ନୂଆଦିଲ୍ଲୀ: ମୁଁ ଜାଣିନି, ଯଦି ଗଣମାଧ୍ୟମ ରିପୋର୍ଟ ସତ ଥାଏ, ତେବେ ମାମଲାଟି ଅତ୍ୟନ୍ତ ଗମ୍ଭୀର।
ପେଗାସସ୍ ସ୍ପାଏ ଓ୍ବେର୍ ଶୁଣାଣି ବେଳେ ଆଜି ଏଭଳି ମତ ରଖିଛନ୍ତି ସୁପ୍ରିମକୋର୍ଟ। ବିରୋଧୀ ଦଳ ନେତା, ଗଣମାଧ୍ୟମ ପ୍ରତିନିଧି ଓ ଅନ୍ୟମାନଙ୍କ ସଂପର୍କରେ ହୋଇଥିବା ଗୁଇନ୍ଦାଗିରିର ସ୍ବତନ୍ତ୍ର ତଦନ୍ତକାରୀ ଦଳ ମାଧ୍ୟମରେ ତଦନ୍ତ କରାଯିବା ପ୍ରସଙ୍ଗକୁ ନେଇ ଆଜି ସୁପ୍ରିମକୋର୍ଟରେ ପାଖାପାଖି ଘଣ୍ଟାଏ ଧରି ଶୁଣାଣି ହୋଇଥିଲା। ମୁଖ୍ୟ ବିଚାରପତି ଏନ୍ ଭି ରମଣାଙ୍କ ନେତୃତ୍ବରେ ଦୁଇଜଣିଆ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ। ଅନ୍ୟ ବିଚାରପତି ହେଉଛନ୍ତି ଜଷ୍ଟିସ୍ ସୂର୍ଯ୍ୟ କାନ୍ତ।
କୋର୍ଟ କହିଥିଲେ, ୨୦୧୯ରେ ଏହି ଗୁଇନ୍ଦାଗିରି ପ୍ରସଙ୍ଗ ଆସିଥିଲା। କିନ୍ତୁ ମୁଁ ଜାଣେ ନାହିଁ ଅଧିକ ସୂଚନା ପାଇଁ କୌଣସି ପ୍ରୟାସ କରାଯାଇଥିଲା କି ନାହିଁ? ପ୍ରତି ମାମଲାର ବିଶଦ ତଥ୍ୟ ଭିତରକୁ ମୁଁ ଯାଉନାହିଁ। କିଛି ଲୋକ କିନ୍ତୁ ଅଭିଯୋଗ କରୁଛନ୍ତି ଯେ ସେମାନଙ୍କ ଟେଲିଫୋନ୍ ଉପରେ ଗୁଇନ୍ଦାଗିରି କରାଯାଉଛି। ଏସବୁ ପୁଣି କେବଳ ଗଣମାଧ୍ୟମ ରିପୋର୍ଟ ଉପରେ ହିଁ କରାଯାଇଛି। ତେବେ ଏ ସଂପର୍କରେ ଅଭିଯୋଗ ପାଇଁ ଟେଲିଗ୍ରାଫ୍ ଆକ୍ଟ ରହିଛି। ଯେଉଁମାନଙ୍କ ପାଇଁ ଏଠାରେ ଅଭିଯୋଗ କରାଯାଉଛି, ସେମାନେ ସମସ୍ତେ ଶିକ୍ଷିତ। କାହିଁକି ସେମାନେ ଟେଲିଗ୍ରାଫ୍ ଆଇନ ମାଧ୍ୟମରେ ଗୋଟିଏ ଅପରାଧିକ ମାମଲା ରୁଜୁ କଲେ ନାହିଁ?
ଆବେଦନକାରୀଙ୍କ ପାଇଁ ଲଢୁଥିବା ବରିଷ୍ଠ ଆଇନଜୀବୀ କପିଲ ଶିବଲ କହିଛନ୍ତି, ପେଗାସସ୍ ହେଉଛି ଏମିତି ଏକ ପ୍ରଯୁକ୍ତି ବିଦ୍ୟା, ଯାହା ଆମ ଅଜାଣତରେ ଆମ ସଂପର୍କରେ ତଥ୍ୟ ଆହରଣ କରୁଛି। ଏହା ଭାରତର ଗଣତନ୍ତ୍ର, ଗୋପନୀୟତା ଓ ମୂଲ୍ୟବୋଧ ଉପରେ ପ୍ରଚଣ୍ଡ ଆକ୍ରମଣ କରୁଛି। ଏ ସଂପର୍କରେ କେବଳ ସରକାର ହିଁ କହିପାରିବେ। ସେମାନେ କାହିଁକି କିଣିଥିଲେ, କଣ ସେମାନଙ୍କର ଉଦ୍ଦେଶ୍ୟ ଥିଲା।
ଦ ୱେୟାର ସମେତ ଭାରତବର୍ଷର ଅନେକ ଗଣମାଧ୍ୟମ ଏହା ଉପରେ ଅନୁସନ୍ଧାନ କରିଛନ୍ତି। ଦ ଓ୍ବେୟାର ଭାରତବର୍ଷର ୩୦୦ ଟେଲିଫୋନ୍ ସଂପର୍କରେ ତଥ୍ୟ ରଖୁଛି। ହେଲେ ତାଲିକାରେ ଥିବା ସମସ୍ତ ଫୋନ୍ ହ୍ୟାକ୍ ହୋଇଛି କି ନାହିଁ, ତାହା ଜଣାନାହିଁ।
ସୁପ୍ରିମକୋର୍ଟରେ ଏହି ପ୍ରସଙ୍ଗରେ ଆଉ ଦୁଇଟି ମାମଲା ରୁଜୁ ହୋଇଥିଲା। ଗୋଟିଏ ସିପିଏମ୍ ସାଂସଦ ଜନ୍ ବ୍ରିଟାସ୍ କରିଛନ୍ତି, ଅନ୍ୟଟି ବରିଷ୍ଠ ଆଇନଜୀବୀ ଏମ୍ ଏଲ୍ ଶର୍ମା।ଏହାଛଡା ସାମ୍ବାଦିକ ଏନ୍ ରାମ ଏବଂ ଶଶି କୁମାର ସୁପ୍ରିମକୋର୍ଟଙ୍କ ତତ୍ତ୍ବାବଧାନରେ ଗୋଟିଏ ସ୍ବତନ୍ତ୍ର ତଦନ୍ତକାରୀ ଦଳ ଦ୍ବାରା ଅନୁସନ୍ଧାନ ପାଇଁ ପ୍ରାର୍ଥନା କରିଥିଲେ।
ତେବେ ସରକାରଙ୍କ ପକ୍ଷରୁ କୌଣସି ଆଇନଜୀବୀ କୋର୍ଟରେ ଠିଆହୋଇନଥିଲେ। ଏହି ମାମଲାର ପରବର୍ତ୍ତୀ ଶୁଣାଣି ମଙ୍ଗଳବାର ରହିଛି।