଜଣକ ଜୁନାଗଡ଼ ଥାନା ବରଗାଁର ଭଜନ କର ବୋଲି ଜଣାପଡିଛି।
ଗୁରୁତର ମାନେ ସୁବାସ ଖମାରି, ବବିଲୁ ହରିଜନ, ସୁମନ୍ତ କର, ଧର୍ମରାଜ କର, ଅରୁପ ଖମାରି ତୋଫାନ ସୁନାନୀ ବୋଲି ସୂଚନା ମିଳିଛି। କୋକସରା ଡାକ୍ତରଖାନାରେ ପ୍ରାଥମିକ ଚିକିତ୍ସା ପରେ ସେମାନଙ୍କୁ ଏସଆରଏମ ଭେଷଜ ମହାବିଦ୍ୟାଳୟ ଅନ୍ତର୍ଗତ ଜିଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ମୃତାହତ ମାନେ ବରଗାଁରୁ ଛତିଶଗଡ଼ର କେରଣ୍ଡୁଲକୁ ବରଯାତ୍ରୀ ଯାଇ ଫେରୁଥିବା ବେଳେ ଦୁର୍ଘଟଣା ଘଟିଥିଲା। କୋକସରା ପୁଲିସ ଘଟଣାର ତଦନ୍ତ କରୁଛି।