ଭୁବନେଶ୍ବର: ଓଡ଼ିଶାରେ ହାତୀ ସୁରକ୍ଷା ପାଇଁ ରାଜ୍ୟ ସରକାର ଅଣ୍ଟା ଭିଢିଛନ୍ତି। ଭୁବନେଶ୍ବର ଜୟଦେବ ଭବନରେ ଏକ ସ୍ବେଚ୍ଛାସେବୀ ସଂସ୍ଥା ଆନୁକୂଲ୍ୟରେ ହାତୀ-ମଣିଷ ମଧ୍ୟରେ ସୃଷ୍ଟି ହେଉଥିବା ମୁହାଁମୁହିଁ ପରିସ୍ଥିତି ସଂପର୍କରେ ଏକ କର୍ମଶାଳା ଚାଲିଥିବା ବେଳେ ଅନ୍ୟପଟରେ ଆଜି ପ୍ରଧାନ ମୁଖ୍ୟ ବନ ସଂରକ୍ଷକ (ବନ୍ୟପ୍ରାଣୀ) ହରିଶଙ୍କର ଉପାଧ୍ୟାୟ ଏ ସଂପର୍କରେ କିଛି ବଡ଼ ନିଷ୍ପତ୍ତି ଶୁଣାଇଛନ୍ତି। ଶ୍ରୀ ଉପାଧ୍ୟାୟ ଗଣମାଧ୍ୟମ ପ୍ରତିନିଧିଙ୍କୁ କହିଛନ୍ତି, ଖୁବ୍ ଶୀଘ୍ର ଦକ୍ଷିଣ ଓଡିଶାରେ ହାତୀ ଅଭାୟାରଣ୍ୟ ଘୋଷଣା କରାଯିବ। କନ୍ଧମାଳ ଓ ବ୍ରହ୍ମପୁର ମଧ୍ୟବର୍ତ୍ତୀ ଅଞ୍ଚଳରେ ଏହି ଅଭୟାରଣ୍ୟ କରାଯିବ।
କେବଳ ସେତିକି ନୁହେଁ,ହାତୀ ସୁରକ୍ଷାରେ ଟେକ୍ନୋଲୋଜିର ବ୍ୟବହାର ପାଇଁ ଆଇଆଇଟି ଭୁବନେଶ୍ୱର ସହ ବନ ବିଭାଗର ଆଲୋଚନା ଆରମ୍ଭ ହୋଇଛି। ହାତୀଙ୍କ ଶବ୍ଦ ଦୂରରୁ ଶୁଣି କିଭଳି ଲୋକଙ୍କୁ ସତର୍କ କରାଯିବ, ସେ ଦିଗରେ ଠୋସ୍ ରାସ୍ତା ନିର୍ଣ୍ଣଯ କରାଯିବ। ଏଥିପାଇଁ ନୂତନ ଇନଫ୍ରା ରେଞ୍ଜ ଯନ୍ତ୍ର ପ୍ରସ୍ତୁତ କରାଯିବ। ଏହାବ୍ୟତୀତ ବିଭାଗ ସ୍ଥିର କରିଛି ଯେ ରାଜ୍ୟ ଜଙ୍ଗଲରେ ଦୁର୍ଦାନ୍ତ ଅବସ୍ଥାରେ ବୁଲୁଥିବା ତିନି ହାତୀଙ୍କ ବେକରେ ରେଡିଓ କଲାର ଲଗାଯିବ। ଏହାଦ୍ବାରା ସେମାନଙ୍କ ଗତିବିଧି ସଂପର୍କରେ ଜାଣିହେବ।