ନ୍ୟୁଜ୍ ବ୍ୟୁରୋ: ରୁଷର ତୈଳ ଓ ଗ୍ୟାସ ବିକ୍ରୟ ଉପରେ କଟକଣା ଲଗାଇବାକୁ ଆମେରିକା ସିନେଟ୍ରେ ଏକ ବିଲ୍କୁ ମଞ୍ଜୁରି ମିଳିଛି। ବିଲ୍ଟି ୮୬-୧୧ ଭୋଟରେ ପାସ୍ ହୋଇଛି। ଏହା ଆଇନରେ ପରିଣତ ହେଲେ ରୁଷଠାରୁ ତୈଳ ଓ ଗ୍ୟାସ କିଣୁଥିବା ଭାରତ, ଚୀନ୍, ଜାପାନ ସମେତ କିଛି ଦେଶ ଉପରେ ବଡ଼ ପ୍ରଭାବ ପଡ଼ିପାରେ।
ଏହି ବିଲ୍ ଅନୁଯାୟୀ, ରୁଷ ସହ ବାଣିଜ୍ୟ କରୁଥିବା ଦେଶଗୁଡ଼ିକରୁ ଆମେରିକା ଆମଦାନୀ କରୁଥିବା ସାମଗ୍ରୀ ଉପରେ ୧୦୦ ପ୍ରତିଶତ ପର୍ଯ୍ୟନ୍ତ ଅତିରିକ୍ତ ଶୁଳ୍କ ଲଗାଇବାର କ୍ଷମତା ରାଷ୍ଟ୍ରପତିଙ୍କୁ ମିଳିପାରେ। ୟୁକ୍ରେନ ଯୁଦ୍ଧ ଜାରି ରଖିଥିବା ରୁଷ ଉପରେ ଆର୍ଥିକ ଚାପ ବଢ଼ାଇବା ଏହାର ମୁଖ୍ୟ ଉଦ୍ଦେଶ୍ୟ। ବିଲ୍ଟି ଏବେ ପ୍ରତିନିଧି ସଭାକୁ ଯିବ। ସେଠାରେ ମଞ୍ଜୁରି ପରେ ରାଷ୍ଟ୍ରପତିଙ୍କ ସ୍ୱାକ୍ଷର ହେଲେ ଏହା ଆଇନରେ ପରିଣତ ହେବ। ୟୁକ୍ରେନ ଯୁଦ୍ଧ ପରଠାରୁ ଭାରତ ରୁଷଠାରୁ ବିପୁଳ ପରିମାଣର ଅଶୋଧିତ ତୈଳ ଆମଦାନୀ କରୁଥିବାରୁ ନୂଆ କଟକଣା ଭାରତ ପାଇଁ ଚିନ୍ତାର କାରଣ ହୋଇପାରେ।