ଭୁବନେଶ୍ବର: ଆସନ୍ତା ୪୮ ଘଣ୍ଟା ମଧ୍ୟରେ ରାଜ୍ୟକୁ ଶୀତ ଫେରିବାର ସମ୍ବାବନା ନାହିଁ। ବରଂ ୧୪ ଓ ୧୫ ତାରିଖ ବେଳକୁ ସୁନ୍ଦରଗଡ, କେନ୍ଦୁଝର, ମୟୂରଭଂଜ, ବାଲେଶ୍ବର, ଦେବଗଡ ଭଳି ଜିଲ୍ଲାକୁ ବର୍ଷାର ଡର ରହିଛି। ଏସବୁ ଜିଲ୍ଲାରେ ଘଡଘଡି ସହିତ ଅଳ୍ପ ବର୍ଷା ସମ୍ଭାବନାକୁ ଏଡାଇ ଦେଇ ହେବ ନାହିଁ। ପାଣିପାଗ ବିଜ୍ଞାନୀମାନେ ଏଭଳି ପୂର୍ବାନୁମାନ କରୁଛନ୍ତି।
ପାଣିପାଗ ସଂପର୍କରେ ପୂର୍ବାନୁମାନ କରି ସାର୍ଥକ ମିଶ୍ର କହିଛନ୍ତି, ପାଣିପାଗ ପ୍ରୟତଃ ଶୁଖିଲା ରହିବ। ଆକାଶ କିଛି ପରିମାଣ ରେ ମେଘୁଆ ରହିପାରେ। ରାତି ତାପମାତ୍ରା ବିଶେଷ ଭାବରେ ପରିବର୍ତ୍ତନ ହେବାର ନାହିଁ। ଉପକୂଳ ଓଡିଶା ସମେତ ଢେଙ୍କାନାଳ , ସୁନ୍ଦରଗଡ , କେନ୍ଦୁଝର , କନ୍ଧମାଳ , କଳାହାଣ୍ଡି , କୋରାପୁଟ ଜିଲ୍ଲା ରେ ଆଗାମୀ ୨ରୁ ୩ ଦିନ ଯାଏ ଅଳ୍ପରୁ ମଧ୍ୟମ ଧାରଣର କୁହୁଡି ଅନୁଭୂତ ହୋଇପାରେ।
ଗତ ୨୪ ଘଣ୍ଟା ମଧ୍ୟରେ ଓଡିଶାରେ ପାଣିପାଗ ଶୁଖିଲା ରହିଥିଲା। କଳାହାଣ୍ଡି ଓ ଦକ୍ଷିଣ-ଅଭ୍ୟନ୍ତର ଜିଲ୍ଲା ଗୁଡିକରେ କୁହୁଡିର ପ୍ରଭାବ ରହିଥିଲା। ରାତି ତାପମାତ୍ରା ସ୍ୱାଭାବିକ ରହିଥିଲା। ଭୁବନେଶ୍ୱରରେ ସର୍ବାଧିକ ତାପମାତ୍ରା ୩୧ ଡିଗ୍ରି ସେଲସିୟସ ରେକର୍ଡ କରାଯାଇଛି। ସେହିଭଳି ଅନୁଗୁଳ ଓ ଫୁଲବାଣୀ ରେ ସବୁଠାରୁ କମ ୧୧ ଡିଗ୍ରି ସେଲସିୟସ ତାପମାତ୍ରା ରେକର୍ଡ ହୋଇଛି।