ତେଲେଙ୍ଗାନା: ତେଲେଙ୍ଗାନାରେ ଚର୍ଚ୍ଚିତ ନାବାଳିକା ନିର୍ଯାତନା ମାମଲାରେ କେନ୍ଦ୍ରମନ୍ତ୍ରୀ ବନ୍ଦୀ ସଞ୍ଜୟ କୁମାରଙ୍କ ପୁଅ ବନ୍ଦୀ ସାଇ ଭାଗୀରଥଙ୍କ ବିରୋଧରେ ପୁଲିସ ତଦନ୍ତ ଜୋରଦାର କରିଛି। ଅଭିଯୁକ୍ତଙ୍କୁ ଧରିବା ପାଇଁ ସାଇବରାବାଦ ପୁଲିସ ୫ଟି ସ୍ୱତନ୍ତ୍ର ଦଳ ଗଠନ କରିଥିବାବେଳେ ତାଙ୍କ ବିରୋଧରେ ଲୁକ୍-ଆଉଟ୍ ସର୍କୁଲାର ମଧ୍ୟ ଜାରି କରାଯାଇଛି। ବନ୍ଦୀ ସାଇ ଭାଗୀରଥଙ୍କ ଅବସ୍ଥିତି ଜାଣିବା ପାଇଁ କଲ୍ ଡିଟେଲ୍ ରେକର୍ଡ ଓ ଇଣ୍ଟରନେଟ୍ ପ୍ରୋଟୋକଲ୍ ଠିକଣାର ସହାୟତା ନିଆଯାଉଛି। ପେଟବଶୀରାବାଦ ପୁଲିସ ଷ୍ଟେସନରେ ରୁଜୁ ହୋଇଥିବା ଏଫଆଇଆର ଆଧାରରେ ଏହି ତଦନ୍ତ ଚାଲିଛି।
ମାମଲାରେ ଭାରତୀୟ ନ୍ୟାୟ ସଂହିତାର ଧାରା ୭୪ ଓ ୭୫ ସହ ପୋକ୍ସୋ ଆଇନର ବିଭିନ୍ନ ଧାରା ଲାଗୁ କରାଯାଇଛି। ପୀଡିତାଙ୍କ ମାଆଙ୍କ ଅଭିଯୋଗ ଅନୁଯାୟୀ, ବିବାହର ପ୍ରତିଶ୍ରୁତି ଦେଇ ଅଭିଯୁକ୍ତ ନାବାଳିକାଙ୍କ ସହ ସମ୍ପର୍କ ଗଢ଼ିଥିଲେ ଏବଂ ପରେ ତାଙ୍କୁ ଅନୁଚିତ ଶାରୀରିକ ସମ୍ପର୍କ ଓ ମଦ୍ୟପାନ ପାଇଁ ଚାପ ଦେଇଥିବା ଅଭିଯୋଗ ହୋଇଛି। ଅଭିଯୋଗରେ ଆହୁରି କୁହାଯାଇଛି ଯେ ସମ୍ପର୍କ ଭାଙ୍ଗିଯାଇବା ପରେ ପୀଡିତା ମାନସିକ ଚାପରେ ରହୁଥିଲେ ଏବଂ ଦୁଇଥର ନିଜକୁ କ୍ଷତି ପହଞ୍ଚାଇବାକୁ ଚେଷ୍ଟା କରିଥିଲେ। ତେବେ ଘଟଣା ପୂର୍ବରୁ ଭାଗୀରଥ ପୀଡିତାଙ୍କ ପରିବାର ବିରୋଧରେ ଅର୍ଥ ଆଦାୟ ଓ ଧମକ ଦେବା ଅଭିଯୋଗ ନେଇ ଅଲଗା ମାମଲା ରୁଜୁ କରିଥିଲେ।
ଏହି ଘଟଣାକୁ ନେଇ କେନ୍ଦ୍ରମନ୍ତ୍ରୀ ବନ୍ଦୀ ସଞ୍ଜୟ କୁମାର ମାନହାନି ମକଦ୍ଦମା ମଧ୍ୟ କରିଛନ୍ତି। କେତେକ ଟିଭି ଚ୍ୟାନେଲ, ୟୁଟ୍ୟୁବ୍ ଓ ସୋସିଆଲ ମିଡିଆରେ ପ୍ରସାରିତ ଖବରକୁ ନେଇ ସେ କୋର୍ଟର ଦ୍ୱାରସ୍ଥ ହୋଇଥିବାବେଳେ ବିଷୟବସ୍ତୁ ହଟାଇବାକୁ ଆବେଦନ କରିଛନ୍ତି। ଅନ୍ୟପଟେ, ଗିରଫ ଆଶଙ୍କା ମଧ୍ୟରେ ବନ୍ଦୀ ସାଇ ଭାଗୀରଥ ଆଗୁଆ ଜାମିନ ପାଇଁ ତେଲେଙ୍ଗାନା ହାଇକୋର୍ଟର ଦ୍ୱାରସ୍ଥ ହୋଇଛନ୍ତି। ଘଟଣାକୁ ନେଇ ରାଜ୍ୟର ରାଜନୀତି ଉତ୍ତାଳ ହୋଇଥିବାବେଳେ ପୁଲିସର ପରବର୍ତ୍ତୀ ପଦକ୍ଷେପ ଉପରେ ସମସ୍ତଙ୍କ ନଜର ରହିଛି।