ରାଜସ୍ଥାନ: ରାଜସ୍ଥାନର କୋଟପୁଟଲି-ବେହର ଜିଲ୍ଲାର ନିମ୍ରାଣା ଅଞ୍ଚଳରେ ଥିବା ଏକ କବାଡି ଗୋଦାମରେ ଘଟିଥିବା ଭୟଙ୍କର ଅଗ୍ନିକାଣ୍ଡ ଦୁର୍ଘଟଣାରେ ୨ ନାବାଳିକା ସମେତ ମୋଟ ୪ ଜଣଙ୍କ ମୃତ୍ୟୁ ଘଟିଛି। ଏହି ଦୁଃଖଦ ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।
ସୂଚନାଅନୁଯାୟୀ, ନିମ୍ରାଣା ଶିଳ୍ପାଞ୍ଚଳର ମୋହଲାଡିଆ-ବିଚପୁରୀ ରୋଡରେ ଥିବା ଗୋଦାମରେ ଶୁକ୍ରବାର ସନ୍ଧ୍ୟା ସମୟରେ ଅଚାନକ ଆଗ୍ନିକାଣ୍ଡ ଘଟିଥିଲା। ଗୋଦାମ ଭିତରେ ଶ୍ରମିକମାନେ ପରଫ୍ୟୁମ ବୋତଲ ଭାଙ୍ଗୁଥିବା ବେଳେ ସିଗାରେଟରୁ ନିଆଁ ଲାଗିଥିବା ଆଶଙ୍କା କରାଯାଉଛି, ତେବେ ଅଧିକାରୀମାନେ କହିଛନ୍ତି ଯେ ଆଗ୍ନିକାଣ୍ଡର ସଠିକ୍ କାରଣ ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ। ଘଟଣା ସମ୍ପର୍କରେ ଖବର ପାଇ ତୁରନ୍ତ ପୋଲିସ ଓ ଅଗ୍ନିଶମ ବାହିନୀ ଦଳ ଘଟଣାସ୍ଥଳକୁ ପହଞ୍ଚିଥିଲେ। ଅନେକ ଅଗ୍ନିଶମ ଗାଡ଼ି ପ୍ରାୟ ୨ ଘଣ୍ଟା ଧରି ଅନବରତ ଚେଷ୍ଟା ପରେ ନିଆଁକୁ ନିୟନ୍ତ୍ରଣ କରିଥିଲେ। ଗୁରୁତର ଭାବେ ପୋଡ଼ିଯାଇଥିବା ଜଣେ ମହିଳାଙ୍କୁ ତୁରନ୍ତ ହସ୍ପିଟାଲକୁ ପଠାଯାଇଥିଲା।
ଏହି ଦୁର୍ଘଟଣାରେ ମୃତକମାନେ ହେଲେ ୭ ବର୍ଷୀୟ ଆରୁଷି, କିଶୋରୀ କବିତା (ପ୍ରାୟ ୧୬–୧୮ ବର୍ଷ), ପିକଅପ୍ ଡ୍ରାଇଭର ଜୋନି ଓ ରବିଦତ୍ତ। ଆରୁଷିଙ୍କ ବାପାଙ୍କ କହିବା ଅନୁଯାୟୀ, ସେ ଖାଦ୍ୟ ନେଇ ଗୋଦାମକୁ ଯାଇଥିବା ବେଳେ ଅଗ୍ନିକାଣ୍ଡ ଘଟିଥିଲା ଏବଂ ସେ ନିଆଁରେ ପୋଡ଼ିଯାଇଥିଲେ। କବିତାଙ୍କ ପରିବାର ମଧ୍ୟ କହିଛନ୍ତି ଯେ ସେ କାମ କରୁଥିବା ସମୟରେ ଏହି ଦୁର୍ଘଟଣା ଘଟିଥିଲା।
ଘଟଣାସ୍ଥଳକୁ ଜିଲାପାଳ ଅପର୍ଣ୍ଣା ଗୁପ୍ତା ଓ ପୋଲିସ ଅଧୀକ୍ଷକ ସତ୍ୟବୀର ସିଂ ସହ ଅନ୍ୟାନ୍ୟ ଅଧିକାରୀମାନେ ପହଞ୍ଚି ପରିସ୍ଥିତିର ସମୀକ୍ଷା କରିଥିଲେ। ଫୋରେନସିକ୍ ଟିମ୍ ଓ ଅଗ୍ନିଶମ ବିଭାଗ ଘଟଣାର କାରଣ ଖୋଜିବା ପାଇଁ ତଦନ୍ତ ଜାରି ରଖିଛନ୍ତି। ଏହି ଘଟଣା ପୁନର୍ବାର ଶିଳ୍ପାଞ୍ଚଳରେ ସୁରକ୍ଷା ବ୍ୟବସ୍ଥା ଓ ନିୟମ ମାନନ୍ତା ବିଷୟରେ ପ୍ରଶ୍ନ ଉଠାଇଛି।