ନ୍ୟୁଜ ବ୍ୟୁରୋ: ଟୋଲ୍ ଟିକସ୍ ଦେଉଥିବା ଗାଡ଼ି ମାଲିକଙ୍କ ପାଇଁ ଆସିଛି ନୂଆ ସୁବିଧା। ଜାତୀୟ ରାଜପଥର ଟୋଲ୍ ପ୍ଲାଜାଠାରୁ ୨୦ କିଲୋମିଟର ମଧ୍ୟରେ ରହୁଥିବା ଯୋଗ୍ୟ ଘରୋଇ ଗାଡ଼ି ମାଲିକଙ୍କୁ ରିହାତି ଦରରେ ବାର୍ଷିକ ଟୋଲ୍ ପାସ୍ ମିଳିବ। ଏଥିପାଇଁ ଟୋଲ୍ ପ୍ଲାଜାର ଅବସ୍ଥିତି ଅନୁଯାୟୀ ବର୍ଷକୁ ୧,୫୦୦ କିମ୍ବା ୩,୦୦୦ ଟଙ୍କା ଦେବାକୁ ହେବ। ୨୦୨୬ ନଭେମ୍ବର ୧ରୁ ଏହି ନିୟମ ଲାଗୁ ହେବାକୁ ଥିବାବେଳେ ଏହାର ଲାଭ କେଉଁମାନେ ପାଇବେ, ସେନେଇ ସ୍ପଷ୍ଟ ନିୟମ ରହିଛି।
କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ ଅକ୍ଟୋବର ୨୬ରେ ଏନେଇ ବିଜ୍ଞପ୍ତି ଜାରି କରିଛି। ଏହି ବ୍ୟବସ୍ଥା କେବଳ ଯୋଗ୍ୟ ଅଣବାଣିଜ୍ୟିକ ଗାଡ଼ି ପାଇଁ ଉଦ୍ଦିଷ୍ଟ। ପୌରପାଳିକା କିମ୍ବା ସହରାଞ୍ଚଳ ସୀମା ବାହାରେ ଥିବା ଟୋଲ୍ ପ୍ଲାଜା ପାଇଁ ବାର୍ଷିକ ପାସ୍ର ମୂଲ୍ୟ ୧,୫୦୦ ଟଙ୍କା ଥିବାବେଳେ ସହରାଞ୍ଚଳ ସୀମା ଭିତରେ ଥିବା ଟୋଲ୍ ପ୍ଲାଜା ପାଇଁ ୩,୦୦୦ ଟଙ୍କା ଦେବାକୁ ପଡ଼ିବ।
ପାସ୍ ପାଇବା ପାଇଁ ଗାଡ଼ିରେ ବୈଧ ଓ କାର୍ଯ୍ୟକ୍ଷମ ଫାଷ୍ଟ୍ୟାଗ୍ ରହିବା ଜରୁରୀ। ତେବେ ବିକଳ୍ପ ରାସ୍ତା କିମ୍ବା ସର୍ଭିସ୍ ରୋଡ୍ ଉପଲବ୍ଧ ଥିବା ସ୍ଥାନରେ ଏହି ରିହାତି ମିଳିବ ନାହିଁ। ସେହିପରି ବନ୍ଦ ବ୍ୟବସ୍ଥାରେ ଟୋଲ୍ ଆଦାୟ ହେଉଥିବା ଜାତୀୟ ରାଜପଥ ଓ ଏକ୍ସପ୍ରେସ୍ୱେ ଏହି ସୁବିଧାରୁ ବାଦ୍ ପଡ଼ିବ। ଏହି ପାସ୍ ଦେଶର ସବୁ ଟୋଲ୍ ପ୍ଲାଜାରେ ବ୍ୟବହାର କରିହେବ ନାହିଁ। ଏହା କେବଳ ନିର୍ଦ୍ଦିଷ୍ଟ ଟୋଲ୍ ପ୍ଲାଜାରେ ପ୍ରଯୁଜ୍ୟ ହେବ। ତେଣୁ ଆବେଦନ କରିବା ପୂର୍ବରୁ ନିଜ ଗାଡ଼ିର ଯୋଗ୍ୟତା ଓ ସମ୍ପୃକ୍ତ ଟୋଲ୍ ପ୍ଲାଜାର ନିୟମ ଯାଞ୍ଚ କରିନେବା ଆବଶ୍ୟକ।