ରାମ ମନ୍ଦିର ନିର୍ମାଣ: ପଛରେ ରହି ଉସୁକାଇଛି କି ବିଜେପି

ନୂଆଦିଲ୍ଲୀ: ନିର୍ବାଚନ ପାଖେଇ ଆସୁଥିବା ଜାଣି ଏବେ ବିଜେପି ଯୋଜନାବଦ୍ଧ ଭାବେ ପୁଣି ଥରେ ହିନ୍ଦୁତ୍ୱ କାର୍ଡ ଖେଳିବା ଆରମ୍ଭ କରିଛି । ରବିବାର ଉତ୍ତର ପ୍ରଦେଶରେ ସାଧୁସନ୍ଥମାନେ ଏକାଠି ହୋଇ କେନ୍ଦ୍ର ସରକାରଙ୍କ ଉପରେ ରାମ ମନ୍ଦିର ନିର୍ମାଣ ପାଇଁ ଚାପ ପକାଇଛନ୍ତି । ଆଇନ ପ୍ରଣୟନ ହେଉ ବା ଅଧ୍ୟାଦେଶ ବଳରେ ରାମମନ୍ଦିର ନିର୍ମାଣ ପାଇଁ ପଦକ୍ଷେପ ନେବାକୁ କେନ୍ଦ୍ର ସରକାରଙ୍କୁ ସନ୍ଥ ସମିତି ନିର୍ଦେଶ ଦେଇଛି । ସବୁଠାରୁ ବଡ଼ କଥା ହେଉଛି, କେନ୍ଦ୍ରରେ ବିଜେପି ସରକାର ଆଣିବାକୁ ମଧ୍ୟ ସନ୍ଥମାନେ ନିଷ୍ପତ୍ତି ନେଇଛନ୍ତି ଓ ସମସ୍ତଙ୍କୁ ପରାମର୍ଶ ଦେଇଛନ୍ତି ।
ରାମ ମନ୍ଦିର ନିର୍ମାଣ ନେଇ କେନ୍ଦ୍ର ସରକାର ନିଜେ କୌଣସି ମନ୍ତବ୍ୟ ଦେଇ ବିବାଦ ଭିତରକୁ ଯିବାକୁ ଚାହୁଁନାହାନ୍ତି । ବରଂ ଏମିତି ଗୋଟିଚାଳନା ଚଳାଇଛନ୍ତି, ଯେମିତି ସମଗ୍ର ଭାରତ ବର୍ଷରେ ରାମ ମନ୍ଦିର ନିର୍ମାଣ ପ୍ରସଙ୍ଗ ତେଜି ଉଠିବ । ପୂର୍ବରୁ କିଛିି ବିଜେପି ନେତା ଏହା ସପକ୍ଷରେ ନିଜ ମତ ରଖି ଏହି ପ୍ରସଙ୍ଗକୁ ଚର୍ଚ୍ଚାକୁ ଆଣିଥିଲେ । ପରବର୍ତୀ ସମୟରେ ଆର୍‍ଏସ୍‍ଏସ୍‍ ଜନମତ ସୃଷ୍ଟି କରିବା ଲାଗି ଏହି ପ୍ରସଙ୍ଗରେ ମତ ରଖିଥିଲା । ଶେଷରେ ଗତ ଶନିବାର ଠାରୁ ଦୁଇଦିନ ଜାରି ରହିଥିବା ଧରି ଉତ୍ତରପ୍ରଦେଶରେ ଅଖିଳ ଭାରତୀୟ ସନ୍ଥ ସମିତିର ବୈଠକରେ ଏହା ଉପରେ ଠୋସ୍‍ ନିଷ୍ପତ୍ତି ହୋଇଛି । ସାଧୁସନ୍ଥମାନେ ସରକାରଙ୍କୁ ଚରମବାଣୀ ଶୁଣାଇଛନ୍ତି ଯେ କୌଣସି ବି ପରିସ୍ଥିତିରେ ରାମ ମନ୍ଦିର ନିର୍ମାଣ ହେବା ଦରକାର । ସୁପ୍ରିମକୋର୍ଟ କେଉଁଠାରେ ବି ଆଇନ ବା ଅଧ୍ୟାଦେଶ ଆଣିବା ଲାଗି କେନ୍ଦ୍ର ଉପରେ ଅଙ୍କୁଶ ଲଗାଇ ନାହାନ୍ତି । ସୁତରାଂ କେନ୍ଦ୍ର ସରକାର ତୁରନ୍ତ ଏ ନେଇ ପଦକ୍ଷେପ ନେବା ଦରକାର ବୋଲି ସାଧୁସନ୍ଥମାନେ ଶୁଣାଇଛନ୍ତି ।
