ଭୁବନେଶ୍ବର: ଓଡ଼ିଆ ପୁଅ ତଥା ତାମିଲନାଡୁ ପୁଲିସ ମହାନିର୍ଦେଶକ ତଥା ୧୯୮୫ ବ୍ୟାଚ୍ ଆଇପିଏସ୍ ଜଳଦ କୁମାର ତ୍ରିପାଠୀଙ୍କୁ କେନ୍ଦ୍ରରେ ଏକ ଗୁରୁତ୍ବପୂର୍ଣ୍ଣ ପଦବିରେ ନିଯୁକ୍ତି ମିଳିପାରେ। କେନ୍ଦ୍ରୀୟ ଭିଜିଲାନ୍ସ କମିସନ ପଦ ପାଇଁ ତାଙ୍କ ନାମ ସଂପର୍କରେ ବିଚାର ଚାଲିଛି। ତାମିଲନାଡୁ ରାଜ୍ୟ ଗୃହ ବିଭାଗ ତାଙ୍କ ନାମ କେନ୍ଦ୍ର ସରକାରଙ୍କୁ ସୁପାରିସ କରିଛନ୍ତି। ଯଦି ଶ୍ରୀ ତ୍ରିପାଠୀ ଏହି ଗୁରୁତ୍ବପୂର୍ଣ୍ଣ ପଦବିରେ ନିଯୁକ୍ତି ପାଆନ୍ତି, ତେବେ ଚାରିବର୍ଷ ଅଥବା ୬୫ ବର୍ଷ ବୟସ ପର୍ଯ୍ୟନ୍ତ କାର୍ଯ୍ୟ କରିବେ। ଶ୍ରୀ ତ୍ରିପାଠୀ ଚଳିତ ମାସରେ ଅବସର ନେବେ।
ମିଳୁଥିବା ସୂଚନା ଅନୁସାରେ, ଜୁଲାଇ ସୁଦ୍ଧା ଏହି ପଦବି ପୂରଣ ହୋଇପାରେ। ଏଥିପାଇଁ ଭାରତବର୍ଷର ବଛା ବଛା ଅଧିକାରୀଙ୍କ ନାମ ଉପରେ ଚର୍ଚ୍ଚା ଚାଲିଛି। ଶ୍ରୀ ତ୍ରିପାଠୀଙ୍କର ପୁଲିସ ବିଭାଗରେ ବେଶ୍ ଖାତିର ଓ ଖ୍ୟାତି ଅଛି। ୧୯୯୮ ମସିହାରେ ତ୍ରିଚି ପୁଲିସ କମିସନର ଭାବେ ଉଲ୍ଲେଖନୀୟ କାର୍ଯ୍ୟ କରିଥିଲେ। ବିଶେଷକରି କମ୍ୟୁନିଟି ପୁଲିସ କ୍ଷେତ୍ରରେ ସେ ଆଣିଥିବା ସଂସ୍କାର ଭାରତବର୍ଷରେ ଅନ୍ୟ ରାଜ୍ୟ ପାଇଁ ବେଶ୍ ଖ୍ୟାତି ଆଣିଥିଲା।
୧୯୬୪ ମସିହାରୁ ସିଭିସି ନିଯୁକ୍ତି ପ୍ରକ୍ରିୟା ରହିଛି ଓ ଏହା ଏକ ସଂକଳ୍ପ ଉପରେ ପର୍ଯ୍ୟବେଶିତ ଥିଲା। ହେଲେ ୨୦୦୩ରେ ସିଭିସିକୁ ବୈଧାନିକ ମାନ୍ୟତା ଦିଆଯାଇଥିଲା। କେନ୍ଦ୍ର ସରକାରୀ ସଂଗଠନ ଉପରେ ଏହି ସଂସ୍ଥା ନଜର ରଖିଥାଏ। ଏଥିରେ ଜଣେ ଅଧ୍ୟକ୍ଷ ନିଯୁକ୍ତି ପାଇଥାନ୍ତି ଏବଂ ଅନ୍ୟ ଦୁଇଜଣ ଭିଜିଲାନ୍ସ କମିସନର ଥାନ୍ତି।