ନ୍ୟୁଜ୍ ବ୍ୟୁରୋ: ଦେଶର ଭିତ୍ତିଭୂମି ବିକାଶ, ବିମାନ ଚଳାଚଳ କ୍ଷେତ୍ରର ସ୍ଥିରତା ଏବଂ ପରିବେଶ ସୁରକ୍ଷାକୁ ଲକ୍ଷ୍ୟ କରି କେନ୍ଦ୍ର କ୍ୟାବିନେଟ ବୁଧବାର ମୋଟ ୩୯,୨୯୦ କୋଟି ଟଙ୍କାର ଛଅଟି ପ୍ରମୁଖ ପ୍ରକଳ୍ପକୁ ଅନୁମୋଦନ କରିଛି। ଏହି ନିଷ୍ପତ୍ତି ଦେଶର ପରିବହନ ବ୍ୟବସ୍ଥା, ବିମାନ ଶିଳ୍ପ ଏବଂ ରାଜ୍ୟଗୁଡ଼ିକ ମଧ୍ୟରେ ସଂଯୋଗୀକରଣକୁ ନୂଆ ଗତି ଦେବ ବୋଲି ଆଶା କରାଯାଉଛି।
କ୍ୟାବିନେଟର ସବୁଠାରୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ହେଉଛି ୧୦,୦୦୦ କୋଟି ଟଙ୍କାର ଏଟିଏଫ (Aviation Turbine Fuel) ମୂଲ୍ୟ ସ୍ଥିରୀକରଣ ପାଣ୍ଠି ଗଠନ। ଅନ୍ତର୍ଜାତୀୟ ଇନ୍ଧନ ମୂଲ୍ୟର ଅସ୍ଥିରତା ଯୋଗୁଁ ବିମାନ ସେବା କମ୍ପାନୀମାନେ ସମ୍ମୁଖୀନ ହେଉଥିବା ଆର୍ଥିକ ଚାପକୁ କମାଇବା ଏହାର ଉଦ୍ଦେଶ୍ୟ। ଏହା ଯାତ୍ରୀ ଭଡ଼ା ବୃଦ୍ଧିକୁ ନିୟନ୍ତ୍ରଣ କରିବା ସହ ବିମାନ କ୍ଷେତ୍ରରେ ନିଯୁକ୍ତି ଓ ନିବେଶକୁ ସୁରକ୍ଷା ଦେବ। ଦିଲ୍ଲୀର ବାୟୁ ପ୍ରଦୂଷଣ ହ୍ରାସ ପାଇଁ ୫,୦୪୧ କୋଟି ଟଙ୍କାର ଏକ ସ୍ୱତନ୍ତ୍ର ଯୋଜନାକୁ ମଧ୍ୟ ମଞ୍ଜୁରି ମିଳିଛି। ଏହା ଅଧୀନରେ ପୁରୁଣା ଟ୍ରକ୍ ଓ ବସ୍ଗୁଡ଼ିକୁ ରାସ୍ତାରୁ ହଟାଇବା ସହ ସ୍ୱଚ୍ଛ ପରିବହନ ବ୍ୟବସ୍ଥାକୁ ପ୍ରୋତ୍ସାହନ ଦିଆଯିବ।
ଏହାଛଡ଼ା ଦେଶର ସଡ଼କ ଓ ଲଜିଷ୍ଟିକ୍ସ ନେଟୱାର୍କକୁ ସୁଦୃଢ଼ କରିବା ପାଇଁ ୨୪,୨୪୯ କୋଟି ଟଙ୍କାର ରାଜପଥ ପ୍ରକଳ୍ପକୁ ଅନୁମୋଦନ କରାଯାଇଛି। ଏହା ଅଧୀନରେ ଓଡ଼ିଶା, ତେଲେଙ୍ଗାନା, ମଧ୍ୟପ୍ରଦେଶ ଓ ବିହାରରେ ବଡ଼ ଧରଣର ସଡ଼କ ଓ ଜାତୀୟ ରାଜପଥ ପ୍ରକଳ୍ପ କାର୍ଯ୍ୟକାରୀ ହେବ। ଓଡ଼ିଶାରେ ଉପକୂଳ ରାଜପଥ ନିର୍ମାଣ ପାଇଁ ୮,୩୦୧ କୋଟି ଟଙ୍କା, ତେଲେଙ୍ଗାନାରେ ଜାତୀୟ ରାଜପଥ ଫୋର-ଲେନିଂ ପାଇଁ ୭,୫୯୭ କୋଟି ଟଙ୍କା, ମଧ୍ୟପ୍ରଦେଶରେ ରାଜପଥ ଉନ୍ନତିକରଣ ପାଇଁ ୪,୪୧୫ କୋଟି ଟଙ୍କା ଏବଂ ବିହାରରେ ରାସ୍ତା ସମ୍ପ୍ରସାରଣ ପାଇଁ ୩,୯୩୬ କୋଟି ଟଙ୍କା ମଞ୍ଜୁର କରାଯାଇଛି। ସରକାରଙ୍କ ମତରେ, ଏହି ପଦକ୍ଷେପଗୁଡ଼ିକ ଦେଶର ଲଜିଷ୍ଟିକ୍ସ ଖର୍ଚ୍ଚ ହ୍ରାସ କରିବା, ଦ୍ରୁତ ଓ ସୁରକ୍ଷିତ ଯାତାୟାତ ସୁନିଶ୍ଚିତ କରିବା ସହ ଅର୍ଥନୀତିକୁ ଅଧିକ ଗତିଶୀଳ କରିବାରେ ସହାୟକ ହେବ।