ସମ୍ବଲପୁର: ସମ୍ବଲପୁରର ବୁର୍ଲାରେ ଥିବା ବୀର ସୁରେନ୍ଦ୍ର ସାଏ ଟେକ୍ନୋଲୋଜି ବିଶ୍ୱବିଦ୍ୟାଳୟ ର ଛାତ୍ରଛାତ୍ରୀଙ୍କ ପାଇଁ ନୂଆ ଡ୍ରେସକୋର୍ଡ ଲାଗୁ ହୋଇଛି । ୨୦୨୫-୨୬ ଶିକ୍ଷାବର୍ଷ ଠାରୁ ସମସ୍ତ ପ୍ରଥମ ବର୍ଷର ସ୍ନାତକ ଛାତ୍ରଙ୍କ ପାଇଁ ଏକ ବାଧ୍ୟତାମୂଳକ ୟୁନିଫର୍ମ ଡ୍ରେସ୍ କୋଡ୍ ଲାଗୁ ହୋଇଛି । କଲେଜ ପ୍ରଶାସନ ଦ୍ୱାରା ଜାରି କରାଯାଇଥିବା ଏହି ନିର୍ଦ୍ଦେଶନାମା ପୋଷାକକୁ ମାନକୀକରଣ କରିବା ଏବଂ କ୍ୟାମ୍ପସରେ ସୁରକ୍ଷା ବୃଦ୍ଧି କରିବା ଲକ୍ଷ୍ୟରେ ନିଆଯାଇଛି ବୋଲି କୁହାଯାଇଛି।
ତେବେ ଏହି ନିର୍ଦ୍ଦେଶାନାମା ଅନୁଯାୟୀ, ସ୍ନାତକୋତ୍ତର ଏବଂ ପିଏଚଡି ଛାତ୍ରମାନଙ୍କୁ ବାଦ ଦେଇ ଛାତ୍ର ଏବଂ ଛାତ୍ରୀ ଉଭୟଙ୍କ ପାଇଁ ଏକ ନିର୍ଦ୍ଦିଷ୍ଟ ୟୁନିଫର୍ମ ବାଧ୍ୟତାମୂଳକ କରାଯାଇଛି। ଯେଉଁଥିରେ ଛାତ୍ରମାନେ ଏକ ଆନୁଷ୍ଠାନିକ ନେଭି ବ୍ଲୁ ସାର୍ଟ ଏବଂ ନେଭି ବ୍ଲୁର ପ୍ୟାଣ୍ଟ ପିନ୍ଧିବେ। ସେହିପରି ଛାତ୍ରୀମାନେ ମଧ୍ୟ ନେଭି ବ୍ଲୁ ସାର୍ଟ ଏବଂ ପ୍ୟାଣ୍ଟ କିମ୍ବା ନେଭି ବ୍ଲୁର ସାଲୱାର-କମିଜ୍ ସହ ଏକ ଓ୍ବେଷ୍ଟ କୋର୍ଟ ପିନ୍ଧି ପାରିବେ। ତେବେ ସୁରକ୍ଷା ଦୃଷ୍ଟିରୁ ଛାତ୍ରୀ ମାନଙ୍କୁ ଓଢଣୀ ପରିଧାନ କରିବା ବାରଣ କରାଯାଇଛି।
ତେବେ ସାମ୍ପ୍ରତିକ ବର୍ଷଗୁଡ଼ିକରେ ଏହା ପ୍ରଥମ ଥର ଯେ ଭିସୁଟ ଏହାର ସ୍ନାତକ ଛାତ୍ରମାନଙ୍କ ପାଇଁ ଏକ ଡ୍ରେସ୍ କୋଡ୍ ଲାଗୁ କରିଛି, ଏବଂ ପ୍ରଶାସନ କହିଛି ଯେ ପାଳନ ନ କରିବା ଦ୍ୱାରା ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିଆଯିବ। ଯାହା ପିଲାଙ୍କ ମଧ୍ୟରେ ସମାନତା ଆଣିବା ସହ ଏକ ଶୃଙ୍ଖଳା ବନାଇବ ବୋଲି କହିଛନ୍ତି କଲେଜ ପ୍ରମୁଖ।
ଏଥିସହିତ କଲେଜ ଦ୍ୱାରା ଜାରି ହୋଇଥିବା ନୋଟିସରେ ଏହା ମଧ୍ୟ ସ୍ପଷ୍ଟ କରାଯାଇଛି ଯେ, ଛାତ୍ରଛାତ୍ରୀଙ୍କ ଦ୍ୱାରା ପ୍ରସ୍ତୁତ କଲେଜ ୟୁନିଫର୍ମର ରଙ୍ଗ ସମସ୍ତ ପ୍ୟାଣ୍ଟ, ସାଲୱାର ଏବଂ ଓ୍ବେଷ୍ଟକୋଟ୍ ନାଭି ବ୍ଲୁ ରଙ୍ଗର ହେବା ଆବଶ୍ୟକ, ଯେତେବେଳେ କି ସମସ୍ତ ସାର୍ଟ ଆକାଶୀ ନୀଳ ରଙ୍ଗର ହେବା ଆବଶ୍ୟକ। ଏଥିସହିତ କଲେଜ ପରିସରରେ ଜିନ୍ସ ଏବଂ ଦୁପଟା ପିନ୍ଧିବାକୁ କଡ଼ା ନିଷେଧ ଜାରି କରାଯାଇଛି । ପ୍ରଶାସନ ଦୁପଟା ନିଷେଧ କରିବାର କାରଣ ଭାବରେ ସୁରକ୍ଷା ଚିନ୍ତାକୁ ଦର୍ଶାଇଛି। ବିଶ୍ୱବିଦ୍ୟାଳୟ ଛାତ୍ରଛାତ୍ରୀମାନଙ୍କୁ ଅଗଷ୍ଟ ୨୦୨୫ ଶେଷ ସୁଦ୍ଧା ସେମାନଙ୍କର ୟୁନିଫର୍ମ ପ୍ରସ୍ତୁତ କରିବା ସହ ଏବଂ ନିୟମ ପାଳନ ସୁନିଶ୍ଚିତ କରିବାକୁ ପରାମର୍ଶ ଦେଇଛି କଲେଜ ପ୍ରଶାସନ। ସରକାରୀ ବିଜ୍ଞପ୍ତିରେ ଉଲ୍ଲେଖ କରାଯାଇଛି ଯେ ରଙ୍ଗଗୁଡ଼ିକ ବିଶ୍ୱବିଦ୍ୟାଳୟର ନୋଟିସ୍ ବୋର୍ଡରେ ପ୍ରଦର୍ଶିତ ନମୁନା ସହିତ ପାଖାପାଖି ମେଳ ଖାଉଥିବା ଉଚିତ।