ବିଦ୍ରୋହ ଘୋଷଣା କଲେ ଶ୍ରୀକାନ୍ତ, ସବୁ କମିଟିରୁ ଦେଲେ ଇସ୍ତଫା

ଦଳରୁ ତଡି ପାରନ୍ତି ରାହୁଲ, କଂଗ୍ରେସ ଶିବିରରେ ଆଲୋଡନ
ଭୁବନେଶ୍ୱର: ରାଜ୍ୟ କଂଗ୍ରେସରେ ଅନ୍ତଃକନ୍ଦଳ ଧୀରେ ଧୀରେ ଉଗ୍ର ରୂପ ନେବାରେ ଲାଗିଛି । ନିର୍ବାଚନ ପୂର୍ବରୁ ପିସିସି ସଭାପତି ଓ ତାଙ୍କ ଟିମ୍‍ ଏବଂ ବରିଷ୍ଠ ନେତା ଶ୍ରୀକାନ୍ତ ଜେନା ମୁହାଁମୁହିଁ ସ୍ଥିତିକୁ ଚାଲିଆସିଛନ୍ତି । ଦଳ ଭିତରେ ଏକ ଘରକିଆ ହୋଇଯିବା ପରେ ଆଜି ଶ୍ରୀ ଜେନା ଅଧିକ ଆକ୍ରମଣାତ୍ମକ ଆଭିମୁଖ୍ୟ ଗ୍ରହଣ କରି ନେତୃତ୍ୱ ଉପରେ ଚାପ ସୃଷ୍ଟି କରିଛନ୍ତି । ଦଳର କାର୍ଯ୍ୟକାରୀ କମିଟି ଓ ନିର୍ବାଚନ କମିଟିରୁ ସେ ଇସ୍ତଫା ଦେଇଛନ୍ତି । ଏ ସଂପର୍କରେ ସେ ଦଳର ମୁଖିଆ ରାହୁଲ ଗାନ୍ଧୀଙ୍କୁ ଜଣାଇଛନ୍ତି । ପୂର୍ବରୁ ରାହୁଲ ତାଙ୍କୁ ଦଳର ଇସ୍ତାହାର କମିଟିର ମୁଖିଆ ପଦରୁ ବିଦା କରିଥିଲେ ।
ଶ୍ରୀ ଜେନାଙ୍କ ଇସ୍ତଫାକୁ କେନ୍ଦ୍ରୀୟ ନେତୃତ୍ୱ ଗ୍ରହଣ କଲେ କି ନାହିଁ ତାହା ଜଣାପଡିନାହିଁ । କିନ୍ତୁ ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ମୁତାବକ, ଶ୍ରୀକାନ୍ତଙ୍କ ସପକ୍ଷରେ କେନ୍ଦ୍ରୀୟ ନେତୃତ୍ୱ ଆଉ ନାହାନ୍ତି । ବିଶେଷକରି ପୂର୍ବତନ ବିଧାୟକ କୃଷ୍ଣ ଚନ୍ଦ୍ର ଶଗରିଆଙ୍କ କ୍ଷେତ୍ରରେ ତାଙ୍କର ଭୂମିକା, କଂଗ୍ରେସ ବିଧାୟକ ଦଳରେ ଫାଟ ସୃଷ୍ଟି କରିବା ଭଳି ସାଂଘାତିକ ଅଭିଯୋଗ ତାଙ୍କ ନାମରେ ଲାଗିଥିଲା ।
ଏଣୁ ଦଳରେ ବିଶୃଙ୍ଖଳିତ ଆଚରଣ ଅଭିଯୋଗରେ ନେତୃତ୍ୱ ଶ୍ରୀକାନ୍ତଙ୍କୁ ପ୍ରଥମେ ଇସ୍ତାହାର କମିଟିରୁ ବିଦା କରିଥିଲେ । ଏହାପରେ ମଧ୍ୟ ଶ୍ରୀକାନ୍ତ ନରମି ନ ଯାଇ ରାହୁଲଙ୍କ ଏଭଳି ନିଷ୍ପତ୍ତି ବିରୋଧରେ ପରୋକ୍ଷରେ ବିଷୋଦଗାର କରିଥିଲେ । ନିଜେ ଠିକ୍‍, ଆଉ ସମସ୍ତେ ଭୁଲ ଏକଥା ପ୍ରମାଣିତ କରିବା ଲାଗି ସେ ନିର୍ବାଚନ ପୂର୍ବରୁ ଆଉ ଏକ ବୁଥ ବାµ ବସାଇ ଭୋଟ ଗ୍ରହଣ କରିବେ ବୋଲି ଧମକ ଦେଇଥିଲେ । କଂଗ୍ରେସ ରାଜ୍ୟରେ ବିପଜ୍ଜନକ ସ୍ଥିତିରେ ଥିବା ବେଳେ ଶ୍ରୀକାନ୍ତଙ୍କ ଏଭଳି ଉଦ୍ୟମ ରାଜ୍ୟରେ ଦଳକୁ ଆହୁରି ତଳକୁ ଟାଣି ନେଉଥିବା ଧରିନେଇ କେନ୍ଦ୍ରୀୟ ନେତୃତ୍ୱ ତାଙ୍କୁ ଦଳରୁ ବିଦା କରିବା ଲାଗି ଯୋଜନା ଆରମ୍ଭ କରିଥିବା ସୂଚନା ମିଳିଛି । ତେବେ ଏହା ପୂର୍ବରୁ ଶ୍ରୀକାନ୍ତ ସବୁ କମିଟିରୁ ଇସ୍ତଫା ଦେଇ ଏ ରାସ୍ତାକୁ ଆହୁରି ସୁଗମ କରିଦେଇଛନ୍ତି ଓ ସେ ନିଜେ ଦଳ ଛାଡି ଚାଲିଯିବା ଲାଗି ଏକ ପ୍ରକାର ବାଟ ଖୋଲିଥିବା କୁହାଯାଉଛି ।