ଜୈସଲମେର ରେଳ ଷ୍ଟେସନର ଶୁଭାରମ୍ଭ କରିବେ ପ୍ରଧାନମନ୍ତ୍ରୀ
ରାଜସ୍ତାନ: ଅମୃତ ଭାରତ ଷ୍ଟେସନ ଯୋଜନା ଅଧୀନରେ ନବୀକରଣ କରାଯାଇଥିବା ରାଜସ୍ଥାନର ଐତିହାସିକ ଜୈସଲମେର ରେଳ ଷ୍ଟେସନର ଉଦ୍ଘାଟନ ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭର୍ଚୁଆଲ ମାଧ୍ୟମରେ କରିବେ। ପ୍ରାୟ ୧୪୦ କୋଟି ଟଙ୍କା ବ୍ୟୟରେ ପୁନଃବିକାଶ କରାଯାଇଥିବା ଏହି ଷ୍ଟେସନ ଜୈସଲମେରର ଐତିହ୍ୟବାହୀ ସ୍ଥାପତ୍ୟ କଳା ସହ ଆଧୁନିକ ଯାତ୍ରୀ ସୁବିଧାର ଏକ ଅନନ୍ୟ ସମନ୍ୱୟ ସୃଷ୍ଟି କରିଛି।
ଉଦ୍ଘାଟନୀ କାର୍ଯ୍ୟକ୍ରମରେ କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ ଓ ଜୈସଲମେର ବିଧାୟକ ଛୋଟୁ ସିଂହ ଭାଟି ଉପସ୍ଥିତ ରହିବେ। ଷ୍ଟେସନର ନୂତନ ତିନି ମହଲା ବିଶିଷ୍ଟ ଭବନଟି ଜୈସଲମେରର ପ୍ରସିଦ୍ଧ ସୁନେଲି-ହଳଦିଆ ବାଲୁକା ପଥରରେ ନିର୍ମିତ ହୋଇଥିବାରୁ ଏହା ଏକ ରାଜପ୍ରାସାଦ ସଦୃଶ ଦେଖାଯାଉଛି। ଏହା ସହରର ଐତିହାସିକ ପରିଚୟକୁ ଅକ୍ଷୁଣ୍ଣ ରଖିଛି।
ଜୋଧପୁର ରେଳ ମଣ୍ଡଳର ବରିଷ୍ଠ ବାଣିଜ୍ୟିକ ପ୍ରବନ୍ଧକ ହିତେଶ ଯାଦବଙ୍କ ଅନୁଯାୟୀ, ଷ୍ଟେସନର ପୁନଃବିକାଶ କାର୍ଯ୍ୟ ଜୈସଲମେରର ସଂସ୍କୃତି ଓ ଐତିହ୍ୟକୁ ପ୍ରତିଫଳିତ କରିବା ସହ ଯାତ୍ରୀମାନଙ୍କ ପାଇଁ ବିଶ୍ୱସ୍ତରୀୟ ସୁବିଧା ଯୋଗାଇବା ଉଦ୍ଦେଶ୍ୟରେ କରାଯାଇଛି। ନବୀକୃତ ଷ୍ଟେସନରେ ୧୦ଟି ଲିଫ୍ଟ, ୧୦ଟି ଏସ୍କେଲେଟର, ପ୍ଲାଟଫର୍ମ ସଂଯୋଗ ପାଇଁ ଦୁଇଟି ନୂତନ ଫୁଟ୍ ଓଭରବ୍ରିଜ୍, ଆଧୁନିକ ପ୍ରତୀକ୍ଷାଳୟ, ୧୦ ହଜାର ବର୍ଗମିଟରରୁ ଅଧିକ ନୂତନ ଛାଉଣି, ବୃଦ୍ଧ ଓ ଦିବ୍ୟାଙ୍ଗ ଯାତ୍ରୀଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା, ବିଶାଳ ପ୍ରବେଶ ଓ ପ୍ରସ୍ଥାନ ଦ୍ୱାର, ରିଟାୟରିଂ ରୁମ୍, ପାର୍କିଂ ଏବଂ ବ୍ୟବସାୟିକ ସ୍ଥାନ ଭଳି ଅନେକ ଆଧୁନିକ ସୁବିଧା ରହିଛି। ଏହା ସହ ଷ୍ଟେସନ ପରିସରରେ ବଡ଼ ପାର୍କିଂ ଅଞ୍ଚଳ, ବାଣିଜ୍ୟିକ ଦୋକାନ, ଖୁଚୁରା ବ୍ୟବସାୟ ସ୍ଥାନ ଏବଂ ପର୍ଯ୍ୟଟକଙ୍କ ଅନୁଭୂତିକୁ ଆହୁରି ସମୃଦ୍ଧ କରିବା ପାଇଁ ରେଳ କୋଚ୍ ରେଷ୍ଟୁରାଣ୍ଟ ସ୍ଥାପନ ପ୍ରସ୍ତାବ ରହିଛି। ରେଳ ବିଭାଗର ଆକଳନ ଅନୁଯାୟୀ, ଟିକେଟ୍ ଆୟ ବ୍ୟତୀତ ଷ୍ଟେସନ ପ୍ରତିବର୍ଷ ପ୍ରାୟ ୫୦ ଲକ୍ଷ ଟଙ୍କା ବାଣିଜ୍ୟିକ କାର୍ଯ୍ୟକଳାପରୁ ଆୟ କରିପାରିବ।
ପର୍ଯ୍ୟଟନ ଉଦ୍ୟୋଗୀ ମୟଙ୍କ ଭାଟିଆ କହିଛନ୍ତି ଯେ, ପ୍ରତିବର୍ଷ ଜୈସଲମେରକୁ ଆସୁଥିବା ଲକ୍ଷାଧିକ ଦେଶୀ ଓ ବିଦେଶୀ ପର୍ଯ୍ୟଟକଙ୍କ ପାଇଁ ଏହି ନବୀକୃତ ଷ୍ଟେସନ ଯାତ୍ରା ଅନୁଭୂତିକୁ ଆହୁରି ସୁଖଦ କରିବ। ଏହା ସ୍ଥାନୀୟ ବ୍ୟବସାୟ ଓ ପର୍ଯ୍ୟଟନ ଶିଳ୍ପକୁ ମଧ୍ୟ ନୂଆ ଗତି ଦେବ। ଜୈସଲମେର ଷ୍ଟେସନ ସେହି ୭୫ଟି ଅମୃତ ଭାରତ ଷ୍ଟେସନ ମଧ୍ୟରୁ ଗୋଟିଏ, ଯାହାର ଉଦ୍ଘାଟନ ପ୍ରଧାନମନ୍ତ୍ରୀ ମୋଦୀ ଦେଶବ୍ୟାପୀ ଭାବେ ଏକକାଳୀନ କରିବେ। ରାଜସ୍ଥାନର ୫ଟି ରେଳ ଷ୍ଟେସନ ଏହି ପର୍ଯ୍ୟାୟରେ ସାମିଲ ହୋଇଛି। ରେଳ ବିଭାଗର ବିଶ୍ୱାସ ଯେ, ଆଧୁନିକ ସୁବିଧା ସମ୍ପନ୍ନ ଏହି ଷ୍ଟେସନ ଯାତ୍ରୀ ସୁବିଧାକୁ ବଢ଼ାଇବା ସହ ଜୈସଲମେରକୁ ଦେଶର ଅଗ୍ରଣୀ ପର୍ଯ୍ୟଟନ ସ୍ଥଳ ଭାବେ ଆହୁରି ସୁଦୃଢ଼ କରିବ।