ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କର ରେପୋରେଟ ୬ ଦଶମିକ ୫ ପ୍ରତିଶତରେ ରହିଲା ଅପରିବର୍ତ୍ତିତ । ଗତବର୍ଷ ମେ ମାସ ପର ଠାରୁ ୬ ଥର ରେପୋରେଟ ବୃଦ୍ଧି ପରେ ଚଳିତ ଥର ଏହି ହାର ଅପରିବର୍ତ୍ତିତ ରହିଛି । ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ କହିଛନ୍ତି- ମୁଦ୍ରାନୀତି ନେଇ ବସିଥିବା ମନିଟାରୀ ପଲିସି କମିଟିର ବୈଠକରେ ରେପୋରେଟ ଅପରିବର୍ତ୍ତିତ ରଖିବା ଲାଗି ନିଷ୍ପତ୍ତି ନିଆଯାଇଛି ।
ଦେଶରେ ମୁଦ୍ରାସ୍ଫୀତିକୁ ନିୟନ୍ତ୍ରଣରେ ରଖିବା ଲାଗି ଗତବର୍ଷ ମେ ମାସ ଠାରୁ ଆରବିଆଇ ଲଗାତର ରେପୋରେଟ ବଢ଼ାଇଥିଲେ । ୨୦୨୪ ଆର୍ଥିକ ବର୍ଷରେ ମୁଦ୍ରାସ୍ଫୀତି ହାର ୫ ଦଶମିକ ୨ ପ୍ରତିଶତ ରହିବା ଲାଗି ଆରବିଆଇ ଆକଳନ କରିଛି । ଏହାସହ ଚଳିତ ଆର୍ଥିକ ବର୍ଷର ପ୍ରଥମ ତ୍ରୟମାସିକିରେ ଏହି ହାର ୫ ଦଶମିକ ୧ ପ୍ରତିଶତ ରହିବ ବୋଲି ଆକଳନ କରାଯାଇଛି ।
ରାଜସ୍ବବର୍ଷ ୨୦୨୪ ଲାଗି ଜିଡିପି ଅଭିବୃଦ୍ଧି ହାର ୬ ଦଶମିକ ୫ ପ୍ରତିଶତ ରଖିଛନ୍ତି ରିଜର୍ଭ ବ୍ୟାଙ୍କ । ବ୍ୟାଙ୍କକୁ ଯେଉଁହାରରେ ରିଜର୍ଭ ବ୍ୟାଙ୍କ ଋଣ ଦିଏ ତାହାକୁ କୁହାଯାଇଥାଏ ରେପୋରେଟ । ଯଦି ରେପୋରେଟରେ ସାମାନ୍ୟ ପରିବର୍ତ୍ତନ ହେବ ତେବେ ତାହା ବ୍ୟାଙ୍କ ଲୋନ ଓ ଇଏମଆଇକୁ ପ୍ରଭାବିତ କରିଥାଏ ।