- ୧୧୯ ଅବସରପ୍ରାପ୍ତ ଅଧିକାରୀଙ୍କୁ ନିଯୁକ୍ତି ଦେବାକୁ ଯୋଜନା
- ମାସିକ ୧୭ ହଜାର ଟଙ୍କା ଦରମାରେ ସେମାନେ କାମ କରିବେ
- ସଡକ ସୁରକ୍ଷା ପାଣ୍ଠିରୁ ଖର୍ଚ୍ଚ ହେବ ଗାଡି, ତେଲ ଆଦି ବାବଦ ଅର୍ଥ
ଭୁବନେଶ୍ବର: ସଡକ ଦୁର୍ଘଟଣା ରୋକିବା ଲାଗି ରାଜ୍ୟ ସରକାର ଏକ ବଡ଼ ପଦକ୍ଷେପ ନେବାକୁ ଯାଉଛନ୍ତି। ଜାତୀୟ ରାଜପଥରେ ପାଟ୍ରୋଲିଂ ବ୍ୟବସ୍ଥାକୁ କଡାକଡି କରାଯିବ। ଏଥିଲାଗି ସରକାର ଅବସରପ୍ରାପ୍ତ ପୁଲିସ ଅଧିକାରୀଙ୍କୁ ନିଯୁକ୍ତି ଦେବାକୁ ଚାହୁଁଛନ୍ତି। ପାଞ୍ଚଟି ରାଜପଥରେ ବିଶେଷକରି ଏହି କାର୍ଯ୍ୟ ଆରମ୍ଭ ହେବ।
ବିଶ୍ବସ୍ତ ସୂତ୍ରରୁ ମିଳୁଥିବା ସୂଚନା ଅନୁସାରେ, ପୁରୀ ଠାରୁ ଭୁବନେଶ୍ବର, ୬୦ କିଲୋମିଟର ଦୀର୍ଘ ରାଜପଥ ଦୁର୍ଘଟଣା ପ୍ରବଣ ହୋଇଥିବା କାରଣରୁ ସେଠାରେ ପାଟ୍ରୋଲିଂ ବ୍ୟବସ୍ଥାକୁ ଜୋରଦାର କରାଯିବ। ସେହିଭଳି ସମ୍ବଲପୁର ଠାରୁ ସୋହେଲା ଦୀର୍ଘ ୭୨ କିଲୋମିଟର, ମଙ୍ଗୁଳି ଠାରୁ ସମ୍ବଲପୁର ୨୬୫ କିଲୋମିଟର, ଜଳେଶ୍ବର ଠାରୁ ଇଚ୍ଛାପୁରମ୍ ପର୍ଯ୍ୟନ୍ତ ୪୪୦ କିଲୋମିଟର, ଓ ସମ୍ବଲପୁର ଠାରୁ ରାଉରକେଲା ପ୍ରାୟ ୧୮୦ କିଲୋମିଟର ଜଗିବେ ଏହି ପାଟ୍ରୋଲିଂ କର୍ମଚାରୀ।
ସରକାର ୧୧୯ ଜଣ ଅବସରପ୍ରାପ୍ତ ପୁଲିସ ଅଧିକାରୀଙ୍କୁ ଏ କ୍ଷେତ୍ରରେ ନିଯୁକ୍ତି ଦେବାକୁ ଚାହୁଁଛନ୍ତି। ସବଇନ୍ସପେକ୍ଟର, ଡେପୁଟି ସୁବେଦାର, ସର୍ଜେଣ୍ଟ ପାହ୍ୟାର ଅଧିକାରୀଙ୍କୁ ସୁଯୋଗ ମିଳିବ।ମାସିକ ୧୭ ହଜାର ଟଙ୍କା ଦରମାରେ ସେମାନେ କାମ କରିବେ। ରାଜ୍ୟସ୍ତରୀୟ ସୁରକ୍ଷା ପାଣ୍ଠିରୁ ପାଟ୍ରୋଲିଂ ପାଇଁ ଆବଶ୍ୟକ ଗାଡି, ତେଲ ଆଦି ଖର୍ଚ୍ଚ ହେବ।
ସୁପ୍ରିମକୋର୍ଟ କମିଟି ଏବେ ସଡକ ସୁରକ୍ଷା ବ୍ୟବସ୍ଥାକୁ ଅନୁଧ୍ୟାନ କରୁଛନ୍ତି। ଦେଖାଯାଉଛି, ଯେତିକି ଦୁର୍ଘଟଣାଜନିତ ମୃତ୍ୟୁ ହେଉଛି, ତାର ୬୦ ପ୍ରତିଶତ ମୃତ୍ୟୁ ଜାତୀୟ ରାଜପଥରେ ହେଉଛି।ଗତବର୍ଷ ପ୍ରାୟ ୫୩୫୧ ଲୋକଙ୍କର ସଡକ ଦୁର୍ଘଟଣାରେ ମୃତ୍ୟୁ ହୋଇଥିବା ପରିସଂଖ୍ୟାନ କହୁଛି।