ନୂଆଦିଲ୍ଲୀ: ୫ରୁ ୧୭ ବର୍ଷ ବୟସର ପିଲାମାନଙ୍କ ଆଧାରରେ ବାଧ୍ୟତାମୂଳକ ବାୟୋମେଟ୍ରିକ୍ ଅପଡେଟ୍ ପାଇଁ ଏବେ କୌଣସି ଶୁଳ୍କ ଦେବାକୁ ପଡ଼ିବ ନାହିଁ। ୟୁନିକ୍ ଆଇଡେଣ୍ଟିଫିକେସନ୍ ଅଥରିଟି ଅଫ୍ ଇଣ୍ଡିଆ (ୟୁଆଇଡିଏଆଇ) ପକ୍ଷରୁ ଏହି ସୁବିଧା ସେପ୍ଟେମ୍ବର ୩୦ ପର୍ଯ୍ୟନ୍ତ ଜାରି ରହିବ ବୋଲି କୁହାଯାଇଛି। ଅଭିଭାବକମାନଙ୍କୁ ଧାର୍ଯ୍ୟ ସମୟ ମଧ୍ୟରେ ଅପଡେଟ୍ କରାଇବାକୁ କୁହାଯାଇଛି।
ୟୁଆଇଡିଏଆଇ ଅନୁଯାୟୀ, ପିଲା ୫ ବର୍ଷରେ ପହଞ୍ଚିବା ପରେ ପ୍ରଥମ ଥର ଏବଂ ୧୫ ବର୍ଷ ବୟସରେ ପୁଣି ଥରେ ବାଧ୍ୟତାମୂଳକ ବାୟୋମେଟ୍ରିକ୍ ଅପଡେଟ୍ କରିବା ଆବଶ୍ୟକ। ଏଥିରେ ଆଙ୍ଗୁଠି ଛାପ ଓ ଆଖିର ଆଇରିସ୍ ସ୍କାନ୍ ଭଳି ତଥ୍ୟ ଅପଡେଟ୍ କରାଯାଏ। ୫ ବର୍ଷରୁ କମ୍ ପିଲାଙ୍କ ଆଧାର ପଞ୍ଜୀକରଣ ସମୟରେ ମୁଖ୍ୟତଃ ଜନସାଂଖ୍ୟିକ ତଥ୍ୟ ଓ ଫଟୋ ନିଆଯାଏ। ଏହି ବୟସରେ ପିଲାଙ୍କ ବାୟୋମେଟ୍ରିକ୍ ତଥ୍ୟ ବିକାଶଶୀଳ ଥିବାରୁ ଆଙ୍ଗୁଠି ଛାପ ଓ ଆଇରିସ୍ ସ୍କାନ୍ ନିଆଯାଏ ନାହିଁ। ଆଧାର ତଥ୍ୟ ଅପଡେଟ୍ ରହିଲେ ସ୍କୁଲରେ ନାମଲେଖା, ପରୀକ୍ଷା, ଛାତ୍ରବୃତ୍ତି ଓ ବିଭିନ୍ନ ସରକାରୀ ଯୋଜନାର ଲାଭ ନେବା ସମୟରେ ପରିଚୟ ଯାଞ୍ଚ ସହଜ ହୋଇଥାଏ। ତେଣୁ ଶେଷ ମୁହୂର୍ତ୍ତକୁ ଅପେକ୍ଷା ନକରି ନିକଟସ୍ଥ ଆଧାର କେନ୍ଦ୍ରକୁ ଯାଇ ଅପଡେଟ୍ କରାଇବାକୁ ୟୁଆଇଡିଏଆଇ ଅଭିଭାବକମାନଙ୍କୁ ପରାମର୍ଶ ଦେଇଛି।