ଭୁବନେଶ୍ବର: ଯୁବ ବିଧାୟକ ତଥା ବିଜୁ ଯୁବ ଜନତା ଦଳର ସଭାପତି ବ୍ୟୋମକେଶ (ବାପି) ରାୟଙ୍କର ହାତ ଗଣ୍ଠି ପଡ଼ିଛି। କୋଭିଡ୍ କଟକଣା ଭିତରେ ଚିଲିକା ସ୍ବସ୍ତି ରିସର୍ଟରେ ସେ ତଦାସା (ଲିକି)ଙ୍କର ହାତ ଧରିଛନ୍ତି। ବିବାହ ବନ୍ଧନରେ ବାନ୍ଧି ହୋଇଛନ୍ତି ବାପି ଓ ଲିକି। ପାଖରେ ଠିଆ ହୋଇଛି କୁନି ଝିଅ। ପାଖାପାଖି ୧୭ମାସ ପରେ ବ୍ୟୋମକେଶଙ୍କ ଜୀବନକୁ ଆସି ହସ ଫେରିଛି, କୁନି ଝିଅ ବି ମାଆ ବଦଳରେ ମାଆକୁ ଫେରିପାଇଛି।
ଆଜିର ଏହି ବିବାହ ଉତ୍ସବରେ ମନ୍ତ୍ରୀ ଅରୁଣ ସାହୁ, ବିଜୁ ଜନତା ଦଳର ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ, ବିଧାୟକ ପ୍ରତାପ ଦେବ, ସୁଧୀର ସାମଲ, ପ୍ରଣବ ବଳବନ୍ତରାୟ, ଉମା ସାମନ୍ତରାୟ, ସୁଶାନ୍ତ ରାଉତ ପ୍ରମୁଖ ଯୋଗଦେଇଥିଲେ। ଅପରାହ୍ନରେ ଉଭୟଙ୍କର ବିବାହ କାର୍ଯ୍ୟ ଶେଷ ହୋଇଛି।
ବ୍ୟୋମକେଶଙ୍କ ଖୁସିର ସଂସାର ଉପରେ କାହାର ଆଖି ଲାଗିଯାଇଥିଲା ଯେମିତି। ସେଦିନ ଥିଲା ୨୦୨୦ ମସିହା ଫେବ୍ରୁଆରି ୩ ତାରିଖ। ଅଧା ରାସ୍ତାରେ ହାତ ଛାଡି ଦେଇଥିଲେ ନିଲିମା। ଅସୁସ୍ଥତା କାରଣରୁ ଅକାଳରେ ତାଙ୍କୁ ଏ ଦୁନିଆ ଓ ହସଖୁସିର ସଂସାରକୁ ଛାଡିବାକୁ ପଡିଥିଲା। ସେବେଠାରୁ ଯୁବ ବିଧାୟକ ବ୍ୟୋମକେଶ ରାୟ ଓ କୁନି ଝିଅ ସମ୍ପୂର୍ଣ୍ଣ ଏକାକୀ ହୋଇଯାଇଥିଲେ। ସେଦିନ ଆଖିରୁ ଧାର ଧାର ଲୁହ ଗଡିଯାଉଥିଲା ବିଧାୟକଙ୍କର। ସ୍ତବ୍ଧ ହୋଇଯାଇଥିଲା ଚାନ୍ଦବାଲି ନିର୍ବାଚନମଣ୍ଡଳୀ। ବ୍ୟୋମକେଶ ଓ ନିଲିମାଙ୍କୁ ଜାଣିଥିବା କେହି ବି କୋହ ସମ୍ବରଣ କରିପାରିନଥିଲେ। କୁନି ଝିଅ ମାଆକୁ ଛାଡି ବାପାଙ୍କ ସହିତ ଜୀବନ ବିତାଇବା ଆରମ୍ଭ କରିଥିଲା।
ଆଜି ବାପିଙ୍କ ଜୀବନରେ ସୁଖ ଫେରିଛି, କୁନି ଝିଅ ପାଟିରୁ ବିଧାତା ଛଡାଇ ନେଇଥିବା ମାଆ ଡାକ ତାକୁ ପୁଣି ଫେରାଇ ଦେଇଛି। ବାପି ଓ ଲିକିଙ୍କର ବୈବାହିକ ଜୀବନ ମଙ୍ଗଳମୟ ହେଉ ଏଭଳି କାମନା କରି ଫେରିଛନ୍ତି ବନ୍ଧୁ, କୁଟୁମ୍ବ।