ଶୁଭାରମ୍ଭ କରିବେ ମୋଦୀ
ନୂଆଦିଲ୍ଲୀ: ଭାରତୀୟ ରେଳ ଇତିହାସରେ ଆଉ ଏକ ନୂଆ ଅଧ୍ୟାୟ ଯୋଡ଼ିବାକୁ ଯାଉଛି। ଦେଶର ପ୍ରଥମ ହାଇଡ୍ରୋଜେନ୍ ଇନ୍ଧନଚାଳିତ ଟ୍ରେନ୍ର ଶୁଭାରମ୍ଭ ଆସନ୍ତା ଜୁଲାଇ ୧୭ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କରିବେ। ଏହି ପରିବେଶ ଅନୁକୂଳ ଟ୍ରେନ୍ ହରିୟାଣାର ଜିନ୍ଦ ଓ ସୋନିପତ ମଧ୍ୟରେ ୮୯ କିଲୋମିଟର ଦୂରତା ପ୍ରାୟ ଦୁଇ ଘଣ୍ଟାରେ ଅତିକ୍ରମ କରିବ।
୧୦ କୋଚ୍ ବିଶିଷ୍ଟ ଏହି ଡିଇଏମ୍ୟୁ ଟ୍ରେନ୍ରେ ୬୮୨ଟି ଆସନ ଥିବାବେଳେ ମୋଟ ୨,୬୦୦ ଯାତ୍ରୀଙ୍କୁ ବହନ କରିପାରିବ। ଟ୍ରେନ୍ଟି ଜିନ୍ଦରୁ ସକାଳ ୭ଟା ୪୦ ମିନିଟରେ ଛାଡ଼ି ସୋନିପତରେ ସକାଳ ୯ଟା ୪୦ ମିନିଟରେ ପହଞ୍ଚିବ। ଫେରନ୍ତା ଯାତ୍ରାରେ ସୋନିପତରୁ ସକାଳ ୧୦ଟା ୪୦ ମିନିଟରେ ଛାଡ଼ି ଅପରାହ୍ନ ୧ଟାରେ ଜିନ୍ଦରେ ପହଞ୍ଚିବ। ମାର୍ଗରେ ଏହା ୧୨ଟି ମଧ୍ୟବର୍ତ୍ତୀ ଷ୍ଟେସନରେ ରହଣି କରିବ।
ପରୀକ୍ଷଣ ସମୟରେ ଟ୍ରେନ୍ଟି ଘଣ୍ଟାପ୍ରତି ୧୨୦ କିଲୋମିଟର ବେଗ ହାସଲ କରିଥିବାବେଳେ ନିୟମିତ ସେବାରେ ଏହାର ସର୍ବାଧିକ ବେଗ ଘଣ୍ଟାପ୍ରତି ୭୫ କିଲୋମିଟର ରହିବ। ଡିଜେଲ ପରିବର୍ତ୍ତେ ହାଇଡ୍ରୋଜେନ୍ ଫ୍ୟୁଏଲ୍ ସେଲ୍ରୁ ଶକ୍ତି ପାଉଥିବା ଏହି ଟ୍ରେନ୍ କାର୍ବନ ନିର୍ଗମନ ହ୍ରାସ କରି ସବୁଜ ପରିବହନ ବ୍ୟବସ୍ଥାକୁ ସୁଦୃଢ଼ କରିବ ବୋଲି ରେଳ ମନ୍ତ୍ରଣାଳୟ ଆଶା ପ୍ରକାଶ କରିଛି। ସୁରକ୍ଷା ଦୃଷ୍ଟିରୁ ପ୍ରଥମ ତିନି ମାସ ପର୍ଯ୍ୟନ୍ତ ଟ୍ରେନ୍ ସହ ବିଶେଷ ତାଲିମପ୍ରାପ୍ତ ବୈଷୟିକ କର୍ମଚାରୀ ନିୟୋଜିତ ରହିବେ।