ନୂଆଦିଲ୍ଲୀ: ସୁପ୍ରିମକୋର୍ଟରେ ଶୁକ୍ରବାର ଏକ ଅପ୍ରୀତିକର ଘଟଣା ଘଟିଛି। ଆଲ୍ଲାହାବାଦ ହାଇକୋର୍ଟଙ୍କ ଏକ ଆଦେଶକୁ ଚ୍ୟାଲେଞ୍ଜ କରି ଦାଖଲ ହୋଇଥିବା ଆବେଦନର ଶୁଣାଣି ବେଳେ ଆବେଦନକାରୀ ନିଜେ କୋର୍ଟରେ ହାଜର ହୋଇ ବିଚାରପତିମାନଙ୍କ ପ୍ରତି ଅସମ୍ମାନଜନକ ଆଚରଣ କରିଥିଲେ। ଏହା ପରେ ସୁରକ୍ଷାକର୍ମୀମାନେ ତାଙ୍କୁ କୋର୍ଟ କକ୍ଷରୁ ବାହାର କରିଦେଇଥିଲେ।
ଏହି ଘଟଣା ଜଷ୍ଟିସ କେ.ଭି. ବିଶ୍ୱନାଥନ ଏବଂ ଜଷ୍ଟିସ ଆଲୋକ ଆରାଧେଙ୍କ ଖଣ୍ଡପୀଠ ସମ୍ମୁଖରେ ଘଟିଥିଲା। ନିଜ ପକ୍ଷ ଉପସ୍ଥାପନ କରୁଥିବା ସମୟରେ ଆବେଦନକାରୀ ବିଚାରପତିଙ୍କୁ “ନ୍ୟାୟିକ ସେବକ” ବୋଲି ସମ୍ବୋଧନ କରିବା ସହ ଲକ୍ଷ୍ନୌର ଜଣେ ଏସିପିଙ୍କ ବିରୋଧରେ ଏଫ୍ଆଇଆର୍ ରୁଜୁ କରିବାକୁ “ଆଦେଶ” ଦେଉଥିବା କଥା କହିଥିଲେ। ଆବେଦନକାରୀଙ୍କ ଏହି ମନ୍ତବ୍ୟରେ ଆଶ୍ଚର୍ଯ୍ୟ ପ୍ରକାଶ କରି ଜଷ୍ଟିସ ବିଶ୍ୱନାଥନ ପଚାରିଥିଲେ, “ଆପଣ ଆମକୁ ଆଦେଶ ଦେଉଛନ୍ତି?” ତେବେ ଏହା ପରେ ଆବେଦନକାରୀ ଅଧିକ ଉତ୍ତେଜିତ ହୋଇ ମାମଲା ସମ୍ବନ୍ଧୀୟ କାଗଜପତ୍ର ବିଚାରପତିଙ୍କ ଆଡ଼କୁ ଫିଙ୍ଗି ଦେଇଥିଲେ ଏବଂ ଅସଂଯତ ଭାଷା ବ୍ୟବହାର କରିଥିବା ଅଭିଯୋଗ ହୋଇଛି।
ପରିସ୍ଥିତି ଉତ୍ତେଜନାପୂର୍ଣ୍ଣ ହେବା ପରେ ସୁରକ୍ଷାକର୍ମୀମାନେ ତୁରନ୍ତ ହସ୍ତକ୍ଷେପ କରି ଆବେଦନକାରୀଙ୍କୁ କୋର୍ଟ କକ୍ଷରୁ ବାହାର କରିଦେଇଥିଲେ। ଏହା ପରେ କୋର୍ଟରେ ସାଧାରଣ ପରିବେଶ ଫେରିଥିଲା। ଘଟଣା ସମୟରେ ଖଣ୍ଡପୀଠ ପକ୍ଷରୁ ଉଲ୍ଲେଖନୀୟ ସଂଯମ ଓ ଧୈର୍ଯ୍ୟ ପ୍ରଦର୍ଶନ କରାଯାଇଥିଲା। ତେବେ ଆବେଦନକାରୀଙ୍କ ବିରୋଧରେ ଅବମାନନା କିମ୍ବା ଅନ୍ୟ କୌଣସି ଆଇନଗତ କାର୍ଯ୍ୟାନୁଷ୍ଠାନ ହେବ କି ନାହିଁ, ସେନେଇ ଏପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ମିଳିନା