ପଶ୍ଚିମବଙ୍ଗ: ପଶ୍ଚିମବଙ୍ଗ ବିଧାନସଭାର ୧୫୨ଟି ଆସନ ପାଇଁ ଗୁରୁବାର ପ୍ରଥମ ପର୍ଯ୍ୟାୟ ଭୋଟ ଗ୍ରହଣ ଚାଲିଥିବାବେଳେ ରାଜ୍ୟରେ ରାଜନୈତିକ ତାପମାତ୍ରା ଉଚ୍ଚସ୍ଥାନକୁ ପହଞ୍ଚିଛି। ଏହି ପରିପ୍ରେକ୍ଷୀରେ ନଦିଆ ଜିଲ୍ଲାର ଚକଦହାରେ ଆୟୋଜିତ ଏକ ସାଧାରଣ ସଭାରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଯୋଗଦେଇ ଭୋଟରମାନଙ୍କୁ ସମ୍ବୋଧନ କରିଥିଲେ।
ସଭାରେ ସେ ନଦିଆର ଆଧ୍ୟାତ୍ମିକ ଓ ସାଂସ୍କୃତିକ ପରମ୍ପରାକୁ ଉଲ୍ଲେଖ କରି ଏହାକୁ ଚୈତନ୍ୟ ମହାପ୍ରଭୁଙ୍କ ବୈଷ୍ଣବ ଧାରାର ପବିତ୍ର ଭୂମି ବୋଲି କହିଥିଲେ। ଯୋଗୀ ଆଦିତ୍ୟନାଥ ରାଜ୍ୟର ଆଇନ-ଶୃଙ୍ଖଳା, ବିକାଶ ଓ ସାଂସ୍କୃତିକ ପରିଚୟ ପ୍ରସଙ୍ଗ ଉଠାଇ ମମତା ବାନାର୍ଜୀଙ୍କ ସରକାରକୁ କଟାକ୍ଷ କରିଥିଲେ। ସେ ଭାଜପା ପ୍ରାର୍ଥୀ ବଙ୍କିମ ଚନ୍ଦ୍ର ଘୋଷଙ୍କ ପକ୍ଷରେ ଭୋଟ ମାଗି ଡବଲ ଇଞ୍ଜିନ ସରକାର ଗଠନ ହେଲେ ରାଜ୍ୟରେ ବିକାଶ, ସୁରକ୍ଷା ଓ ସାଂସ୍କୃତିକ ପୁନର୍ଜାଗରଣ ଆସିବ ବୋଲି କହିଥିଲେ।
ଯୋଗୀ ଆଦିତ୍ୟନାଥ ତାଙ୍କ ଭାଷଣରେ କହିଥିଲେ ଯେ ପଶ୍ଚିମବଙ୍ଗରେ ହଜାର ହଜାର ଶିଳ୍ପ ବନ୍ଦ ହୋଇଥିବାବେଳେ ଉତ୍ତରପ୍ରଦେଶରେ ଶିଳ୍ପ ବିକାଶ ଦ୍ରୁତ ଗତିରେ ଆଗକୁ ବଢ଼ିଛି ଓ ଲକ୍ଷାଧିକ ଯୁବକ ନିଯୁକ୍ତି ପାଇଛନ୍ତି। ସେ ଆହୁରି କହିଥିଲେ ଯେ ଅଯୋଧ୍ୟାରେ ରାମ ମନ୍ଦିର ନିର୍ମାଣ ଭଳି ବଡ଼ ପ୍ରକଳ୍ପଗୁଡ଼ିକ ଡବଲ ଇଞ୍ଜିନ ସରକାର ଥିବାରୁ ସମ୍ଭବ ହୋଇପାରିଛି। ଶେଷରେ ସେ ଦାବି କରିଥିଲେ ଯେ ଏଥର ପଶ୍ଚିମବଙ୍ଗରେ ବିଜେପି ସରକାର ଗଠନ ହେବା ନିଶ୍ଚିତ ଏବଂ ରାଜ୍ୟରେ “ଖେଳ ଶେଷ, ବିକାଶ ଆରମ୍ଭ” ହେବ।