ନୂଆ ଦିଲ୍ଲୀ: ନିଟ୍ ପରୀକ୍ଷା ବ୍ୟବସ୍ଥାରେ ଆସୁଛି ବଡ଼ ପରିବର୍ତ୍ତନ। ଆସନ୍ତା ବର୍ଷରୁ ନିଟ୍ ପରୀକ୍ଷା କମ୍ପ୍ୟୁଟର-ଭିତ୍ତିକ ଟେଷ୍ଟ (ସିବିଟି) ମୋଡ୍ରେ ଅନୁଷ୍ଠିତ ହେବ ବୋଲି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଘୋଷଣା କରିଛନ୍ତି। ଓଏମଆର ପଦ୍ଧତି ପରିବର୍ତ୍ତେ ସିବିଟି ବ୍ୟବସ୍ଥା ଅଧିକ ସୁରକ୍ଷିତ ଓ ସ୍ୱଚ୍ଛ ହେବ ବୋଲି ସେ କହିଛନ୍ତି।
ଚଳିତ ବର୍ଷ ପରୀକ୍ଷାରେ ଛାତ୍ରଛାତ୍ରୀଙ୍କୁ ୧୫ ମିନିଟ୍ ଅତିରିକ୍ତ ସମୟ ଦିଆଯିବ। ପରୀକ୍ଷା ଅପରାହ୍ନ ୨ଟାରୁ ସନ୍ଧ୍ୟା ୫ଟା ୧୫ ମିନିଟ୍ ପର୍ଯ୍ୟନ୍ତ ଚାଲିବ। ଜୁନ୍ ୧୪ ସୁଦ୍ଧା ଆଡମିଟ୍ କାର୍ଡ ଜାରି କରାଯିବା ସହ ଛାତ୍ରଛାତ୍ରୀଙ୍କୁ ପସନ୍ଦର ସହର ବାଛିବାର ସୁବିଧା ଦିଆଯିବ ବୋଲି ମନ୍ତ୍ରୀ ସୂଚନା ଦେଇଛନ୍ତି।
ନିଟ୍ ପ୍ରଶ୍ନପତ୍ର ଲିକ୍ ଘଟଣାକୁ ନେଇ ସେ କହିଛନ୍ତି, ଖବର ପ୍ରକାଶ ପାଇବା ସହିତ ତୁରନ୍ତ ତଦନ୍ତ ଆରମ୍ଭ କରାଯାଇଥିଲା ଏବଂ ପରେ ମାମଲାକୁ ତଦନ୍ତ ଏଜେନ୍ସିଙ୍କୁ ହସ୍ତାନ୍ତର କରାଯାଇଥିଲା। ବର୍ତ୍ତମାନ ସିବିଆଇ ଏହାର ତଦନ୍ତ କରୁଥିବାବେଳେ ଶିକ୍ଷା ମାଫିଆଙ୍କ ବିରୋଧରେ କଡ଼ା ପଦକ୍ଷେପ ନିଆଯିବ ବୋଲି ସେ ସତର୍କ କରିଛନ୍ତି। ସାଇବର ଅପରାଧକୁ ବଡ଼ ଚ୍ୟାଲେଞ୍ଜ ବୋଲି କହି ଧର୍ମେନ୍ଦ୍ର ପ୍ରଧାନ ଜଣାଇଛନ୍ତି ଯେ ନିଟ୍ ସମ୍ବନ୍ଧୀୟ ଭୁଲ ସାମଗ୍ରୀ ପ୍ରସାର କରୁଥିବା ୧୨୦ଟି ଟେଲିଗ୍ରାମ ଚ୍ୟାନେଲକୁ ବ୍ଲକ୍ କରାଯାଇଛି। “ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳ କରିବାକୁ କାହାକୁ ମଧ୍ୟ ଛାଡ଼ାଯିବ ନାହିଁ,” ବୋଲି ସେ କହିଛନ୍ତି।