ଭୁବନେଶ୍ବର: କରୋନା ସଂକ୍ରମିତଙ୍କ ସଂଖ୍ୟା ଧୀରେ ଧୀରେ ବୃଦ୍ଧି ପାଇବାରେ ଲାଗିଛି। ଏହି ଘଟଣା ସମସ୍ତଙ୍କୁ ବିଚଳିତ କରିସାରିଲେଣି। କିନ୍ତୁୃ କରୋନାଙ୍କୁ ଦମନ କରିବା ଲାଗି ମୁଖ୍ୟମନ୍ତ୍ରୀ ନିଜର ଦୃଢପଣ ଏଭଳି ନମ୍ରତାର ସହିତ ଜାହିର କରୁଛନ୍ତି, ଯାହା ସବୁ ବର୍ଗକୁ ବେଶ୍ ଛୁଇଁବା ଭଳି। ରାଜନୈତିକ ପର୍ଯ୍ୟବେକ୍ଷକ ମହଲକୁ ବି ନବୀନଙ୍କର ଏଭଳି ନମନୀୟ ଭାବେ ନେତୃତ୍ବ ନେବାର କୌଶଳ ବେଶ୍ ଆନ୍ଦୋଳିତ କରୁଛି। କେତେ ବଡ଼ ବଡ଼ କଥା ବିନମ୍ରତାର ସହିତ ପ୍ରତିବେଦନ କଲେ, ତାହା ଠିକଣା ସ୍ଥାନକୁ ଛୁଇଁବାର ଶକ୍ତି ରଖେ, ତାହା ଗତ କିଛି ଦିନରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟଶୈଳୀ ସଙ୍କେତ ଦେଉଛି।
ଆଜି ନବୀନ ଏ ଦିଗରେ ଯେଉଁ ଉଦାହରଣ ସାମ୍ନାକୁ ଆଣିଛନ୍ତି, ତାହା ଏହିଭଳି।
ପ୍ରିୟ ଭାଇ ଓ ଭଉଣୀମାନେ ନମସ୍କାର।
କେବଳ ସଚେତନତା ଦ୍ବାରା ହିଁ ଆମେ କରୋନା ସଂକ୍ରମଣକୁ ରୋକିପାରିବା। କରୋନାକୁ ଡରିବାର କିଛି ନାହିଁ। କିନ୍ତୁ ଆମକୁ ସାବଧାନ ରହିବାକୁ ପଡିବ।
ଦିଲ୍ଲୀ ନିଜାମୁଦ୍ଦିନ୍ ସଭାରେ ଓଡ଼ିଶାରେ ଯୋଗଦେଇଥିବା ସମସ୍ତଙ୍କୁ ମୋର ଅନୁରୋଧ, ଆପଣ ଟୋଲ୍ ଫ୍ରି ନମ୍ବର-୧୦୪ ସହିତ ତୁରନ୍ତ ଯୋଗାଯୋଗ କରନ୍ତୁ। ଡାକ୍ତରଙ୍କ ପରାମର୍ଶ ମାନନ୍ତୁ। ୨୪ ଘଣ୍ଚା ଭିତରେ ଟେଷ୍ଟ ପାଇଁ ଆଗେଇ ଆସନ୍ତୁ। ଡରନ୍ତୁ ନାହିଁ। ମୁଁ ଓ ମୋର ସରକାର ଆପଣଙ୍କ ସାଥିରେ ଅଛନ୍ତି। ମା’ ମାନଙ୍କୁ ଅନୁରୋଧ ନିଜର ପରିବାର ଓ ନିଜ ପିଲାମାନଙ୍କ ଭଲ ପାଇଁ ଏଥିରେ ସହଯୋଗ କରନ୍ତୁ।
କରୋନା ମାନବଜାତିର ବଡ଼ ଶତ୍ରୁ। ଏହାକୁ ହରାଇବା ପାଇଁ ସମସ୍ତଙ୍କ ସହଯୋଗ ଦରକାର। ମୁଁ ପୁଣି ଥରେ ନିଜାମୁଦ୍ଦିନ୍ ସଭାରେ ଯୋଗଦେଇଥିବା ଓଡ଼ିଶାର ବନ୍ଧୁମାନଙ୍କୁ ଅନୁରୋଧ କରୁଛି ଯେ ଆପଣମାନେ ୨୪ ଘଣ୍ଟା ମଧ୍ୟରେ ଟେଷ୍ଟ ପାଇଁ ଆଗେଇ ଆସନ୍ତୁ। ବିଳମ୍ବ କଲେ ଏହା ଆପଣଙ୍କୁ ଓ ଆପଣଙ୍କ ପରିବାରକୁ ଅସୁବିଧାରେ ପକାଇପାରେ।
ଆପଣମାନଙ୍କ ସହଯୋଗ ହିଁ ଆପଣଙ୍କ ପରିବାର ସହିତ ମାନବ ଜାତିର ବଡ଼ ଉପକାର କରିପାରିବ।
ନିଜାମୁଦ୍ଦିନ୍ ଧର୍ମସଭାରୁ ଫେରିଥିବା ବ୍ୟକ୍ତିଙ୍କ ଲାଗି ନବୀନ ଚାପ କୌଶଳ ପରିବର୍ତେ ବିନମ୍ର ଢଙ୍ଗରେ ନିବେଦନ ସେହି ବର୍ଗର ଲୋକମାନଙ୍କୁ ବି ବିସ୍ମିତ କରିବା ଆରମ୍ଭ କଲାଣି। ପୂର୍ବରୁ ପ୍ରତି ପରିବାରର ମୁଖିଆଙ୍କୁ ଶପଥ (ଏକପ୍ରକାର ରାଣ) ନେଇ ପିଲାମାନଙ୍କୁ ଓ ପରିବାରକୁ ସୁରକ୍ଷିତ କରିବା ଲାଗି ଅପିଲ୍ କରିଥିଲେ ନବୀନ। ଏହା ପୂର୍ବରୁ କରୋନାକୁ ହାଡଫୁଟି ସହିତ ତୁଳନା କରି ନବୀନ ପ୍ରତି ଘରେ ଘରେ ଏକାନ୍ତବାସ ବା ପୃଥକାବାସ ମାନିବାର କୌଶଳ ଧରାଇଥିଲେ। ବିଶେଷକରି ମା’ ମାନଙ୍କୁ ଏହା ଛୁଇଁଥିଲା।
ସଂପ୍ରତି ଏହି ଧର୍ମସଭାରୁ ଫେରିଥିବା ବ୍ୟକ୍ତିମାନେ ବିପଦ ଆଣିଦେବା ଭଳି ଭୟ ରଖୁଥବାରୁ ନିଜେ ମୁଖ୍ୟମନ୍ତ୍ରୀ ସେମାନଙ୍କୁ ବଳ ଦେଇ ପରୀକ୍ଷା କରିବା ଲାଗି ପ୍ରବର୍ତାଇଛନ୍ତି। ଏହାଦ୍ବାରା ସାମୟିକ ଭାବେ ସଂଖ୍ୟା ବଢିପାରେ, କିନ୍ତୁ ଗୋଷ୍ଠୀ ସଂକ୍ରମଣରୁ ଓଡ଼ିଶା ବର୍ତିପାରିବ ବୋଲି ଆଶା କରାଯାଉଛି।