ଦେଶର କିଛି ରାଜ୍ୟରେ କରୋନାର ଦୈନିକ ସଂକ୍ରମଣ କମୁଥିଲେ ମଧ୍ୟ ରାଜ୍ୟରେ କିନ୍ତୁ ଉପରମୁହାଁ ରହିଛି । ରାଜ୍ୟରେ ଆଜି ବି କରୋନା ସଂକ୍ରମିତଙ୍କ ସଂଖ୍ୟା ୧୧ ହଜାର ଉପରେ ରହିଛି । ଲଗାତର ୧୧ ହଜାର ଉପରେ ସଂକ୍ରମିତଙ୍କ ସଂଖ୍ୟା ରହୁଥିବା ବେଳେ ଚିନ୍ତା ବଢାଇଛି ଖୋର୍ଦ୍ଧା । ଖୋର୍ଦ୍ଧାରେ କରୋନା ଦ୍ରୁତ ଗତିରେ ମାଡୁଥିବା ବେଳେ ଏବେ ୫ ହଜାରମୁହାଁ ହୋଇଛି ସଂକ୍ରମିତଙ୍କ ସଂଖ୍ୟା ।
୨୪ ଘଣ୍ଟା ରେ ୬୯ ହଜାର ୫୦୨ ନମୂନା ପରୀକ୍ଷା ହୋଇଥିବା ବେଳେ ୧୧ ହଜାର ୬୦୭ ଆକ୍ରାନ୍ତ ଚିହ୍ନଟ ହୋଇଛନ୍ତି । ଆକ୍ରାନ୍ତଙ୍କ ମଧ୍ୟର ୦ରୁ ୧୮ ବର୍ଷ ମଧ୍ୟରେ ୯୯୧ ପଜିଟିଭ ଚିହ୍ନଟ ହୋଇଛନ୍ତି । ଖୋର୍ଦ୍ଧାରୁ କେବଳ ୪ ହଜାର ୩୪୭ ପଜିଟିଭ ମାମଲା ଆସିଛି । ତା ପଛକୁ ରହିଛି ସୁନ୍ଦରଗଡ । ସୁନ୍ଦରଗଡରୁ ମଧ୍ୟ୧୨ ଶହ ୧୯ ସଂକ୍ରମିତ ଚିହ୍ନଟ ହୋଇଛନ୍ତି । ସେହିପରି କଟକରୁ ୮୯୮, ସମ୍ବଲପୁରରୁ ୩୯୦, ବାଲେଶ୍ୱରରୁ ୩୦୫, ଯାଜପୁରରୁ ୨୩୧, ରାୟଗଡ଼ାରୁ ୨୨୯, ବଲାଙ୍ଗୀରରୁ ୨୨୯, ଝାରସୁଗୁଡାରୁ ୨୧୯, ନୟାଗଡରୁ ୨୦୬, ଅନୁଗୁଳରୁ ୧୮୫, ମୟୂରଭଞ୍ଜରୁ ୧୭୪ ମାମଲା ଆସିଛି । ମୋଟ ଆକ୍ରାନ୍ତ ସଂଖ୍ୟା ରାଜ୍ୟରେ ୧୧ ଲକ୍ଷ ୬୭ ହଜାର ୯୪ରେ ପହଞ୍ଚିଛି। ସେହିପରି ସକ୍ରିୟ ସଂକ୍ରମିତଙ୍କ ସଂଖ୍ୟା ରହିଛି ୮୪ ହଜାର ୭୭୦
ଓମିକ୍ରନ ଯୋଗୁଁ ସଂକ୍ରମଣ ଅଧିକ ବ୍ୟାପିବାରେ ଲାଗିଛି । ତେବେ ବିଶେଷଜ୍ଞଙ୍କ ଅନୁସାରେ ଜାନୁଆରି ମାସ ଶେଷ କିମ୍ବା ଫେବୃଆରି ପ୍ରଥମ ସପ୍ତାହରେ ସଂକ୍ରମଣ ଶୀର୍ଷକୁ ଛୁଇଁପାରେ ।