ଭୁବନେଶ୍ବର: କ୍ଷୀର ଦର ବୃଦ୍ଧି ଯୋଗୁଁ ଛେନା ଓ ପନିର ଦର ବଢ଼ିଛି। ଆସନ୍ତା ୧୫ ତାରିଖରୁ ନୂଆ ବର୍ଦ୍ଧିତ ଦର ଲାଗୁ ହେବ। ଏନେଇ ଭୁବନେଶ୍ୱର ଦୁଗ୍ଧଜାତୀୟ ବ୍ୟବସାୟୀ ସୁରକ୍ଷା ସଂଘ ପକ୍ଷରୁ ଅତିରିକ୍ତ ଜିଲାପାଳଙ୍କୁ ଲିଖିତ ଭାବେ ଅବଗତ କରାଯାଇଥିବା ବେଳେ ବିଭିନ୍ନ ବ୍ୟବସାୟୀ ଓ ମିଷ୍ଟାନ୍ନ ଦୋକାନକୁ ମଧ୍ୟ ସୂଚିତ କରାଯାଇଛି।
ସଂଘ ପକ୍ଷରୁ କୁହାଯାଇଛି ଯେ, କ୍ଷୀର ଲିଟର ପିଛା ପ୍ରାୟ ୪ ଟଙ୍କା ଅଧିକ ଦେଇ ସଂଗ୍ରହ କରାଯାଉଛି। ଏଥିସହ ଗୋ-ଖାଦ୍ୟର ଦର ମଧ୍ୟ ବଢ଼ିଛି। ଏହାର ପ୍ରଭାବରେ ଛେନା ଓ ପନିର ଦର ବୃଦ୍ଧି କରାଯାଇଛି ବୋଲି ସଂଘ ସଭାପତି ନବକିଶୋର ବେହେରା ଓ ସମ୍ପାଦକ ଦିଲୀପ ବେହେରା ସୂଚନା ଦେଇଛନ୍ତି।
ନୂଆ ଦର ଅନୁସାରେ, ଛେନା କେଜି ପ୍ରତି ୨୧୫ ଟଙ୍କାରୁ ୨୦ ଟଙ୍କା ବଢ଼ି ୨୩୫ ଟଙ୍କା ହୋଇଛି। ସେହିପରି ପନିର କେଜି ପ୍ରତି ୨୬୦ ଟଙ୍କାରୁ ୩୦ ଟଙ୍କା ବଢ଼ି ୨୯୦ ଟଙ୍କାରେ ପହଞ୍ଚିଛି।