ଧଳାଜହର କବଜାରେ ଭୁବନେଶ୍ୱର । କମିସନରେଟ ପୁଲିସର ନାକତଳେ ରାଜଧାନୀରେ ବେଧଡ଼କ ଚାଲିଛି ବ୍ରାଉନସୁଗାର ବେପାର । ଆଜି କମିସନରେଟ ପୁଲିସ ୨ ଜଣ ବ୍ରାଉନସୁଗାର ବେପାରୀଙ୍କୁ ଗିରଫ କରି ଲକ୍ଷାଧିକ ଟଙ୍କାର ବ୍ରାଉନସୁଗାର ଜବତ କରିଛି । ଜଣେ ମହିଳା ମଧ୍ୟ ବ୍ରାଉନସୁଗାର ବେପାରରେ ସାମିଲ ଥିବା ପୁଲିସ କହିଛି ।
କମିସନରେଟ ପୁଲିସ ସହିଦନଗର ଥାନା କେଶୁରା ଅଂଚଳର ଜଣଙ୍କ ଘରୁ ୫୫୦ ଗ୍ରାମର ବ୍ରାଉନସୁଗାର ଜବତ କରିଛି । ଯାହାର ଆନୁମାନିକ ମୂଲ୍ୟ ୫୫ ଲକ୍ଷ ଟଙ୍କା ହେବ । ନଗଦ ୩୪ ଲକ୍ଷ ୮୦ ହଜାର ଟଙ୍କା ସହ ଗୋଟିଏ କାର ଓ ୨ଟି ବାଇକ ମଧ୍ୟ ଜବତ କରାଯାଇଛି । ପୁଲିସ କମିସନର ସାମ୍ବାଦିକ ସମ୍ମିଳନୀ କରି ଏନେଇ ସୂଚନା ଦେଇଛନ୍ତି । ଦୁଇ ବ୍ରାଉନସୁଗାର ବେପାରୀଙ୍କୁ ପୁଲିସ ଗିରଫ କରି ପଚରାଉଚରା କରୁଛି । ଏଥିରେ ଆଉ କିଏ କିଏ ସଂପୃକ୍ତ ଏବଂ ବିପୁଳ ପରିମାରଣ ଧଳା ଜହର କେଉଁଠୁ ଆସିଲା ଏବଂ କୁଆଡେ ପଠାଯାଇଥାନ୍ତା ସେ ନେଇ ପୁଲିସ ପଚରାଉଚରା କରୁଛି । ପୂର୍ବରୁ ମଧ୍ୟ ଭୁବନେଶ୍ୱରର ହଳଦୀପଡିଆ ବସ୍ତି ଏବଂ ବିଭିନ୍ନ ସ୍ଥାନରୁ ବିପୁଳ ପରିମାଣର ବ୍ରାଉନସୁଗାର ପୁଲିସ ଜବତ କରି ରାକେଟର ପର୍ଦ୍ଦାଫାଶ କରିଛି ।ତେବେ ଦିନକୁ ଦିନ ରାଜଧାନୀରେ ଧଳା ଜହର ବେପାର ବ୍ୟାପିବାରେ ଲାଗିଛି ।ଅଧିକାଂଶ ଯୁବପିଢୀ ମଧ୍ୟ ଏହି ଧଳା ଜହର ବେପାରରେ ସଂପୃକ୍ତ ଥିବା ଦେଖିବାକୁ ମିଳୁଛି।