ମହାରାଷ୍ଟ୍ର: ଉଚ୍ଚଶିକ୍ଷା ହାସଲ କରୁଥିବା ଛାତ୍ରୀମାନଙ୍କୁ ଆର୍ଥିକ ସହାୟତା ଦେବାକୁ ମହାରାଷ୍ଟ୍ର ସରକାର ନୂଆ ଯୋଜନା ଆଣିବାକୁ ବିଚାର କରୁଛନ୍ତି। ଏହି ଯୋଜନାରେ ଛାତ୍ରୀମାନଙ୍କୁ ପ୍ରତି ମାସରେ ୨,୦୦୦ ଟଙ୍କା ପକେଟ ମନି ଦେବାର ପ୍ରସ୍ତାବ ରହିଛି। ଏଥିପାଇଁ କର୍ପୋରେଟ ସାମାଜିକ ଦାୟିତ୍ୱ ପାଣ୍ଠି ବ୍ୟବହାର କରିବାକୁ ସରକାର ବିଚାର କରୁଛନ୍ତି। ଉଚ୍ଚଶିକ୍ଷା ଓ ବୈଷୟିକ ଶିକ୍ଷା ମନ୍ତ୍ରୀ ଚନ୍ଦ୍ରକାନ୍ତ ପାଟିଲ ଛାତ୍ରଛାତ୍ରୀଙ୍କ ସହ ଆଲୋଚନା ବେଳେ ଏହି ପ୍ରସ୍ତାବ ସମ୍ପର୍କରେ ସୂଚନା ଦେଇଛନ୍ତି। ଆର୍ଥିକ ଅସୁବିଧା ଯୋଗୁଁ ଯେପରି ଛାତ୍ରୀମାନଙ୍କ ଉଚ୍ଚଶିକ୍ଷା ବାଧାପ୍ରାପ୍ତ ନହୁଏ, ତାହାକୁ ଲକ୍ଷ୍ୟ କରି ଏହି ପଦକ୍ଷେପ ନେବାକୁ ସରକାର ଚାହୁଁଛନ୍ତି।
ମନ୍ତ୍ରୀଙ୍କ ଅନୁଯାୟୀ, ‘କମାଅ ଏବଂ ଶିଖ’ ଯୋଜନାର ଆଧାରରେ ଉଚ୍ଚଶିକ୍ଷା ଗ୍ରହଣ କରୁଥିବା ଛାତ୍ରୀମାନଙ୍କୁ ମାସିକ ୨,୦୦୦ ଟଙ୍କା ଜେବ ଖର୍ଚ୍ଚ ଦେବାର ଯୋଜନା ଉପରେ ବିଚାର ଚାଲିଛି। ଏହି ଟଙ୍କା ଛାତ୍ରୀମାନଙ୍କ ଛୋଟମୋଟ ଆବଶ୍ୟକତା ପୂରଣରେ ସହାୟକ ହୋଇପାରିବ।ଯୋଜନାକୁ କାର୍ଯ୍ୟକାରୀ କରିବା ନେଇ ଉଚ୍ଚ ଓ ବୈଷୟିକ ଶିକ୍ଷା ବିଭାଗ ବିଭିନ୍ନ ବିଶ୍ୱବିଦ୍ୟାଳୟ ଏବଂ ବଡ଼ କଲେଜ ସହ ଆଲୋଚନା କରୁଛି। ତେବେ ଯୋଜନାର ଚୂଡ଼ାନ୍ତ ରୂପରେଖା, ଯୋଗ୍ୟତା ଓ କାର୍ଯ୍ୟକାରୀ ତାରିଖ ସମ୍ପର୍କରେ ଏପର୍ଯ୍ୟନ୍ତ ସବିଶେଷ ଘୋଷଣା ହୋଇନାହିଁ।