ଭୁବନେଶ୍ୱର: ରାଜ୍ୟ ସରକାରଙ୍କ ୫ଟି କାର୍ଯ୍ୟକ୍ରମକୁ ନେଇ ବିଜେଡି-ବିଜେପି ମୁହାଁମୁହିଁ ହୋଇଛନ୍ତି । ଆଜି ପୂର୍ବତନ ପ୍ରଶାସିକା ତଥା ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ ଏହି କାର୍ଯ୍ୟକ୍ରମ ଉପରେ ପ୍ରଶ୍ନ ଉଠାଇଥିବା ବେଳେ ପୂର୍ବତନ ପ୍ରଶାସକ ତଥା ଭୁବନେଶ୍ୱର ଲୋକସଭା ଆସନର ବିଜେଡି ପ୍ରାର୍ଥୀ ଅରୁପ ପଟ୍ଟନାୟକ ଏହାର ଜବାବ ଦେଇଛନ୍ତି । ବିଜେଡି ପକ୍ଷରୁ ସାଂସଦ ସସ୍ମିତ ପାତ୍ର ମଧ୍ୟ ଏହି ପ୍ରସଙ୍ଗକୁ ନେଇ ବିଜେପି ସାଂସଦଙ୍କୁ ସମାଲୋଚନା କରିଛନ୍ତି ।
କିନ୍ତୁ ବିଜେଡି-ବିଜେପିର ଏଭଳି ତୁ ତୁ ମେ ମେ ରାଜନୈତିକ ମହଲକୁ ଚର୍ଚ୍ଚା ପାଇଁ ଭିନ୍ନ ଖୋରାକ ଯୋଗାଇଛି । ସରକାରଙ୍କର ୫ଟି ଏକ ବିଭାଗ ନୁହେଁ, ବରଂ ଏକ ବିଚାରଧାରା, ଯାହାକୁ ମୁଖ୍ୟମନ୍ତ୍ରୀ ପ୍ରତ୍ୟକ୍ଷ ଭାବେ ପରିଚାଳନା କରୁଛନ୍ତି । ଏହି ବିଚାରାଧାରା ମାଧ୍ୟମରେ ବିଭିନ୍ନ ବିଭାଗକୁ ଉତ୍ତରଦାୟୀ କରିବା ଲାଗି ଏହା ଏକ ଫର୍ମୁଲା ଭାବେ ବିବେଚନା କରାଯାଇପାରେ । ମୁଖ୍ୟମନ୍ତ୍ରୀ ନିଜ ବ୍ୟକ୍ତିଗତ ସଚିବ ଭି କାର୍ତିକେୟନ ପାଣ୍ଡିଆନଙ୍କୁ ଏହି ବିଚାରଧାରାର ତଦାରଖ ଦାୟିତ୍ୱ ଦେଇଛନ୍ତି ।
ହେଲେ ବିଜେପି ଏହି ପ୍ରସଙ୍ଗକୁ ଆୟୁଧ କରି ପୁଣି ଏକ ସଙ୍ଗିନ୍ ଭୁଲ କରୁଥିବା ରାଜନୈତିକ ପର୍ଯ୍ୟବେକ୍ଷକ ମହଲ ମତ ରଖିଲେଣି । କାରଣ କେଉଁଠି ନା କେଉଁଠି ଏହା କରି ବିଜେପି ପରୋକ୍ଷରେ ରାଜ୍ୟ ସରକାରଙ୍କ କାର୍ଯ୍ୟକ୍ରମର ପ୍ରଚାର ପ୍ରସାର ଦାୟିତ୍ୱ ତୁଲାଇଛି । ଏହି ପ୍ରସଙ୍ଗକୁ ନେଇ ଯେତେ ବିତର୍କ ହେବ, ତାହା ସେତିକି ତଳକୁ ଭେଦିବ ଓ ଲୋକଙ୍କ ମନ ଭିତରେ ଥିବା ଦ୍ୱନ୍ଦ୍ୱ ଦୂର ହେବ । ରାଜ୍ୟ ସରକାର ଏହା ହିଁ ଚାହାନ୍ତି । କିନ୍ତୁ ବିଜେପି ଏହା ଦ୍ୱାରା କ୍ଷତିଗ୍ରସ୍ତ ହେବ । ଲୋକଙ୍କ ମନରେ ଯେତିକି ସରକାରଙ୍କ ପାଇଁ ଦରଦ ସୃଷ୍ଟି ହେବ, ତାହା ସେତିକି ବିଜେପି ପାଇଁ ଘାତକ । ବରଂ ବିଜେପି ଲୋକଙ୍କ ସମସ୍ୟାକୁ ୫ଟି ଦର୍ପଣରେ ପରଖିଲେ ଯାଇ ଲୋକଙ୍କ ଭିତରେ ତାଙ୍କ ପ୍ରତି ସହାନୁଭୂତି ସୃଷ୍ଟି ହୋଇପାରେବୋଲି ଏହି ମହଲ ଯୁକ୍ତି ରଖୁଛନ୍ତି ।
ପୂର୍ବରୁ ବିଜେପି ଏଭଳି ଅନେକ ଭୁଲ କରିଛି । ରାଜ୍ୟ ସରକାରଙ୍କର ଯେଉଁ ଯୋଜନାକୁ ନେଇ ଗ୍ରହଣୀୟତା ବଢୁଛି, ସେହି ଯୋଜନାକୁ ନେତାମାନେ ଆଙ୍ଗୁଠି ଉଠାଇ ଶରବ୍ୟର ହୋଇଛନ୍ତି । ବରଂ ୫ଟି ଦ୍ୱାରା ଯଦି ନିର୍ଦିଷ୍ଟ ସମୟ ଭିତରେ କିଛି ବି ପରିବର୍ତନ ନ ହୁଏ, ତେବେ ବିଜେପି ସମାଲୋଚନା କଲେ ତାହା ଫଳପ୍ରଦ ହେବ ବୋଲି କୁହାଯାଉଛି ।