କିମ୍ବଦନ୍ତୀ କ୍ରିକେଟର ସେନ୍ ୱାର୍ଣ୍ଣଙ୍କ ଦେହାନ୍ତ ପରେ ପୁରା କ୍ରିକେଟ ଜଗତ ସ୍ତବ୍ଧ ହୋଇଛି । ୫୨ ବର୍ଷ ବୟସରେ ଥାଇଲାଣ୍ଡରେ ଆଖିବୁଜିଛନ୍ତି ସେନୱାର୍ଣ୍ଣ। ଥାଇଲାଣ୍ଡ ଛୁଟି କାଟିବାକୁ ଯାଇଥିବା ବେଳେ ସେଠାରେ ହିଁ ତାଙ୍କର ପରଲୋକ ହୋଇଛି । ସେନ୍ ୱାର୍ଣ୍ଣଙ୍କ ହୃଦଘାତ ସମୟରେ ତାଙ୍କ ସହ ୩ ଜଣ ସାଙ୍ଗ ମଧ୍ୟ ରହିଥିବା ଜଣାପଡିଛି । ସୂଚନା ଅନୁସାରେ, ଏହି ୩ ଜଣ ସାଙ୍ଗ ପାଖାପାଖି ୨୦ ମିନିଟ ଧରି ସେନ୍ ୱାର୍ଣ୍ଣଙ୍କ ଜୀବନ ବଞ୍ଚାଇବାକୁ ସଂଘର୍ଷ କରିଥିଲେ । କିନ୍ତୁ ସେ ସଫଳ ହୋଇପାରିନଥିଲେ । ଏହି ସୂଚନା, ମାମଲାର ତଦନ୍ତ କରୁଥିବା ଥାଇଲାଣ୍ଡ ପୁଲିସ ଦେଇଛି ।
ଥାଇଲାଣ୍ଡ ପୁଲିସର ସୂଚନା ଅନୁସାରେ, କୋ ସାମଉଇରେ ଥିବା ଗୋଟିଏ ପ୍ରାଇଭେଟ ଭିଲ୍ଲାରେ ସେନ୍ ୱାର୍ଣ୍ଣ ଓ ତାଙ୍କ ୩ ଜଣ ସାଙ୍ଗ ରହୁଥିଲେ । ଶୁକ୍ରବାର ଦିନ ରାତ୍ରି ଖାଇବା ପାଇଁ ସେନ ୱାର୍ଣ୍ଣ ତଳକୁ ଆସିନଥିଲେ । ଜଣେ ସାଙ୍ଗ ତାଙ୍କୁ ଖାଇବାକୁ ଡାକିବାକୁ ଯାଇଥିଲେ । ସେହି ସମୟରେ ସେ ସେନ୍ ୱାର୍ଣ୍ଣଙ୍କୁ ଅଚେତ ଅବସ୍ଥାରେ ଦେଖିବାକୁ ପାଇଥିଲେ । ସେତେବେଳେ ସାଙ୍ଗମାନେ ତାଙ୍କୁ ସିଆରପି ଜରିଆରେ ତାଙ୍କର ଜୀବନ ବଞ୍ଚାଇବାକୁ ଚେଷ୍ଟା କରିଥିଲେ । ଆମ୍ବୁଲାନ୍ସକୁ ମଧ୍ୟ ଫୋନ କରିଥିଲେ । ଏହା ପରେ ତାଙ୍କୁ ସାଙ୍ଗେ ସାଙ୍ଗେ ଥାଇ ଇଂଟରନ୍ୟାସନାଲ ହସ୍ପିଟାଲକୁ ନିଆଯାଇଥିଲା । ସେଠାରେ ପାଖାପାଖି ୫ ମିନିଟ ଯାଏ ୱାର୍ଣ୍ଣଙ୍କୁ ସିଆରପି ଦିଆଯାଇଥିଲା । କିନ୍ତୁ ୱାର୍ଣ୍ଣଙ୍କ ଜୀବନ ବଞ୍ଚାଇପାରିନଥିଲେ । ୱାର୍ଣ୍ଣଙ୍କ ଦେହାନ୍ତ ଖବର କ୍ରିକେଟ ଜଗତକୁ ସ୍ତବ୍ଧ କରିଦେଇଥିବା ବେଳେ ଏହାକୁ କିଏ ସହଜରେ ଗ୍ରହଣ କରିପାରୁନାହାନ୍ତି । ହୃଦଘାତର କିଛି ଘଣ୍ଟା ପୂର୍ବରୁ ୱାର୍ଣ୍ଣ ନିଜ ଦେଶର କ୍ରିକେଟର ରଡନୀ ମାର୍ଶଙ୍କ ଦେହାନ୍ତରେ ଟୁଇଟ କରି ଦୁଃଖ ପ୍ରକାଶ କରିଥିଲେ ।