ବାଲେଶ୍ବର: ବାଲେଶ୍ୱରରେ ନର୍ସିଂ ଛାତ୍ରଛାତ୍ରୀଙ୍କ ଆନ୍ଦୋଳନ ମଧ୍ୟରେ ଏକ ଭାବବିହ୍ୱଳ ଦୃଶ୍ୟ ସାମ୍ନାକୁ ଆସିଛି। ଫକୀର ମୋହନ ବିଶ୍ୱବିଦ୍ୟାଳୟ ଅଧୀନରେ ଥିବା ୫ଟି ନର୍ସିଂ କଲେଜର ଛାତ୍ରଛାତ୍ରୀ ଗତ ୬ ବର୍ଷ ଧରି ପରୀକ୍ଷା ଅନୁଷ୍ଠିତ ହୋଇନଥିବା ଅଭିଯୋଗ କରି ଆନ୍ଦୋଳନ ଜାରି ରଖିଛନ୍ତି।
ଏହି ପ୍ରସଙ୍ଗରେ ଆଜି ବାଲେଶ୍ୱର ଗସ୍ତରେ ଥିବା ଉଚ୍ଚ ଶିକ୍ଷାମନ୍ତ୍ରୀ ସୁରଜ ସୂର୍ଯ୍ୟବଂଶୀଙ୍କୁ ଛାତ୍ରଛାତ୍ରୀମାନେ ସାକ୍ଷାତ କରି ନିଜ ସମସ୍ୟା ଜଣାଇଥିଲେ। ପରୀକ୍ଷା କରାଇବା ଓ ନିଜ ଭବିଷ୍ୟତକୁ ସୁରକ୍ଷିତ କରିବା ପାଇଁ ସେମାନେ ହାତ ଯୋଡ଼ି ଅନୁରୋଧ କରିଥିଲେ। ଏପରିକି କିଛି ଛାତ୍ରଛାତ୍ରୀ ମନ୍ତ୍ରୀଙ୍କ ପାଦତଳେ ପଡ଼ି ନିଜ ଦୁଃଖ ବ୍ୟକ୍ତ କରୁଥିବା ଦୃଶ୍ୟ ଦେଖିବାକୁ ମିଳିଥିଲା। ଏନେଇ ପ୍ରତିକ୍ରିୟା ରଖି ଉଚ୍ଚ ଶିକ୍ଷାମନ୍ତ୍ରୀ ସୁରଜ ସୂର୍ଯ୍ୟବଂଶୀ କହିଛନ୍ତି ଯେ, ସମସ୍ତ ନର୍ସିଂ କଲେଜ କର୍ତ୍ତୃପକ୍ଷଙ୍କ ସହ ଆଲୋଚନା କରାଯିବ ଏବଂ ଛାତ୍ରଛାତ୍ରୀଙ୍କ ହିତକୁ ଦୃଷ୍ଟିରେ ରଖି ଯାହା ଆବଶ୍ୟକ ପଦକ୍ଷେପ, ତାହା ଗ୍ରହଣ କରାଯିବ। ଦୀର୍ଘ ୬ ବର୍ଷ ଧରି ପରୀକ୍ଷା ନ ହେବାରୁ ଛାତ୍ରଛାତ୍ରୀଙ୍କ ଭବିଷ୍ୟତ ଅନିଶ୍ଚିତତା ମଧ୍ୟରେ ପଡ଼ିଥିବା ବେଳେ ସେମାନେ ଶୀଘ୍ର ସମାଧାନ ପାଇଁ ଦାବି କରିଛନ୍ତି।