ଭୁବନେଶ୍ବର: ସୁଭଦ୍ରା ଯୋଜନାକୁ ନେଇ ରାଜ୍ୟ ସରକାରଙ୍କ ପକ୍ଷରୁ ଏକ ବଡ଼ ଘୋଷଣା କରାଯାଇଛି। ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ଶୁକ୍ରବାର ଏକ ସାମ୍ବାଦିକ ସମ୍ମିଳନୀରେ ଯୋଜନାର ଅଗ୍ରଗତି ଓ ନୂତନ ଆବେଦନ ସମ୍ପର୍କିତ ସୂଚନା ଦେଇଛନ୍ତି।
ଉପମୁଖ୍ୟମନ୍ତ୍ରୀଙ୍କ ସୂଚନା ଅନୁଯାୟୀ, ସୁଭଦ୍ରା ଯୋଜନା ପାଇଁ ୩ ଲକ୍ଷ ୧୭ ହଜାର ୯୬୬ ଜଣ ନୂଆ ଆବେଦନ କରିଛନ୍ତି। ଏହି ଆବେଦନଗୁଡ଼ିକର ସମୀକ୍ଷା ପରେ ବିଭିନ୍ନ ଶ୍ରେଣୀର ମାମଲା ଚିହ୍ନଟ କରାଯାଇଛି। ୮୨ ହଜାର ୩୬ ଜଣ ଆବେଦନକାରୀଙ୍କୁ ନିଜ ବ୍ୟାଙ୍କ ଖାତାରେ ଡିବିଟି ସକ୍ରିୟ କରିବାକୁ କୁହାଯାଇଥିବା ବେଳେ ୨୮ ହଜାର ୬୧୧ ଜଣଙ୍କୁ ଇ-କେୱାଇସି (e-KYC) ସମ୍ପୂର୍ଣ୍ଣ କରିବାକୁ ନିର୍ଦ୍ଦେଶ ଦିଆଯାଇଛି। ଏହି ଆବେଦନକାରୀମାନେ ଜନସେବା କେନ୍ଦ୍ରକୁ ଯାଇ ନନ୍-ବାୟୋମେଟ୍ରିକ ଇ-କେୱାଇସି ସମ୍ପୂର୍ଣ୍ଣ କଲେ ସେମାନଙ୍କୁ କିସ୍ତି ମିଳିବ।
ସେହିପରି ୩ ଲକ୍ଷ ୫୩ ହଜାର ୫୯ ଜଣଙ୍କ ଫିଲ୍ଡ ଇନକ୍ୱାରୀ ସମ୍ପର୍କିତ ମାମଲା ଶୀଘ୍ର ସମାଧାନ ପାଇଁ ନିର୍ଦ୍ଦେଶ ଦିଆଯାଇଛି। ଜୁଲାଇ ୨୫ ସୁଦ୍ଧା ସମସ୍ତ ଫିଲ୍ଡ ଇନକ୍ୱାରୀ କାର୍ଯ୍ୟ ଶେଷ କରିବାକୁ ଲକ୍ଷ୍ୟ ରଖାଯାଇଛି। ରକ୍ଷା ବନ୍ଧନ ପୂର୍ବରୁ ସମସ୍ତ ପ୍ରକ୍ରିୟା ସମ୍ପୂର୍ଣ୍ଣ କରିବାକୁ ପ୍ରଶାସନକୁ ନିର୍ଦ୍ଦେଶ ଦିଆଯାଇଥିବା ପ୍ରଭାତୀ ପରିଡା କହିଛନ୍ତି। ସବୁଠାରୁ ବଡ଼ କଥା ହେଉଛି, ଯେଉଁ ହିତାଧିକାରୀମାନେ ପୂର୍ବରୁ ଆବେଦନ କରିଥିଲେ କିନ୍ତୁ ଏପର୍ଯ୍ୟନ୍ତ କୌଣସି କିସ୍ତି ପାଇନାହାନ୍ତି, ସେମାନଙ୍କୁ ଯାଞ୍ଚ ପ୍ରକ୍ରିୟା ଶେଷ ହେବା ପରେ ଏକାଥରେ ୫ଟି କିସ୍ତି ପ୍ରଦାନ କରାଯିବ।