ନୂଆଦିଲ୍ଲୀ: ଭାରତ ଫେରିଛନ୍ତି ଷ୍ଟାର ରେସଲର ଭିନେଶ ଫୋଗାଟ। ଦିଲ୍ଲୀ ବିମାନବନ୍ଦରରେ ପହଞ୍ଚିବା ପରେ ତାଙ୍କୁ ଜୋରଦାର ସ୍ବାଗତ କରାଯାଇଛି। ଜଣେ ଗୋଲ୍ଡ ମେଡାଲିଷ୍ଟଙ୍କୁ ଯେପରି ସ୍ୱାଗତ କରାଯାଏ, ଭିନେଶଙ୍କୁ ଠିକ୍ ସେହିପରି ସ୍ୱାଗତ କରାଯାଇଛି। ଫ୍ୟାନଙ୍କ ଏ ଭଲ ପାଇବା ଏବଂ ସମର୍ଥନ ଦେଖି ଭାବୁକ ହୋଇ ପଡିଛନ୍ତି ଭିନେଶ। ସେ ଏହି ସମୟରେ କାନ୍ଦି ପକାଇଥିବା ଦେଖିବାକୁ ମିଳିଛି। ତେବେ ଭିନେଶ ଭାରତ ଫେରିବା ପୂର୍ବରୁ ଶୁକ୍ରବାର ସୋସିଆଲ ମିଡିଆରେ ଏକ ଲମ୍ବା ପୋଷ୍ଟ ଲେଖିଛନ୍ତି। ଏଥିରେ ସେ ତାଙ୍କ ଅବସର ଉପରେ ଏକ ସମ୍ଭାବ୍ୟ ୟୁ-ଟର୍ଣ୍ଣ ସଙ୍କେତ ଦେଇଛନ୍ତି। ପ୍ୟାରିସ ଅଲିମ୍ପିକ୍ସରେ ମିଳିତ ରୌପ୍ୟ ପଦକ ପାଇଁ ଆବେଦନ ପ୍ରତ୍ୟାଖ୍ୟାନ ହେବାର ଦୁଇ ଦିନ ପରେ ଏହି ପୋଷ୍ଟ ସେୟାର କରିଛନ୍ତି ଭିନେଶ ।
ଭାରତ ଫେରିବାର ଗୋଟିଏ ଦିନ ପୂର୍ବରୁ ଭାରତୀୟ ରେସଲର ସୋସିଆଲ ମିଡିଆରେ ଏକ ଲମ୍ବା ଏବଂ ଭାବପ୍ରବଣ ପୋଷ୍ଟ ଲେଖି ସେୟାର କରିଛନ୍ତି, ଯେଉଁଥିରେ ଲେଖାଯାଇଛି ଯେ ବୋଧହୁଏ ବିଭିନ୍ନ ପରିସ୍ଥିତିରେ ମୁଁ ୨୦୩୨ ପର୍ଯ୍ୟନ୍ତ ଖେଳିପାରେ। ଏହି ପୋଷ୍ଟରେ ଭିନେଶ ନିଜ କୋଚ ଓ ସହଯୋଗୀ ଷ୍ଟାଫଙ୍କୁ କୃତଜ୍ଞତା ଜଣାଇଛନ୍ତି ।
ଭାରତୀୟ କୁସ୍ତିଯୋଦ୍ଧା ୩ ପୃଷ୍ଠାର ଚିଠି ଶେୟାର କରି ନିଜର ମତ ରଖିଛନ୍ତି। ଫୋଗଟ କହିଛନ୍ତି ଯେ ପ୍ୟାରିସ ଅଲିମ୍ପିକ୍ସ ପରେ ଯଦି ଏପରି ପରିସ୍ଥିତି ସୃଷ୍ଟି ହୋଇନଥାନ୍ତା, ତେବେ ମୁଁ କୁସ୍ତିକୁ ବିଦାୟ ଦେଇ ନ ଥା’ନ୍ତି, ବରଂ ୨୦୩୨ ପର୍ଯ୍ୟନ୍ତ କୁସ୍ତି ଜାରି ରଖିଥା’ନ୍ତି। କିନ୍ତୁ ପ୍ୟାରିସ ଅଲିମ୍ପିକ୍ସ ପରେ ଯେଉଁ ପରିସ୍ଥିତି ସୃଷ୍ଟି ହୋଇଥିଲା, କୁସ୍ତିକୁ ବିଦାୟ ଦେବାକୁ ପଡିଲା। ଏଥି ସହିତ ଭିନେଶ ଏହି ଚିଠି ମାଧ୍ୟମରେ ଅବସରରୁ ୟୁଟର୍ନ ନେବାକୁ ସୂଚିତ କରୁଛନ୍ତି କି ବୋଲି ଚର୍ଚ୍ଚା ହେଉଛି। ଭିନେଶ ଆହୁରି ଲେଖିଛନ୍ତି, ହୋଇପାରେ ନିଜକୁ ୨୦୩୨ ପର୍ଯ୍ୟନ୍ତ ବିଭିନ୍ନ ପରିସ୍ଥିତିରେ ଖେଳୁଥିବା ଦେଖିପାରେ, କାରଣ ଯୁଦ୍ଧ ଏବଂ କୁସ୍ତି ମୋ ଭିତରେ ସର୍ବଦା ରହିବ। ଭବିଷ୍ୟତ ମୋ ପାଇଁ କ’ଣ ହେବ ମୁଁ ପୂର୍ବାନୁମାନ କରିପାରିବି ନାହିଁ।
ପ୍ୟାରିସ ଅଲିମ୍ପିକ୍ସ ରେସଲିଂର ୫୦ କେଜି ବର୍ଗରେ ଭାଗ ନେଇଥିଲେ ଭିନେଶ ଫୋଗାଟ। ସମସ୍ତ ପ୍ରାରମ୍ଭିକ ମ୍ୟାଚରେ ଉଚ୍ଚକୋଟୀର ପ୍ରଦର୍ଶନ କରି ଫାଇନାଲରେ ପ୍ରବେଶ କରିଥିଲେ। ଫଳରେ ରେସଲିଂରୁ ଭାରତକୁ ରୌପ୍ୟ ନଚେତ ସ୍ୱର୍ଣ୍ଣ ମିଳିବା ନେଇ ଭିନେଶଙ୍କ ସମେତ ଦେଶବାସୀ ଆଶାବାଦୀ ରହିଥିଲେ। ମାତ୍ର ଫାଇନାଲ ମ୍ୟାଚ୍ ଦିନ ସବୁ କିଛି ବଦଳି ଯାଇଥିଲା। ୫୦ କେଜି ଓଜନରୁ ଭିନେଶ ୧୦୦ ଗ୍ରାମ ଅଧିକ ଥିବାରୁ ତାଙ୍କୁ ପ୍ୟାରିସ ଅଲିମ୍ପିକ୍ସରୁ ଅଯୋଗ୍ୟ ଘୋଷିତ କରା ଯାଇଥିଲା।