କଲକାତା: ବାଂଲାଦେଶରୁ ନିର୍ବାସିତ ଚର୍ଚ୍ଚିତ ଲେଖିକା ତସଲିମା ନସରିନ୍ ଦୀର୍ଘ ୧୯ ବର୍ଷ ପରେ କଲକାତାକୁ ଫେରିଛନ୍ତି। ସେ ସୋସିଆଲ ମିଡିଆରେ ନିଜ ଆଗମନ ସମ୍ପର୍କରେ ସୂଚନା ଦେଇଥିଲେ। ବିମାନବନ୍ଦରରେ ପହଞ୍ଚିବା ପରେ ହାତ ଯୋଡ଼ି ସେ କହିଥିଲେ, “ଫେରିଆସି ବହୁତ ଭଲ ଲାଗୁଛି।” ଏହି ପ୍ରତ୍ୟାବର୍ତ୍ତନକୁ ସେ ଏକ ‘ଭାବପ୍ରବଣ ଘର ୱାପସୀ’ ବୋଲି ବର୍ଣ୍ଣନା କରିଛନ୍ତି। ତସଲିମାଙ୍କ ସ୍ୱାଗତ ପାଇଁ କଲକାତାର ବିଭିନ୍ନ ସ୍ଥାନରେ ବଡ଼ ବଡ଼ ହୋର୍ଡିଂ ଲଗାଯାଇଥିବାବେଳେ ଶଙ୍ଖଧ୍ୱନି ଓ ହୁଳହୁଳି ମଧ୍ୟରେ ତାଙ୍କୁ ଭବ୍ୟ ସ୍ୱାଗତ କରାଯାଇଛି।
ଶନିବାର ସନ୍ଧ୍ୟାରେ ରବୀନ୍ଦ୍ର ସଦନରେ ‘ସିକ୍ୟୁଲାର ମିଶନ ଟ୍ରଷ୍ଟ’ ଏବଂ ‘ହ୍ୟୁମାନ ରାଇଟ୍ସ ଆଣ୍ଡ ବାଂଲାଦେଶ ଫ୍ରିଡମ୍ ଫାଇଟର୍ସ ଫାଉଣ୍ଡେସନ’ ପକ୍ଷରୁ ଆୟୋଜିତ ଧାର୍ମିକ କଟ୍ଟରପନ୍ଥ ବିରୋଧୀ ସାଂସ୍କୃତିକ କାର୍ଯ୍ୟକ୍ରମରେ ସେ ଯୋଗଦେବେ। ୧୯୯୩ରେ ପ୍ରକାଶିତ ତାଙ୍କ ଉପନ୍ୟାସ ‘ଲଜ୍ଜା’ ଏବଂ ୨୦୦୩ର ଆତ୍ମଜୀବନୀ ‘ଦ୍ୱିଖଣ୍ଡିତ’କୁ କେନ୍ଦ୍ର କରି ଇସଲାମିକ କଟ୍ଟରପନ୍ଥୀ ସଂଗଠନମାନଙ୍କ ବିରୋଧର ସମ୍ମୁଖୀନ ହୋଇଥିଲେ। ୨୦୦୭ ନଭେମ୍ବରରେ କଲକାତାରେ ହିଂସାତ୍ମକ ବିରୋଧ ପ୍ରଦର୍ଶନ ପରେ ସେତେବେଳର ବାମ ସରକାର ତାଙ୍କୁ ସହର ଛାଡ଼ିବାକୁ କହିଥିଲେ। ଏହାପରେ ସେ ଜୟପୁର, ନୂଆଦିଲ୍ଲୀ ଏବଂ ବିଦେଶରେ ରହୁଥିଲେ ମଧ୍ୟ କଲକାତାକୁ ନିଜର ପ୍ରକୃତ ଘର ବୋଲି କହିଆସୁଥିଲେ। ଦୀର୍ଘ ୧୯ ବର୍ଷ ପରେ ତସଲିମାଙ୍କ ଏହି ପ୍ରତ୍ୟାବର୍ତ୍ତନକୁ ନେଇ କଲକାତାରେ ବେଶ୍ ଚର୍ଚ୍ଚା ଓ ଉତ୍ସାହ ଦେଖିବାକୁ ମିଳିଛି।