ଭୁବନେଶ୍ବର: ରାଜ୍ୟରେ କରୋନା ଲହରର ଦ୍ୱିତୀୟ ପ୍ରବାହ ଏଯାଏ କମିନି> ସଂକ୍ରମଣ ହାର ପୂର୍ବଅପକ୍ଷୋ କମିଥିଲେ ମଧ୍ୟ ଦୈନିକ ସଂକ୍ରମଣ ୨ ହଜାରୁ ୩ ହଜାର ଭିତରେ ରହୁଛି। ୨ ହଜାର ତଳକୁ ଖସୁନି ଦୈନିକ ସଂକ୍ରମିତଙ୍କ ସଂଖ୍ୟା। ଊପକୂଳ ଓଡିଶାରେ ଲକଡାଉନ ଓ ସଟଡଉନ ସତ୍ୱେ କରୋନା ସଂକ୍ରମଣ ନିୟନ୍ତ୍ରଣକୁ ଆସୁନାହିଁ । ସର୍ଭିଲାନ୍ସ ସହିତ ଟେଷ୍ଟିଂ ଓ ଟିକାକରଣ ସତ୍ୱେ ଉପକୂଳ ଓଡିଶାରେ କାହିଁକି ସଂକ୍ରମଣ କମୁନି ତାହା ଏବେ ଚିନ୍ତାଜନକ ବିଷୟ । ସେହିପରି କରେନା ମୃତ୍ୟୁର ତାଲିକା ମଧ୍ୟ ଲମ୍ବିବାରେ ଲାଗିଛି।
ଗତ ୨୪ ଘଂଟାରେ ୭୫ ହଜାର ୬୫୩ କରୋନା ନମୂନା ପରୀକ୍ଷା ହୋଇଥିବା ବେଳେ ୨୩ ଶହ ୩୪ ଆକ୍ରାନ୍ତ ଚିହ୍ନଟ ହୋଇଛନ୍ତି । ସଂକ୍ରମଣ ହାର ରହିଛି ୩.୦୮ ପ୍ରତିଶତ। ଖୋର୍ଦ୍ଧାରୁ ସର୍ବାଧିକ ୩୮୦ ସଂକ୍ରମିତ ଚିହ୍ନଟ ହୋଇଛନ୍ତି । ସେହିପରି କଟକରୁ ୩୭୧,ବାଲେଶ୍ୱରରୁ ୧୬୪,ଭଦ୍ରକରୁ ୧୨୧,ଜଗତସିଂହପୁରରୁ ୧୦୧,ଯାଜପୁରରୁ ୧୭୯, କେନ୍ଦ୍ରାପଡାରୁ ୧୯୬, ମୟୂରଭଂଜରୁ ୧୦୪, ପୁରୀରୁ ୧୦୬,ନୟାଗଡରୁ ୯୪ ଆକ୍ରାନ୍ତ ଚିହ୍ନଟ ହୋଇଛନ୍ତି । ମୋଟ ଆକ୍ରାନ୍ତଙ୍କ ସଂଖ୍ୟା ରାଜ୍ୟରେ ଏବେ ୯ ଲକ୍ଷ ୩୭ ହଜାର ୪୭୦ରେ ପହଞ୍ଚିଛି।
ସେହିପରି ଆଜି ଆଉ ୫୮ ମୃତ୍ୟୁର ସରକାର ହିସାବ ଦେଇଛନ୍ତି । ରାଜ୍ୟରେ ମୋଟ୍ କରୋନାଜନିତ ମୃତ୍ୟୁ ସଂଖ୍ୟା ୪୫୩୪କୁ ବୃଦ୍ଧି ପାଇଛି । ଖୋର୍ଦ୍ଧା ଜିଲ୍ଲାରୁ ସର୍ବାଧିକ ୧୧ ଆକ୍ରାନ୍ତଙ୍କ ମୃତ୍ୟୁ ହୋଇଛି । ବରଗଡ ଓ ପୁରୀରୁ ୭ ଲେଖାଏ , ଗଂଜାମ ଓ ସୁନ୍ଦରଗଡରୁ ୬ ଲେଖାଏ, ସମ୍ବଲପୁରରୁ ୪ , କେନ୍ଦ୍ରାପଡାରୁ ୩, କଟକ, ଢେଙ୍କାନାଳ, ନୟାଗଡ଼,କେନ୍ଦୁଝରୁ ୨ ଲେଖାଏ ଓ ଅନୁଗୁଳ,ଯାଜପୁର,ଗଜପତିରୁ ଜଣେ ଲେଖାଏ ଲୋକଙ୍କର ମୃତ୍ୟୁ ହୋଇଛି।