ଗତମାସରେ ସୁପ୍ରିମକୋର୍ଟ ରାମ ଜନ୍ମଭୂମି-ବାବ୍ରି ମସଜିଦ ଜମି ବିବାଦ ମାମଲାର ଶୁଣାଣି କରି ଜାନୁଆରି ପ୍ରଥମ ସପ୍ତାହରେ ଖଣ୍ଡପୀଠ ଏହାର ବିଚାର କରିବେ ବୋଲି କହିସାରିଛନ୍ତି । ଏହା ପରେ ଅବସରପ୍ରାପ୍ତ ବିଚାରପତି ଚେଲେମେଶ୍ୱର ମଧ୍ୟ ରାମ ମନ୍ଦିର ନିର୍ମାଣ ଲାଗି ଆଇନ କରିବାରେ ସରକାରଙ୍କ ପାଇଁ କିଛି ବାଧକ ନାହିଁ ବୋଲି ସୂଚାଇ କେନ୍ଦ୍ରର ରାସ୍ତାକୁ ଅଧିକ ସୁଗମ କରିଥିଲେ ।
ଉଲ୍ଲେଖଯୋଗ୍ୟ, ପୂର୍ବରୁ ଆର୍‍ଏସ୍‍ଏସ ମୁଖ୍ୟ ମୋହନ ଭାଗବତ ରାମମନ୍ଦିର ନିର୍ମାଣ ସପକ୍ଷରେ ମତ ରଖି ଏହାଦ୍ୱାରା ସଦିଚ୍ଛା ଓ ସଂହତିର ବାତାବରଣ ସୃଷ୍ଟି ହେବ ବୋଲି କହିଥିଲେ । ରାମ ଜନ୍ମଭୂମିରେ ରାମ ମନ୍ଦିର ନିର୍ମାଣ ହେବନି ତ ଆଉ କଣ ହେବ ବୋଲି କହି ବାବା ରାମଦେବ ଏହାକୁ ସମର୍ଥନ କରିବା ସହିତ କିଛି ଭଲ ଖବର ଖୁବଶୀଘ୍ର ଆସିବ ବୋଲି ଆଶା ବ୍ୟକ୍ତ କରିଥିଲେ । ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଗଣମାଧ୍ୟମକୁ କହିଛନ୍ତି ଯେ ରାମଭକ୍ତଙ୍କ ଅପେକ୍ଷାର ବେଳ ସରି ସରି ଆସୁଛି । ଏପଟେ ଚାଓ୍ୱନି ମନ୍ଦିର ମହନ୍ତ ସ୍ୱାମୀ ପରମହଂସ ଦାସ କେନ୍ଦ୍ର ସରକାରଙ୍କୁ ଡିସେମ୍ୱର ୬ ଯାଏ ମାସିକିଆ କଣ୍ଟ ଦେଇଛନ୍ତି, ଅନ୍ୟଥା ଆତ୍ମାହୂତି ଦେବେ ବୋଲି ଧମକ ଦେଇଛନ୍ତି । କେନ୍ଦ୍ରମନ୍ତ୍ରୀ ଉମାଭାରତୀ ରାମ ମନ୍ଦିର ନିର୍ମାଣର ଶିଳାନ୍ୟାସ ରାହୁଲ ଗାନ୍ଧୀ ଦେବା ଉଚିତ ବୋଲି କଟାକ୍ଷ କରିଛନ୍ତି । କହିଛନ୍ତି, ଏହାଦ୍ୱାରା ଆଉ କିଛି ହେଉ କି ନହେଉ କଂଗ୍ରେସର ପାପ ନିଶ୍ଚିତ ଭାବେ ଧୋଇଯିବ ।