ଭୁବନେଶ୍ବର: ଓଡ଼ିଶାରେ ଖଣିଜ ସମ୍ପଦର ବ୍ୟବହାର ଓ ଶିଳ୍ପ ବିକାଶକୁ ଆହୁରି ତ୍ୱରାନ୍ୱିତ କରିବା ଲକ୍ଷ୍ୟରେ ରାଜ୍ୟ ସରକାର ୧୧ଟି ବୃହତ୍ ଖଣିଜ ବ୍ଲକକୁ ନିଲାମ କରିବାକୁ ପଦକ୍ଷେପ ନେଇଛନ୍ତି। ବକ୍ସାଇଟ୍, ଲୁହାପଥର, ମାଙ୍ଗାନିଜ୍, ଆଲୁମିନିୟମଯୁକ୍ତ ଲାଟେରାଇଟ୍ ଏବଂ ଚୂନପଥର ଭଳି ମୂଲ୍ୟବାନ ଖଣିଜ ସମ୍ପଦ ଥିବା ଏହି ବ୍ଲକଗୁଡ଼ିକ ୫ଟି ଜିଲ୍ଲାରେ ଅବସ୍ଥିତ।
ରାଜ୍ୟ ସରକାରଙ୍କ ଇସ୍ପାତ ଓ ଖଣି ବିଭାଗ ଅଧୀନସ୍ଥ ଖଣି ଓ ଭୂତତ୍ତ୍ୱ ନିର୍ଦ୍ଦେଶାଳୟ ପକ୍ଷରୁ ଏହି ଇ-ନିଲାମ ପ୍ରକ୍ରିୟା ଆରମ୍ଭ କରାଯାଇଛି। କଳାହାଣ୍ଡି, ରାୟଗଡ଼ା, ସୁନ୍ଦରଗଡ଼, କେନ୍ଦୁଝର ଏବଂ ବରଗଡ଼ ଜିଲ୍ଲାରେ ଥିବା ଏହି ଖଣି ବ୍ଲକଗୁଡ଼ିକ ପାଇଁ ଆସନ୍ତା ଜୁଲାଇ ୧୩ ତାରିଖ ସୁଦ୍ଧା ବିଡ୍ ଦାଖଲ କରିବାକୁ ସମୟସୀମା ଧାର୍ଯ୍ୟ କରାଯାଇଛି। ନିଲାମ ହେବାକୁ ଥିବା ୧୧ଟି ବ୍ଲକ ମଧ୍ୟରୁ ୮ଟିକୁ ‘ମାଇନିଂ ଲିଜ୍’ ଏବଂ ୩ଟି ବକ୍ସାଇଟ୍ ବ୍ଲକକୁ ‘କମ୍ପୋଜିଟ୍ ଲାଇସେନ୍ସ’ ଆଧାରରେ ପ୍ରଦାନ କରାଯିବ। ଏଥର କଳାହାଣ୍ଡିର ଚର୍ଚ୍ଚିତ କର୍ଲାପାଟ ବକ୍ସାଇଟ୍ ଖଣି ବ୍ଲକକୁ ମଧ୍ୟ ନିଲାମ ତାଲିକାରେ ସାମିଲ କରାଯାଇଛି। ସେହିପରି ରାୟଗଡ଼ା ଜିଲ୍ଲାର ନୁନାପାଇମାଲି ବକ୍ସାଇଟ୍ ବ୍ଲକ ମଧ୍ୟ ନିଲାମ ହେବ।
ରାୟଗଡ଼ାର ଟିକିରିମାଲି-ବୁଢ଼ାରାଜାମାଲି, ଟିକିରିଗୁଡ଼ା-ମାଲିଗୁଡ଼ା ଏବଂ ନଙ୍ଗାଲମାର୍ହିମାଲି ବକ୍ସାଇଟ୍ ବ୍ଲକଗୁଡ଼ିକୁ କମ୍ପୋଜିଟ୍ ଲାଇସେନ୍ସ ମୋଡ୍ରେ ନିଲାମ କରାଯିବ। କେନ୍ଦୁଝର ଜିଲ୍ଲାର ଗଦାଧରପୁର ଲୁହାପଥର ବ୍ଲକ ମଧ୍ୟ ଏହି ତାଲିକାରେ ରହିଛି। ଏହାସହ ସୁନ୍ଦରଗଡ଼ ଜିଲ୍ଲାର ଜଳଡିହି-ତନ୍ତୀଗ୍ରାମ, ପଟମୁଣ୍ଡା-ବି ଏବଂ ବରପଦା ସାଉଥ ବ୍ଲକକୁ ନିଲାମ ପାଇଁ ରଖାଯାଇଛି। କେନ୍ଦୁଝରର କେନ୍ଦୁଡିହି-ପାରୁଲିପଦା ଏବଂ ବରଗଡ଼ ଜିଲ୍ଲାର ବେହେରା-ବଞ୍ଜିପାଲି ଚୂନପଥର ବ୍ଲକ ମଧ୍ୟ ଏହି ନିଲାମ ପ୍ରକ୍ରିୟାର ଅଂଶ ହେବ। ଏହି ନିଲାମ ପ୍ରକ୍ରିୟା ମାଧ୍ୟମରେ ରାଜ୍ୟରେ ଖଣିଜ ଭିତ୍ତିକ ଶିଳ୍ପର ବିକାଶ, ନିବେଶ ବୃଦ୍ଧି ଏବଂ ରାଜସ୍ୱ ଆଦାୟରେ ଉଲ୍ଲେଖନୀୟ ବୃଦ୍ଧି ହେବ ବୋଲି ଆଶା କରାଯାଉଛି।