ଭୁବନେଶ୍ବର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ପ୍ରଧାନମନ୍ତ୍ରୀ କିଷାନ ଯୋଜନାରେ ଅଷ୍ଟମ କିସ୍ତିରେ ୨୭ଲକ୍ଷ ୮୩ ହଜାର ୨୦୯ ଜଣ ଚାଷୀଙ୍କୁ ମୋଟ ୫୫୬ କୋଟି ୬୪ଲକ୍ଷ ଟଙ୍କା ପ୍ରଦାନ କରିଛନ୍ତି। ସମଗ୍ର ଭାରତବର୍ଷରେ ସାଢେ ୯ କୋଟି ଚାଷୀଙ୍କୁ ଖାତାରେ ପ୍ରଧାନମନ୍ତ୍ରୀ ୧୯ ହଜାର କୋଟି ଟଙ୍କାଦେଇଥିବା ଅବସରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସାଧୁବାଦ ଜଣାଇଛନ୍ତି। ହେଲେ ଏ ସଂପର୍କରେ ଟ୍ବିଟ୍ କରିବା ବେଳେ କେନ୍ଦ୍ର ମନ୍ତ୍ରୀ ରାଜ୍ୟ ସରକାରଙ୍କୁ ତେର୍ଚ୍ଛା ବାଣ ମାରିବାକୁ ପଛାଇ ନାହାନ୍ତି।
କେନ୍ଦ୍ରମନ୍ତ୍ରୀ ଟ୍ବିଟ୍ କରି କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ କ୍ରମାଗତ ଭାବେ ଅନ୍ନଦାତାଙ୍କ ହାତମୁଠାକୁ ଟାଣ କରୁଛନ୍ତି। ଓଡ଼ିଶାର ଚାଷୀମାନେ ପିଏମ୍ କିଷାନ ଯୋଜନାରେ ୮ଟି କିସ୍ତିରେ ୨ହଜାର ଟଙ୍କା ଲେଖାଏଁ ୩ହଜାର ୮୩୦ କୋଟି ୮୫ ଲକ୍ଷ ଟଙ୍କାର ସହାୟତା ପାଇସାରିଲେଣି। ହେଲେ ପିଏମ୍ କିଷାନ ଯୋଜନାରେ ଓଡ଼ିଶାର ୪୦ ଲକ୍ଷ ୫୦ ହଜାର ୧୦୩ ଜଣ ଚାଷୀ ପଞ୍ଜୀକୃତ ହୋଇଥିଲେ ହେଁ ସପ୍ତମ କିସ୍ତିରେ ସେମାନଙ୍କ ମଧ୍ୟରୁ ୨୪ ଲକ୍ଷ ୭୦ ହଜାର ୬୭୧ ଚାଷୀ ୪୯୪ କୋଟି ୧୩ଲକ୍ଷ ଟଙ୍କା ପାଇଥିଲେ। ଏ ନେଇ ସେ ମୁଖ୍ୟମନ୍ତ୍ରୀଙ୍କୁ ଜଣାଇବା ପରେ ଅଷ୍ଟମ କିସ୍ତିରେ ଅଧିକ ୩ଲକ୍ଷ ୧୨ ହଜାର ୫୩୮ ଚାଷୀ ଲାଭ ପାଇଛନ୍ତି।
ଓଡ଼ିଶା ଚାଷୀଙ୍କ କଲ୍ୟାଣ କଳ୍ପେ ରାଜ୍ୟ ସରକାର ପିଏମ୍ କିଷାନ ଯୋଜନାରେ ପଞ୍ଜୀକୃତ ହୋଇଥିବା ସବୁ ଚାଷୀ ଯେପରି ଏହାର ଲାଭ ଉଠାଇପାରିବେ,ସେ ନେଇ ରାଜ୍ୟ ସରକାର ପଦକ୍ଷେପ ନିଅନ୍ତୁ ବୋଲି ଶ୍ରୀ ପ୍ରଧାନ ଟ୍ବିଟ୍ ଜରିଆରେ ଅସନ୍ତୋଷ ଝାଡିଛନ୍ତି। କାହିଁକି ବଳକା ଚାଷୀଙ୍କ ପାଖକୁ କେନ୍ଦ୍ର ଅର୍ଥ ଯାଉନି, କେନ୍ଦ୍ରମନ୍ତ୍ରୀଙ୍କ ଏଭଳି ଅସନ୍ତୋଷ ପରେ ପ୍ରଶ୍ନ ଉଠିବା ସ୍ବାଭାବିକ। ଏହା ରାଜ୍ୟ ସରକାରଙ୍କ କୃଷି ବିଭାଗକୁ ପୁଣି ଅଡୁଆ ଭିତରକୁ ଠେଲିିଛି।
ଉଲ୍ଲେଖଥାଉକି, ଆଜି ଅପରାହ୍ନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କାଳିଆ ଯୋଜନାରେ ପ୍ରାୟ ୯୨୦ କୋଟି ଟଙ୍କା ଚାଷୀଙ୍କ ଆକାଉଣ୍ଟକୁ ଦେବେ। ଏହାପୂର୍ବରୁ କେନ୍ଦ୍ରମନ୍ତ୍ରୀ ଏଭଳି ଟ୍ବିଟ୍ କରି ଚାଷୀ ପ୍ରସଙ୍ଗରେ ପୁଣି ଏକ ବଡ଼ ବିତର୍କ ଲାଗି ରାସ୍ତା ଖୋଲିଛି।