ନୂଆଦିଲ୍ଲୀ: କିଛି ବର୍ଷ କାମ କରିବା ପରେ ସରକାରୀ କର୍ମଚାରୀଙ୍କ ଚାକିରି ଉପରୁ ମୋହ ତୁଟିଯାଉଥିଲା। କିଏ ବଡ଼ ଚାକିରି ପାଇଁ , ଆଉ କିଏ ରାଜନୀତି ମଇଦାନରେ ପାଦ ଥାପିବା ଲାଗି ଇସ୍ତଫା ଦେଉଥିଲେ।
ସରକାର କର୍ମଚାରୀଙ୍କୁ ଏ କ୍ଷେତ୍ରରେ ବଡ଼ ଝଟକା ଲାଗିଛି। ସର୍ବୋଚ୍ଚ ଅଦାଲଚ ଏକ ରାୟରେ କହିଛନ୍ତି, ସରକାରୀ ଚାକିରିରୁ ଇସ୍ତଫା ଦେଉଥିବା କର୍ମଚାରୀ ଆଉ ପେନସନ୍ ପାଇବାକୁ ହକଦାର ନୁହଁନ୍ତି।ସ୍ବେଚ୍ଛାକୃତ ଅବସର ଓ ଇସ୍ତଫା ଗୋଟିଏ କଥା ନୁହେଁ। ଏ ସଂକ୍ରାନ୍ତରେ ଦିଲ୍ଲୀ ହାଇକୋର୍ଟଙ୍କ ଏକ ରାୟକୁ ଖାରଜ କରି ବିଚାରପତି ଡି ଵାଇ ଚନ୍ଦ୍ରଚୂଡ ଓ ବିଚାରପତି ହୃଷିକେଶ ରାୟଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି, ଇସ୍ତଫା କ୍ଷେତ୍ରରେ ଜଣେ କର୍ମଚାରୀର ଅତୀତର ସବୁ ସେବା ବାଜ୍ୟାପ୍ତ ହୋଇଯାଇଥାଏ। ତେଣୁ ସେ ପେନସନ୍ ପାଇବାକୁ ହକଦାର ନୁହେଁ।
ବିଏସ୍ଇଏସ୍ ଯମୁନା ପାଵାର ପ୍ରାଇଭେଟ୍ ଲିମିଟେଡ୍ ପକ୍ଷରୁ ଦାୟର ଏକ ମାମଲାର ଶୁଣାଣି କରି ସର୍ବୋଚ୍ଚ ଅଦାଲତ କହିଛନ୍ତି, ଜଣେ କର୍ମଚାରୀ ଥରେ ଇସ୍ତଫା ଦେବା ପରେ ସ୍ବେଚ୍ଛାକୃତ ଅବସର କଥା ମଧ୍ୟ ଉଠାଯାଇପାରିବ ନାହିଁ। ଉଭୟ ସ୍ବେଚ୍ଛାକୃତ ଅବସର ଓ ଇସ୍ତଫା କର୍ମଚାରୀର ଇଚ୍ଛାଧୀନ ବ୍ୟାପାର। ଇସ୍ତଫା କ୍ଷେତ୍ରରେ ଜଣେ କର୍ମଚାରୀ ନିଜ ଇଚ୍ଛାନୁସାରେ ଏହାକୁ ନିଜ ଅଧିକାରୀଙ୍କ ନିକଟରେ ଉପସ୍ଥାପନ କରିଥାଏ। ମାତ୍ର ସ୍ବେଚ୍ଛାକୃତ ଅବସର କ୍ଷେତ୍ରରେ କର୍ମଚାରୀ ଜଣେ ନିର୍ଧାରିତ ସମୟର ସେବା ପୂରଣ ପରେ ଆବେଦନ କରିବାକୁ ହକଦାର ହୋଇଥାଏ। ତେଣୁ ଇସ୍ତଫା କ୍ଷେତ୍ରରେ କର୍ମଚାରୀ ଜଣକ ପେନସନ୍ ପାଇଁ ହକଦାର ହେବ ନାହିଁ ଓ ସ୍ବେଚ୍ଛାକୃତ ଅବସର କ୍ଷେତ୍ରରେ କର୍ମଚାରୀ ପେନସନ୍ ପାଇବ ହିଁ ପାଇବ। ଜଣେ କର୍ମଚାରୀ ୨୦ ବର୍ଷ ଚାକିରି କରିବା ପରେ ଇସ୍ତଫା ଦେଇଥିବା ଘଟଣାରେ ଦିଲ୍ଲୀ ହାଇକୋର୍ଟ ତାଙ୍କୁ ପେନସନ୍ ଦେବାକୁ ନିର୍ଦେଶ ଦେଇଥିଲେ।