ପ୍ରତି ୧୦୦ କିମିରେ ହେବ ଗୋଶାଳା
ଭୁବନେଶ୍ବର: ଦୁର୍ଘଟଣା ରୋକିବାକୁ ରାଜ୍ୟ ସରକାରଙ୍କ ବଡ଼ ପଦକ୍ଷେପ। ଏଣିକି ଜାତୀୟ ରାଜପଥରୁ ହଟିବେ ଗୋରୁଗାଈ। ପରିବହନ ବିଭାଗ, ଭାରତୀୟ ଜାତୀୟ ରାଜପଥ ପ୍ରାଧିକରଣ ଓ ପ୍ରାଣୀ ସମ୍ପଦ ବିଭାଗ ମିଳିତ ଭାବେ ଏନେଇ ପଦକ୍ଷେପ ନେବେ। ରାସ୍ତା କଡ଼ରେ ପ୍ରତି ୧୦୦ କିଲୋମିଟରରେ ଗୋଟିଏ ଗୋଶାଳା ନିର୍ମାଣ କରାଯିବ ବୋଲି ପ୍ରାଣୀ ସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ସୂଚନା ଦେଇଛନ୍ତି।
ମନ୍ତ୍ରୀଙ୍କ ସୂଚନା ଅନୁସାରେ, ରାସ୍ତା ଉପରେ ଥିବା ଗୋରୁଗାଈଙ୍କୁ ପରିବହନ ବିଭାଗ ସ୍ଥାନାନ୍ତର କରିବ। ଗୋଶାଳାର ରକ୍ଷଣାବେକ୍ଷଣ ଦାୟିତ୍ୱ ପ୍ରାଣୀ ସମ୍ପଦ ବିଭାଗ ନେବ। ଏହି କାର୍ଯ୍ୟ ଉପରେ ସ୍ଥାନୀୟ ଏସ୍ପି ନଜର ରଖିବେ। ଏଥିସହ ପ୍ରତି ବ୍ଲକ୍ରେ ଗୋଶାଳା ଖୋଲିବା ପାଇଁ ମଧ୍ୟ ଯୋଜନା ରହିଛି।
ରାଜପଥରେ ଗୋରୁଗାଈ ରହିବା ଯୋଗୁଁ ବିଶେଷକରି ରାତି ସମୟରେ ଦୁର୍ଘଟଣା ବଢ଼ୁଛି। ଯାନବାହନ ଧକ୍କାରେ ଅନେକ ମୂକଜୀବଙ୍କ ମୃତ୍ୟୁ ହେବା ସହ ଯାତାୟାତରେ ମଧ୍ୟ ବାଧା ସୃଷ୍ଟି ହେଉଛି। ଏହାକୁ ରୋକିବା ପାଇଁ ତିନି ବିଭାଗର ମିଳିତ ପଦକ୍ଷେପ ନିଆଯାଇଛି।